قاراعاندى وبلىسى اكىمىنىڭ جاڭا ورىنباسارى تاعايىندالدى

– قازاقستان رەسپۋبليكاسى پرەزيدەنتى اكىمشىلىگىنىڭ كەلىسىمى بويىنشا ابزال نۇكەن ۇلى نۇكەنوۆ وبلىس اكىمىنىڭ ورىنباسارى بولىپ تاعايىندالدى. بۇل مىندەتكە بىردەن بىرنەشە باعىت كىرەدى: ءبىلىم بەرۋ, دەنساۋلىق ساقتاۋ, مادەنيەت جانە سپورت, ءتىل ساياساتى, ىشكى ساياسي تۇراقتىلىق پەن كونفەسسياارالىق كەلىسىمدى قامتاماسىز ەتۋ, جاستارمەن جانە باق-پەن جۇمىس, – دەدى ەرلان قوشانوۆ.

سونداي-اق, وبلىس اكىمىنىڭ وكىمىمەن ورىنباسارلارىنىڭ مىندەتتەرى قايتا قارالدى. الەۋمەتتىك قورعاۋ, حالىقتى جۇمىسپەن قامتۋ جانە ەڭبەك قاتىناستارى ماسەلەلەرىنە وبلىس اكىمىنىڭ ونەركاسىپ جانە شوب دامىتۋ جونىندەگى ورىنباسارى الماس ايداروۆ جەتەكشىلىك ەتەتىن بولدى.

ابزال نۇكەنوۆ 1978 جىلى الماتى وبلىسىنىڭ اقسۋ اۋدانىندا دۇنيەگە كەلگەن. ءال-فارابي اتىنداعى قازاق مەملەكەتتىك ۇلتتىق ۋنيۆەرسيتەتىن «ساياساتتانۋشى, ساياساتتانۋ وقىتۋشىسى» ماماندىعى بويىنشا ءتامامدادى. ساياساتتانۋ عىلىمدارىنىڭ كانديداتى.

ەڭبەك جولىن 2000 جىلى «وتان» رەسپۋبليكالىق ساياسي پارتياسىندا باستادى. 2005 جىلدان باستاپ مەملەكەتتىك قىزمەتتە. الماتى قالاسى ىشكى ساياسات دەپارتامەنتىنىڭ ءبولىم باسشىسى, كەيىن الماتى قالاسىنداعى  اۋەزوۆ اۋدانى اكىمىنىڭ ورىنباسارى بولىپ جۇمىس ىستەدى.

ودان كەيىن ل.گۋميلەۆ اتىنداعى ەۇۋ-ءدىڭ زاماناۋي زەرتتەۋلەر ينستيتۋتىن باسقاردى. وسى جوو-دا زاڭ جوبالارىن قۇقىقتىق ساراپتاۋ جانە زاماناۋي زەرتتەۋلەر ينستيتۋتى ديرەكتورىنىڭ ورىنباسارى بولعان.

2011-2016 جىلدارى قر پرەزيدەنتى اكىمشىلىگىندە قاۋىپسىزدىك كەڭەسىنىڭ احۋالدىق ورتالىعىنىڭ مەڭگەرۋشىسى بولىپ قىزمەت ەتتى.

2016 جىلدان باستاپ 2018 جىلعا دەيىن قر ءدىن ىستەرى جانە ازاماتتىق قوعام ۆيتسە-ءمينيسترى بولدى.

2018 جىلدىڭ تامىز ايىنان قازىرگى ۋاقىتقا دەيىن «استانا» حالىقارالىق عىلىمي كەشەنىنىڭ ديرەكتورلار كەڭەسى توراعاسىنىڭ ورىنباسارى قىزمەتىن اتقاردى.

        قاراعاندى وبلىسى