وسىدان 46 جىل بۇرىن, كەڭەس زامانىندا, سوناۋ 1973 جىلى الماتىدا ازيا-افريكا جازۋشىلارىنىڭ كونفەرەنتسياسى وتكەن ەدى.
سوندا مەن وتىزعا كەلگەن جاس جازۋشىمىن. ول كەزدە جازۋشىلار وداعىن ءانۋار ءالىمجانوۆ باسقارعان-تىن. دۋلات يسابەكوۆ, مۇحتار ماعاۋين, تاعى باسقالارى بار – ادەبيەتتىڭ اينالاسىندا جۇرگەن, بۇگىندە ءمۇيىزى قاراعايداي قالامگەر اتانعان ءبىر توپ جاس جازۋشى الەمدىك جيىنعا قاتىستىق. دۇنيە جۇزىنەن كەلگەن پىكىرلەستەرمەن باس قوسىپ, قىزۋ اڭگىمە قۇردىق. سوندا جاپون جازۋشىسى كەندزابۋرو وەمەن تانىسىپ, وي بولىسكەنىمىز ەرەكشە ەسىمدە قالىپتى. كەيىن ول 1994 جىلى نوبەل سىيلىعىن يەلەندى.
ەكى قۇرلىقتىڭ تانىمال قالامگەرلەرىمەن جۇزدەسۋ شىنىندا ءبىز ءۇشىن ۇلكەن وقيعا بولدى. ءتىپتى لاتىن امەريكاسىنان دا اقىن-جازۋشىلار كەلگەن. ونى ءبىزدىڭ قالامگەرلەر دە, وقىرماندار دا ءالى كۇنگە دەيىن اڭىز قىلىپ ايتادى. ادەبي كونفەرەنتسيادا ايتارلىقتاي رەۆوليۋتسيالىق جاڭالىق بولعان جوق. دەگەنمەن ادەبيەت كەڭىستىگىندەگى اۋقىمدى جيىن بولعاندىقتان, ءوتۋ بارىسى دا سوعان ساي بولدى. جالپى مۇنداي حالىقارالىق ادەبي شارالاردىڭ شىعارماشىلىق ادامدارىنا پايداسى زور. بۇگىنگى فورۋم دا مەن كورگەن 46 جىل بۇرىنعى جيىننىڭ جاڭعىرعان, جاھاندانعان زاماناۋي جالعاسى بولاتىنداي.
تولەن ابدىك,
جازۋشى, مەملەكەتتىك سىيلىقتىڭ لاۋرەاتى