گەرمانيانىڭ حالىقارالىق ىنتىماقتاستىق قوعامى (GIZ) سۋ رەسۋرستارى جانە يرريگاتسيا مينيسترلىگىنە 240 جاڭا تەحنيكا بەرەدى. ونىڭ ىشىندە 110 جۇيەلىك بلوك, 50 پلانشەت, 60 نوۋتبۋك جانە 20 مونيتور بار, دەپ حابارلايدى Egemen.kz.
بۇل تەحنيكا باسسەيندىك سۋ ينسپەكتسيالارىنا بەرىلەدى. قازىرگى تاڭدا مينيسترلىك 130 تەحنيكانى قابىلداپ ۇلگەردى. قالعان 110-ى جىل سوڭىنا دەيىن جەتكىزىلەدى.
تەحنيكالىق جابدىقتاۋ 2023 جىلدىڭ قازان ايىندا سۋ رەسۋرستارى جانە يرريگاتسيا مينيسترلىگى مەن GIZ اراسىندا جاسالعان كەلىسىم اياسىندا جۇزەگە اسىپ جاتىر.
«جاڭا تەحنيكا ەلدىڭ سۋ قورىن قورعاۋمەن اينالىساتىن باسسەيندىك ينسپەكتسيالاردىڭ جۇمىس تيىمدىلىگىن ارتتىرۋعا مۇمكىندىك بەرەدى. تەحنيكالىق جابدىقتاۋمەن قاتار, مينيسترلىك قۇرىلعاننان بەرى ينسپەكتسيا بولىمدەرى ءار وبلىس ورتالىعىندا اشىلدى, ال قىزمەتكەرلەر سانى ەكى ەسەگە ارتتى. سونىمەن بىرگە بىلتىر قابىلدانعان سۋ كودەكسى ينسپەكتورلاردىڭ باقىلاۋ جانە قاداعالاۋ وكىلەتتىكتەرىن كەڭەيتتى», دەدى سۋ رەسۋرستارى جانە يرريگاتسيا ءمينيسترىنىڭ ءبىرىنشى ورىنباسارى نۇرلان الدامجاروۆ.
ۇلىتاۋ وبلىسىندا سۋ تاسقىنى قاۋپى بار اۋداندار تەكسەرىلدى