دەموكراتيالىق كۇشتەردىڭ «قازاقستان-2050» جالپىۇلتتىق كواليتسياسىنىڭ جۇمىسى توقتادى. بۇل شەشىم Nur Otan پارتياسى توراعاسىنىڭ ءبىرىنشى ورىنباسارى باۋىرجان بايبەكتىڭ توراعالىعىمەن وتكەن كەڭەس بارىسىندا قابىلداندى.
ەلورداداعى تاۋەلسىزدىك سارايىندا دەموكراتيالىق كۇشتەردىڭ «قازاقستان-2050» جالپىۇلتتىق كواليتسياسىنىڭ وتىرىسىندا كۇن تارتىبىنە اتالعان كواليتسيانىڭ جۇمىسىن توقتاتۋ تۋرالى ماسەلە شىعارىلدى. كەڭەس جۇمىسىن اشقان Nur Otan پارتياسى توراعاسىنىڭ ءبىرىنشى ورىنباسارى باۋىرجان بايبەكتىڭ ايتۋىنشا, وتكەن 8 جىل ىشىندە جالپىۇلتتىق كواليتسيا جالپىۇلتتىق ديالوگتى قامتاماسىز ەتۋ بويىنشا ءتيىمدى قوعامدىق الاڭعا اينالدى. ازاماتتىق قوعام ينستيتۋتتارى مەن مەملەكەتتىك ورگاندار اراسىنداعى مەملەكەتتىڭ دامۋىنىڭ ماڭىزدى ماسەلەلەرى بويىنشا كونسەنسۋس تابىلدى. كواليتسيا «قازاقستان-2050» مەملەكەتتى دامىتۋ ستراتەگياسىن قولداۋعا ارنالعان جەتەكشى قوعامدىق جانە ساياسي كۇشتەردى, تۇڭعىش پرەزيدەنت – ەلباسىنىڭ مەملەكەتتىك باعىتىنىڭ جاقتاستارىن بىرىكتىردى.
Nur Otan پارتياسى توراعاسىنىڭ ءبىرىنشى ورىنباسارى اتاپ وتكەندەي, اتالعان الاڭدا ساياسي جۇيە, ەكونوميكا, الەۋمەتتىك جانە مادەني سالالاردىڭ دامۋ سالاسىنداعى وزەكتى باعىتتار تالقىعا ءتۇستى. بارلىق وسى ماسەلەلەر بويىنشا ولاردى ىسكە اسىرۋ تۇرعىسىندا تەڭدەستىرىلگەن شەشىمدى انىقتادى دەگەن كەلىسىمگە كەلدى. مىسالى, 2017 جىلى مەملەكەتتىك بيلىكتىڭ تارماقتارى اراسىنداعى وكىلەتتىلىكتى قايتا ءبولۋ تۋرالى كونستيتۋتسيالىق رەفورما ماسەلەسى تالقىلاندى. پارلامەنت پەن ۇكىمەتتىڭ ءرولى كۇشەيتىلدى. قازىر ۇكىمەت بارىنەن بۇرىن ءماجىلىستىڭ الدىندا ەسەپتى. دەپۋتاتتاردىڭ, سونىڭ ىشىندە, مينيسترلەردى كەلىسۋ مەن بوساتۋداعى وكىلەتتىلىگىنىڭ اۋقىمى كەڭەيدى.
اتالعان رەفورمانىڭ پراكتيكالىق قادامدارىنىڭ ءبىرى وتكەن جىلى سايلاۋ تۋرالى جاڭا زاڭنىڭ قابىلدانۋى بولىپ سانالدى. بارلىق دەڭگەيدەگى الداعى ءماسليحاتتار سايلاۋلارى پارتيالىق ءتىزىم بويىنشا وتكىزىلەتىن بولادى. ناتيجەسىندە ساياسي پارتيالاردىڭ ءرولى ارتا تۇسپەكشى. بۇل – دەموكراتيا يندەكسى بويىنشا بارىنشا دامىعان 30 ەلدىڭ جانە باتىس ەۋروپانىڭ باسىم ەلدەرىنىڭ ۇزدىك تاجىريبەسى.
– ەلباسى نۇرسۇلتان نازارباەۆ Nur Otan پارتياسى ساياسي كەڭەسىنىڭ كەڭەيتىلگەن وتىرىسىندا سويلەگەن سوزىندە ايتقانداي: «سايلاۋدىڭ پروپورتسيونالدى ۇلگىسى ۇزدىك الەمدىك تاجىريبەگە تولىقتاي سايكەسەدى, ساياسي پارتيالاردىڭ قىزمەتىن بەلسەندىرە وتىرىپ, ساياسي جۇيەنىڭ نىعايۋى مەن دەموكراتيانىڭ دامۋىنا سەبەپ بولادى. بۇگىن وسى جەردە 5 پارتيانىڭ, سونىڭ ىشىندە, 3 پارلامەنتتىك پارتيانىڭ وكىلدەرى وتىر. سايلاۋ تۋرالى جاڭا زاڭ پارتيادان جاۋاپكەرشىلىكتى ارتتىرۋ جانە سايلاۋشىلارمەن پراكتيكالىق جۇمىستى كۇشەيتۋدى تالاپ ەتەدى. وسى شارتپەن بارلىق پارتيالار وعان بەلسەندى دايىندالۋ قاجەت. Nur Otan دايىندىقتى باستادى. Nur Otan ساياسي كەڭەسىنىڭ سوڭعى وتىرىسىندا «سەنىم. ديالوگ. بولاشاققا نىق قادام – Nur Otan پارتياسىنىڭ 7 سەرپىنى» اتتى پارتيا جۇمىسىن جۇيەلى جاڭعىرتۋ باعدارلاماسى قابىلداندى, – دەدى باۋىرجان بايبەك.
وتىرىس بارىسىندا باۋىرجان بايبەك, سونداي-اق Nur Otan پارتياسى دەموكراتيالىق كۇشتەردىڭ «قازاقستان-2050» جالپىۇلتتىق كواليتسياسى شەڭبەرىندە باستالعان كەڭ قوعامدىق پىكىرتالاس قازاقستان پرەزيدەنتىنىڭ جانىنداعى ۇلتتىق قوعامدىق سەنىم كەڭەسىنىڭ الاڭىندا جالعاسىن تاباتىنىن ايتتى.
– ۇلتتىق قوعامدىق سەنىم كەڭەسى – بۇل ەل دامۋىنىڭ ماڭىزدى ساياسي ماسەلەلەرى بويىنشا جالپىۇلتتىق ديالوگتىڭ جاڭا دەڭگەيى. بۇل كەڭەستىڭ مارتەبەسى مەن ماڭىزدىلىعى پرەزيدەنت قاسىم-جومارت توقاەۆتىڭ توراعالىق ەتۋىمەن راستالادى. سونىمەن قاتار كەڭەس قۇرامىنا پارتيالار مەن ۇەۇ وكىلدەرى, قوعام قايراتكەرلەرى, ساراپشىلار كىردى. Nur Otan پارتياسى وسى كەڭەستىڭ جۇمىسىنا بەلسەنە قاتىسادى. بيۋرو مەن ساياسي كەڭەستەگى تالقىلاۋدان كەيىن ءبىزدىڭ پارتيادان بىرقاتار ماسەلەلەر ەنگىزىلدى. ءارى قاراي ءبىز ءوز ۇسىنىستارىمىزدى ازىرلەپ, ەنگىزەتىن بولامىز. كواليتسيانىڭ بارلىق مۇشەلەرىن قازاقستاننىڭ ودان ءارى دامۋى ءۇشىن جالپىۇلتتىق ديالوگتى دامىتۋعا ۇلەس قوسۋعا شاقىرامىز, – دەدى باۋىرجان بايبەك.
Nur Otan پارتياسى توراعاسىنىڭ ءبىرىنشى ورىنباسارى, سونىمەن قاتار تاراپتارمەن ارىپتەستىك ودان ءارى جالعاسىن تابادى دەپ اتاپ ءوتتى. ءوزارا ارەكەتتەستىك ءۇشىن ۇلكەن الەۋەت «ميراس», «Nur Otan Talks» جانە «Nur Otan Trends» پارتيالىق ديالوگ الاڭدارى شەڭبەرىندە دە بار.
كەڭەس وتىرىسىندا ءسوز العان «اق جول» دەموكراتيالىق پارتياسىنىڭ توراعاسى ازات پەرۋاشەۆ: – كواليتسيا وتە وزەكتى ماسەلەلەردى تالقىلاپ, قوعاممەن, سايلاۋشىلارمەن تىعىز جۇمىس ىستەدى. كواليتسيا وسى ۋاقىت ارالىعىندا ءوز ماقساتىنا جەتتى دەپ ويلايمىن, – دەدى.
ال «اتامەكەن» ۇلتتىق كاسىپكەرلەر پالاتاسىنىڭ باسقارما توراعاسى ابىلاي مىرزاحمەتوۆ: «كواليتسيا وسى ۋاقىت ارالىعىندا ۇلت مۇددەسىنە قىزمەت ەتتى. ونىڭ ىشىندە, كواليتسيا وتىرىستارىندا كاسىپكەرلەردى مازالاعان ماسەلەلەر اشىق تالقىلاندى», دەگەن ويىن ءبىلدىردى.
سوڭىندا Nur Otan پارتياسى توراعاسىنىڭ ءبىرىنشى ورىنباسارى باۋىرجان بايبەكتىڭ كواليتسيا جۇمىسىن توقتاتۋ تۋرالى ۇسىنىسى ءبىراۋىزدان قابىلداندى.