ەسىمى ەل اۋزىندا ساقتالعان, ەل قورعاعان ەرلەردىڭ ءبىرى – قالاق باتىر. ون جەتىنشى عاسىردىڭ باسىندا قازاق جەرىنە كوز الارتقان جوڭعار شاپقىنشىلىعىندا ەرلىگىمەن كوزگە تۇسكەن قولباسى قالاق باتىردىڭ تۋعان جەرى ەسىل وزەنىنىڭ جاعاسىنداعى كەرەگەتاس ءوڭىرى.
ز ۇلىم جاۋ جاۋار بۇلتتاي تۇنەرىپ, شەگىرتكەدەي قاپتاپ كەلدى دەيدى. قازاق قولى قاپەلىمدە ەتەك-جەڭىن جيناپ ۇلگەرمەگەن. قارامى از. ال جاۋ بولسا ءۇش, الدە ءتورت ەسە كوپ. كەيدە مايدان دالاسىندا كوپتىگىمەن بەل الىپ كەتەتىن ساتتەر دە بولادى. بۇرىنعىلار «كوپ قورقىتادى, تەرەڭ باتىرادى» دەپ تەگىن ايتتى دەيسىز بە؟ ازداعان قوبالجۋ دا بولسا كەرەك. سول ساتتە ارىستانداي ايبات شەككەن قالاق باتىر وكپە تۇستان ات ويناتىپ, جەكپە-جەككە شاقىرعان. بۇرىنعىنىڭ سالتى. جاۋ دا تەگىن ەمەس, اق ساۋىتىن جارقىلداتىپ, ات بەلىنە توڭكەرىلگەن تايقازانداي تومارىلعان جوڭعار باتىرى الداسپانىن جارقىلداتىپ مايدان وتىنە شىقتى دەسەدى. قوس باتىر اۋەلى نايزا سىلتەسكەن. بيە ساۋىنىنداي ۋاقىت وتكەن سوڭ قىلىشتاسۋعا كوشكەن. تەڭ ءتۇسىپتى. ءبىرىن-ءبىرى الا الماعان. ودان سوڭعىسى الماس قانجارلاردىڭ قارجاسۋى. ات ۇستىندەگى قۇيىن-پەرەن, ەس كەتىپ, جان شىققان ارپالىس. سوڭعى ساتتە قالاق باتىر قاس دۇشپاننىڭ قاپىسىن تاپسا كەرەك. ات ارتىنا سىپىرىپ تۇسىرگەن. توبەدەي توڭكەرىلگەن جوڭعار باتىرى قايتىپ باسىن كوتەرە الماپتى. سول ساتتە مانادان بەرى الدەقالاي بولار ەكەن دەپ ۇكىدەي ءۇرپيىپ تۇرعان قازاق ساربازدارىنا الاپات كۇش بىتكەن, رۋح كوتەرىلگەن. سانى جاۋ قولىنان الدەنەشە ەسە كەم بولسا دا باتىرلارى جەڭىپ, باعى ۇستەم بولعان الاشتىڭ ابزال پەرزەنتتەرى الدىڭعى شەپتى ءاپ-ساتتە جۋساتىپ سالىپ, تۇرە قۋعان.
بار عۇمىرىن ەل قورعاۋعا ارناعان قالاق باتىردىڭ جەرلەنگەن جەرى وبلىس ورتالىعىنىڭ ىرگەسىندەگى قالاق تاۋىنىڭ باۋىرى. وسى جەرگە جامباسى تيگەن سوڭ جالپاق جۇرت تويعان قوزىداي تومپايىپ جاتقان شاعىن توبەنى باتىردان ءبىر بەلگى قالسىن دەپ قالاق تاۋى اتاپ كەتكەن. الگى جەر اتى جازىلماعان حات دەيتۇعىن ۇعىم وسىنداي ساتتەردەن تۋىندايدى ەمەس پە؟
جەرگىلىكتى شەجىرەشى مەيرام ساقىشەۆتىڭ ايتۋىنا قاراعاندا, بۇل جەردە جالعىز قالاق باتىر عانا ەمەس, ۇزەڭگى قاعىستىرىپ بىرگە جورتقان, ەل قورعاعان ەرلەردىڭ ءبىر شوعىرى جاتسا كەرەك. تەك وكىنىشكە قاراي, سول باتىرلاردىڭ تىرشىلىگىندە كىم بولعاندىعى, سۇيەگى كىم ەكەندىگى ەل جادىنان وشكەن. ارادا كوپ ۋاقىت وتكەن سوڭ كۇسەپ اۋىلدىق وكرۋگىنە قاراستى تاۋ ەتەگىنە, قالاق باتىردىڭ جامباسى جەرگە تيگەن قورىمعا قۇلپىتاس ورناتىلدى. توبە باسىنداعى ەڭسەلى قۇلپىتاس ەل قورعاعان ەرلەردىڭ ەسىمى ەشقاشان ۇمىتىلمايتىندىعىن مەڭزەپ تۇرعانداي.
اقمولا وبلىسى,
زەرەندى اۋدانى