قاراعاندى وبلىسىنداعى ۇلىتاۋ اۋدانىندا ءوتىپ جاتقان اۋىل جاستارىنىڭ حالىقارالىق فورۋمىنا ەلىمىزدىڭ وزگە وبلىستارىنان عانا ەمەس, تمد ەلدەرىنەن دە قوناقتار كەلدى.
«جاستار جىلىنا» ارنالعان بۇل شارا ءۇش كۇنگە سوزىلادى. فورۋم باعدارلاماسىندا سەمينار-ترەنينگتەر, پىكىرتالاس الاڭدارى, كۆەست جانە تيمبيلدينگ, سونداي-اق ەكسكۋرسيالار, الاۋ باسىندا گيتارامەن ءان شىرقاۋ جانە باسقا دا ويىن-ساۋىق تۇرلەرى قامتىلعان. جوسپار بويىنشا جاستار اۋليەتاۋ شىڭىنا شىعىپ, ونىڭ باسىنا جالاۋ تىگەدى. سونىمەن قاتار, ولار « ۇلىتاۋ Sky» اۋە جىلاندارى فەستيۆالىنە جانە Jezkiik ەتنومادەني مۇراسىنىڭ ەكىنشى حالىقارالىق فەستيۆالىنىڭ سالتاناتتى اشىلۋىنا قاتىسادى.
فورۋم بارىسىندا اۋىلدىڭ جاس كاسىپكەرلەرىنە قاراعاندى وبلىسى اكىمىنىڭ گرانتتارى تابىس ەتىلدى. ناقتى ايتقاندا, بەس اۋداننان كەلگەن 10 جىگىت پەن قىزعا ميلليون تەڭگەدەن بۇيىردى. جاس كاسىپكەرلەر بۇل قاراجاتتى ءسۇت وڭدەۋ, اۆتوموبيل سەرۆيسى, كلينينگتىك قىزمەتتەر جانە تۋريستىك مارشرۋتتاردى ۇيىمداستىرۋ سىندى كاسىپتەرىن دامىتۋعا جۇمسايتىن بولادى.
وبلىس اكىمىنىڭ گرانتىنا جاڭاارقا اۋدانىنان بەكمۇرات الپىسوۆ, ەرقانات نۇرعالي, مەيرامبەك سالىقپاەۆ, بۇقار جىراۋ اۋدانىنىڭ وكىلدەرى جالعاس قابىلقايروۆ, تادەي سامسونوۆ, ۇلىتاۋ اۋدانىنىڭ جاس كاسىپكەرلەرى ساعادات مۇحامبەتوۆ, شەت اۋدانىنان سايا ولجاتاي, الىشەر سەرىكباەۆ, نۇرا اۋدانىنىڭ تۇرعىندارى قانات ابدىعاپار, اناستاسيا قالاەۆا يە بولدى.
قاراعاندى وبلىسى