سەنبى, 15 ماۋسىم 2013 1:08
بيىلعى جىلدىڭ تامىز ايىندا العاش رەت وتكەلى وتىرعان اۋداندىق ماڭىزى بار قالالار, اۋىلدىق وكرۋگتەر, اۋىلدىق وكرۋگتىڭ قۇرامىنا كىرمەيتىن كەنتتەر مەن اۋىلدار اكىمدەرىنىڭ سايلاۋى ەلدىڭ قوعامدىق-ساياسي ومىرىندەگى ەلەۋلى وقيعا بولعالى تۇر.
سەنبى, 15 ماۋسىم 2013 1:08
بيىلعى جىلدىڭ تامىز ايىندا العاش رەت وتكەلى وتىرعان اۋداندىق ماڭىزى بار قالالار, اۋىلدىق وكرۋگتەر, اۋىلدىق وكرۋگتىڭ قۇرامىنا كىرمەيتىن كەنتتەر مەن اۋىلدار اكىمدەرىنىڭ سايلاۋى ەلدىڭ قوعامدىق-ساياسي ومىرىندەگى ەلەۋلى وقيعا بولعالى تۇر.
سوندىقتان ونى بىلىكتىلىكپەن ۇيىمداستىرۋعا بايلانىستى شارالار بۇل كۇندە وڭىرلەردە جان-جاقتى جۇرگىزىلۋ ۇستىندە. كەشە قاراعاندىدا اۋدان, قالا اكىمدەرى, اۋداندىق, قالالىق ءماسليحاتتاردىڭ حاتشىلارى, اۋداندىق, قالالىق سايلاۋ كوميسسيالارىنىڭ توراعالارى مەن حاتشىلارى, وبلىستىق سايلاۋ كوميسسياسىنىڭ مۇشەلەرى, قۇقىق قورعاۋ, سالىق ورگاندارى وكىلدەرىنىڭ قاتىسۋىمەن وتكەن سەمينار-كەڭەس وسى ماسەلەگە ارنالدى.
بۇل باسقوسۋعا ورتالىق سايلاۋ كوميسسياسىنىڭ توراعاسى قۋاندىق تۇرعانقۇلوۆ كەلىپ قاتىستى. ونى وبلىس اكىمى باۋىرجان ابدىشەۆ اشىپ, ايماقتاعى دايىندىق جۇمىستارىمەن تانىستىردى. جينالعاندار الدىندا قۋاندىق تۇرعانقۇلوۆ ءسوز سويلەپ, اتالعان دەڭگەيدەگى سايلاۋدىڭ ماڭىزىنا توقتالدى. سونداي-اق ۇيىمداستىرىلۋى مەن وتكىزىلۋى تالاپقا ساي بولۋ ءۇشىن بارلىق بۋىننىڭ ورتاق ماقساتتاعى بىرلەسكەن قيمىلى مەن جوعارى جاۋاپكەرشىلىگى قاجەتتىلىگىن اتادى. اۋىلدىق وكرۋگتەر مەن شاعىن كەنتتەر اكىمدەرىن سايلاۋ ناۋقانىنىڭ اشىقتىق جاعدايىندا بولۋىنا جانە تازا وتۋىنە بارىنشا مۇمكىندىك جاسالۋى قاجەتتىگىنە باسا نازار اۋدارتتى.
سەمينار-كەڭەستە ورتسايلاۋكوم باسشىسى الداعى سايلاۋ ناۋقانى بارىسىندا بارلىعى اۋىلدىق وكرۋگ قۇرامىنا كىرمەيتىن قازاقستان رەسپۋبليكاسىنىڭ اۋداندىق ماڭىزى بار قالالارىنىڭ, اۋىلدىق وكرۋگتەرىنىڭ, كەنتتەرى مەن اۋىلدارىنىڭ 2458 اكىمى, ياعني ەلدەگى بارلىق اكىمدەردىڭ جالپى سانىنىڭ 91,5%-ى سايلاناتىنىن اتاپ ءوتتى. سايلاۋ وتكىزۋگە تىكەلەي 160 اۋداندىق جانە 28 قالالىق اۋماقتىق سايلاۋ كوميسسياسى قاتىسادى. ولارداعى سايلاۋ كوميسسيالارى مۇشەلەرىنىڭ سانى 1316 ادامدى قۇرايدى. سايلاۋ ناۋقانىندا تاڭداۋشىلار رەتىندە 188 ءماسليحاتتان 2602 دەپۋتات قاتىسادى. اكىمدىككە كانديداتتار ۇسىنۋدى اۋدان اكىمى جەرگىلىكتى قوعامداستىقپەن كونسۋلتاتسيالاردان كەيىن بالاما نەگىزدە جۇزەگە اسىرادى. وسى كونسۋلتاتسيالاردى جۇرگىزۋ ءتارتىبى قاعيدالاردا كورسەتىلمەيدى.
بۇگىندە ۇمىتكەرلەردىڭ ءومىربايانى مەن ەڭبەك جولى جۇرتشىلىققا تانىستىرىلۋدا.ولار ارقايسىسىن جاقسى بىلۋلەرى, دۇرىس تاڭداۋ جاساي الۋلارى كەرەك. بۇل باعىتتاعى ءىس-شارالار تاعى دا وسىنداي جيىندار ارقىلى شيراتىلا تۇسەدى. سايلاۋلار وتكىزۋ جونىندە ۇيىمداستىرۋشىلىق قابىلەتى مەن تاجىريبەسى مول ەرقارا ايماعامبەتوۆ جەتەكشىلىك ەتەتىن وبلىستىق سايلاۋ كوميسسياسى وسى جولى جۇكتەلگەن ءمىندەت بيىگىنەن كورىنەتىندىگىنە سەنىم ءبىلدىرىلدى.
تامىز ايىنىڭ باسىندا وتەتىن سايلاۋعا جەرگىلىكتى جۇرتشىلىق ىقىلاسى كۇننەن-كۇنگە ءوسىپ وتىر.
ايقىن نەسىپباي,
«ەگەمەن قازاقستان».
قاراعاندى.