تارازدا اۋىل ايەلدەرىنىڭ فورۋمى ءوتتى

تاراز تورىندە وتكەن جامبىل وبلىسىنىڭ اۋىل ايەلدەرى فورۋمىنا ءوڭىردىڭ 10 اۋدانىنان 150 ايەل قاتىستى. اۋەلى وبلىستىق ىشكى ساياسات باسقارماسىنىڭ باسشىسى داۋىل بەيسەنقۇلوۆتىڭ جۇرگىزۋىمەن ءباسپاسوز بريفينگى ءوتتى. بريفينگكە تاراز قالاسىنا ارنايى كەلگەن قازاقستان رەسپۋبليكاسى پارلامەنتى سەناتىنىڭ دەپۋتاتى, قر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا توراعاسىنىڭ ورىنباسارى لياززات سۇلەيمەن, قازاقستان رەسپۋبليكاسى پارلامەنتى ءماجىلىسىنىڭ دەپۋتاتى, رەسپۋبليكالىق اۋىل ايەلدەرى فورۋمىنىڭ ۇيىمداستىرۋ كوميتەتىنىڭ ءتورايىمى مايرا ايسينا جانە «جاسىل ەكونوميكا جانە G-Global-دى دامىتۋ كواليتسياسى» زاڭدى تۇلعالار بىرلەستىگىنىڭ باسقارما توراعاسى, قر پرەزيدەنتى جانىنداعى جاسىل ەكونوميكاعا ءوتۋ كەڭەسىنىڭ مۇشەسى سالتانات راقىمبەكوۆا قاتىسىپ, جۋرناليستەردىڭ سۇراقتارىنا جاۋاپ بەردى. حالىق قالاۋلىلارى فورۋمنىڭ ماقساتى – اۋىلدى جەرلەردە كوپشىلىككە ۇلگى بولاتىن ايەلدەردى حالىققا تانىستىرۋ, سونىمەن قاتار اۋىل ايەلدەرىن بيزنەسكە باۋلۋ ەكەنىن ايتتى.

اۋىل ايەلدەرىن قولداۋ ماقساتىندا ۇيىمداستىرىلعان فورۋمدى جامبىل وبلىسى اكىمىنىڭ ورىنباسارى مۇراتحان شۇكەەۆ ءسوز سويلەپ اشىپ, فورۋم جۇمىسىنا ساتتىلىك تىلەدى. ء«داستۇرلى دالا مادەنيەتىندە قازاق ايەلدەرى وزدەرىنىڭ وتباسىلىق قانا ەمەس, قوعام مۇشەسى رەتىندەگى الەۋەتىن ءتۇرلى سالالاردا كورسەتىپ كەلەدى. قازاقى ورتادا ءوز مۇددەسىنەن گورى وتباسىلىق مۇددەنىڭ جوعارى تۇرۋى ايەلدەردىڭ قوعامدىق-الەۋمەتتىك بەلسەندىلىگىنە ەش كەدەرگى بولعان جوق. كەرىسىنشە, قازاق دالاسىندا اتاعى جالپاق جۇرتقا جايىلعان بەلگىلى انشىلەر, اقىندار مەن مايتالمان كۇيشىلەر, پاراساتىمەن ۇلگى بولعان دانالار, ەرلىك كورسەتكەن باتىر انالار بولدى. كيەلى اۋليەاتا جەرى قاشاندا ارداقتى قىزدارىن, اتاقتى ەڭبەك مايتالمانى اتانعان ايەل ازاماتتارىن ماقتان ەتەدى», دەدى مۇراتحان شۇكەەۆ. سونىمەن قاتار, اكىمنىڭ ورىنباسارى اۋىلدى وركەندەتۋ مەملەكەتتى دامىتۋدىڭ نەگىزگى شارتتارىنىڭ ءبىرى ەكەنىن, بۇل رەتتە وبلىس اكىمدىگى تاراپىنان اۋىلدى جەرلەردە تۇراتىن كوپبالالى وتباسىلارعا جانە التىن, كۇمىس القا يەگەرلەرىنە, ىسكەر ايەلدەرگە ءتيىستى قولداۋلار كورسەتىلىپ جاتقانىن جەتكىزدى. بۇدان كەيىن ءسوز العان دەپۋتات مايرا ايسينا ەلىمىزدە بولىپ جاتقان جاڭاشىلدىقتاردى اۋىلدى جەرلەرگە جەتكىزۋ ماڭىزدى ەكەنىن, اۋىل ايەلدەرى ءۇشىن كاسىپپەن اينالىسۋعا مۇمكىندىك جاساۋ كەرەكتىگىن ايتتى. حالىق قالاۋلىسىنىڭ ايتۋىنشا, 7 جىل ىشىندە 51 ايەل كاسىپپەن اينالىسۋ ءۇشىن 4000 اقش دوللار كولەمىندە نەسيە العان. ەندىگى كەزەكتە دەپۋتات ۇكىمەت تاراپىنان 5000 مىڭ ايەلگە 500 مىڭ تەڭگەدەن نەسيە بەرىلەتىنىن جەتكىزدى. ال, سەناتور لياززات سۇلەيمەن ءوز سوزىندە وسى ۋاقىتقا دەيىن ەلىمىزدە ىسكەر ايەلدەردى قولداۋ ماقساتىندا كوپتەگەن شارالاردىڭ وتكەنىن, ارقاشان اۋىل ايەلدەرىن قولداۋ كەرەكتىگىن ايتسا, سالتانات راقىمبەكوۆا بۇگىندە اۋىل تۇرعىندارىنا مەملەكەتتىك دەڭگەيدە كوڭىل ءبولىنىپ جاتقانىن اڭگىمەلەدى. سونىمەن قاتار, پلەنارلىق جينالىستا جامبىل اۋدانى اكىمىنىڭ ورىنباسارى ۇمىتكەن نايمانوۆا, جامبىل وبلىستىق تۋريزم باسقارماسىنىڭ باسشىسى قارلىعاش ارالبەكوۆا جانە جامبىل وبلىستىق كاسىپكەرلىك جانە يندۋستريالدى-يننوۆاتسيالىق دامىتۋ باسقارماسىنىڭ باسشىسى جەڭىس ساريەۆ ءسوز سويلەپ, پىكىرلەرىمەن ءبولىستى.

بۇدان كەيىن فورۋم پلەنارلىق وتىرىسپەن جالعاستى. پلەنارلىق وتىرىستا «جاسىل ەكونوميكا جانە G-Global-دى دامىتۋ كواليتسياسى» زتب باسقارما توراعاسى سالتانات راقىمبەكوۆا «ايەلدەر كاسىپكەرلىگىن دامىتۋ جانە الەۋمەتتىك ماسەلەلەردى شەشۋ ارقىلى اۋىلدا ءومىر ءسۇرۋ ساپاسى مەن ءال-اۋقاتىن ارتتىرۋ» تاقىرىبىندا بايانداما جاساسا, جامبىل وبلىستىق كاسىپكەرلىك جانە يندۋستريالدى-يننوۆاتسيالىق دامىتۋ باسقارماسى باسشىسىنىڭ ورىنباسارى جانداۋلەت كەنجەبەكوۆ وڭىردەگى كاسىپكەر ايەلدەرگە كورسەتىلىپ وتىرعان قولداۋلار جونىندە اڭگىمەلەدى. ءوز سوزىندە جامبىل اۋدانى اكىمىنىڭ ورىنباسارى ۇمىتكەن نايمانوۆا اۋدانداعى اۋىل ايەلدەرىنە بيزنەس جۇرگىزۋگە قولداۋ كورسەتىلىپ وتىرعانىن جەتكىزسە, وبلىستىق تۋريزم باسقارماسىنىڭ باسشىسى قارلىعاش ارالبەكوۆا وڭىردە اگروتۋريزمدى دامىتۋداعى اۋىل ايەلدەرىنىڭ ۇلەسى تۋرالى ايتتى. ءوز سوزىندە «قازاقستان ايەلدەرىنىڭ اگرارلىق وداعى» زتب اتقارۋشى ديرەكتورى ءلاززات اسقاروۆا اۋىل ايەلدەرى اراسىنداعى كوشباسشىلار تۋرالى اڭگىمەلەدى.

وڭىردە تۇڭعىش رەت ءوتىپ وتىرعان جامبىل وبلىسى اۋىل ايەلدەرى فورۋمىنىڭ ءداستۇرلى ەرەكشەلىگى – «مەنىڭ جەتىستىگىمنىڭ تاريحى» شەرۋىنىڭ ۇيىمداستىرىلۋى بولدى. شەرۋدى «ناعىز پاتريوتتار» قوعامدىق بىرلەستىگىنىڭ ءتورايىمى, «مەنىڭ جەتىستىگىمنىڭ تاريحى – 2018» شەرۋى نوميناتسياسىنىڭ لاۋرەاتى عاليا ابيتاەۆا ءسوز سويلەپ اشتى. بۇدان كەيىن سارىسۋ اۋدانى «دياس» شارۋا قوجالىعىنىڭ ءتورايىمى مەيرامگۇل قاراكەسەكوۆا, قورداي اۋدانى «باينۇر» شارۋا قوجالىعىنىڭ باسشىسى ايمان ءاشىموۆا, تالاس اۋدانى «نۇربول» شارۋا قوجالىعىنىڭ جەتەكشىسى عاليا جاقاي جانە وزگە دە ىسكەر ايەلدەر ءسوز الىپ, جەتىستىكتەرىمەن ءبولىستى. فورۋم اياسىندا وڭىردەگى كاسىپكەر ايەلدەر تاۋارلارىنىڭ كورمەسى ۇيىمداستىرىلدى.

ءوز كەزەگىندە «Coca-Cola بەلەستەرى» –  تابىسقا اپارار جول»  شەبەرلىك ساعاتى ءوتتى. پراكتيكالىق سەسسيا بارىسىندا «جاسىل ەكونوميكانى» قولداۋ جانە G-Global دامىتۋ كواليتسياسى» زتب اتقارۋشى ديرەكتورى اسحات سۇلەيمەنوۆ جۇمىسسىز جانە ءوزىن-ءوزى جۇمىسپەن قامتىعان ايەلدەردى قولداۋ جونىندەگى الەۋمەتتىك جوبانى ىسكە اسىرۋ تۋرالى ايتسا, «قازاقستان ايەلدەرىنىڭ اگرارلىق وداعى» زتب اتقارۋشى ديرەكتورى ءلاززات اسقاروۆا ء«داستۇرلى وتباسىلىق قۇندىلىقتار جانە قازىرگى زامانعى گەندەرلىك ساياسات: جانجال نەمەسە ءوزارا تولىقتىرۋ» ترەنينگىن وتكىزدى. بۇدان كەيىن فەرمەرلەردىڭ قاتىسۋىمەن اۋىل شارۋاشىلىعىمەن اينالىساتىنداردى كرەديتتەۋ تۋرالى سەمينار ءوتتى. فورۋم اعىمداعى جىلى 7-8 قاراشا كۇندەرى نۇر-سۇلتان قالاسىندا وتەتىن قازاقستان اۋىل ايەلدەرىنىڭ ەكىنشى فورۋمىنا دەلەگاتتاردى سايلاۋمەن قورىتىندىلاندى. فورۋمعا قاتىسقان بارشا ازاماتتار «كونە تاراز» تاريحي-مادەني كەشەنىندەگى اشىق اسپان استىنداعى مۋزەيدىڭ جۇمىسىمەن تانىستى.

جامبىل وبلىسى