قازاقستاننىڭ قىتايداعى ەلشىسى شاحرات نۇرىشەۆ قحر سىرتقى ىستەر ءمينيسترىنىڭ ءبىرىنشى ورىنباسارى لە يۋيچەنمەن كەزدەستى.
تاراپتار ەكى ەل اراسىنداعى ساياسي, ەكونوميكالىق جانە مادەني-گۋمانيتارلىق سالالارداعى ىنتىماقتاستىقتىڭ اعىمداعى جاي-كۇيى مەن كەلەشەكتەرىن, سونداي-اق جوعارى جانە بيىك دەڭگەيلەردە قول جەتكىزىلگەن ۋاعدالاستىقتاردى ىسكە اسىرۋ باعىتتارىن تالقىلادى.
ەرەكشە نازار قىركۇيەك ايىندا قر پرەزيدەنتى قاسىم-جومارت توقاەۆتىڭ قحر-عا العاشقى مەملەكەتتىك ساپارىنا دايىندىق ماسەلەلەرىنە اۋدارىلدى. ءوز كەزەگىندە, قىتايلىق ديپلومات مەملەكەت باسشىسىنىڭ قازاقستان-قىتاي قاتىناستارىنىڭ قالىپتاسۋى مەن دامۋىنا قوسقان ۇلەسىنە جوعارى باعا بەردى.
سونداي-اق, اعىمداعى جىلدىڭ ەكىنشى جارتىسىندا وتكىزىلۋى جوسپارلانعان كوپجاقتى حالىقارالىق ءىس-شارالار كۇنتىزبەسى مەن ءوزارا ساپارلار كەستەسى تالقىلاندى.
قازاقستان-قىتاي قارىم-قاتىناستارىنىڭ جان-جاقتى ستراتەگيالىق ارىپتەستىگىنىڭ وڭ سەرپىنىن ساقتاۋ ماقساتىندا ساياسي, پارلامەنتارالىق, پارتياارالىق, ۇكىمەتارالىق جانە ۆەدومستۆوارالىق تۇراقتى بايلانىستاردى دامىتۋ تۋرالى ۋاعدالاستىققا قول جەتكىزىلدى.