اقتوبە وبلىسىنىڭ اكىمى وڭداسىن ءورازاليننىڭ تاعايىنداعان 100 وقۋ گرانتىنىڭ يەگەرلەرىن انىقتاۋ بويىنشا كوميسسيا وتىرىسى ءوتتى. ايماق باسشىسىنىڭ توراعالىعىمەن بولعان جيىنعا وبلىس اكىمىنىڭ ورىنباسارى, كوميسسيا مۇشەلەرى, باسقارما باسشىلارى قاتىستى. بۇل تۋرالى اقتوبە وبلىسى اكىمىنىڭ ءباسپاسوز قىزمەتى حابارلادى.
وبلىس اكىمىنىڭ وڭىردەگى سۇرانىسقا يە ماماندىقتارعا ارنايى بولگەن 100 گرانتىنا جالپى 269 ۇمىتكەر قۇجات تاپسىرعان. ولاردىڭ 77-ءسى اتالعان گرانتقا يە بولدى. اقتوبە وبلىسىنا قاجەتتى 15 ماماندىق بويىنشا جوو-دا ءبىلىم الاتىن بولادى. ال, قالعان 23 گرانت رەزيدەنتۋرا باعىتى بولعاندىقتان ناتيجەسى الداعى تامىزدىڭ 25-نەن سوڭ انىقتالادى. ءبىلىم باسقارماسى باسشىسىنىڭ مىندەتىن اتقارۋشى گۇلناز سۇلەيمەنوۆا بيىلعى جىلى قۇجات تاپسىرعان ۇمىتكەرلەردىڭ ۇبت-دان جيناعان بال كورسەتكىشتەرى وتە جوعارى ەكەنىن ايتادى. سوندىقتان دا كوميسسيا مۇشەلەرىنە گرانتتى ءبولۋ وڭايعا سوقپادى. ماسەلەن, جالپى مەديتسينا ماماندىعىنا تۇسۋگە نيەت بىلدىرگەن 94 بالانىڭ 68-ءىڭ بالى 100 دەن جوعارى. وبلىس اكىمىنىڭ مەديتسينا ماماندىعىنا بولگەن 10 گرانتى 123-124 بال جيناعان 10 بالاعا بۇيىردى. سونىمەن قاتار, ونەر, ينفورماتيكا, ءدىن ماماندىقتارىنا تالاپكەرلەر قۇجات تاپسىرماعاندىقتان, كوميسسيا قۇرامى ارتىلعان گرانتتاردى ءوتىنىش نەعۇرلىم كوپ تۇسكەن, ءارى وڭىرگە قاجەتتى ماماندىقتار سانالاتىن مەديتسينا مەن باستاۋىش جانە پەدوگوگيكا ماماندىقتارىنا ءبولدى.
«ۇبت جيناعان بال كورسەتكىشتەرى جوعارى, ءارى ءبىلىم الۋعا قۇشتار بالالارعا قولداۋ كورسەتىلۋى قاجەت. ءبىلىمدى ازاماتتار قاشاندا قوعامعا قاجەتتى, سوندىقتان دا ارتىلعان ءۇمىتتى اقتايدى دەگەن سەنىمدەمىن »,-دەدى وڭداسىن ورازالين.
سونداي-اق, مەملەكەتتەن اتاۋلى الەۋمەتتىك كومەك الۋشى, جانە كوپبالالى وتباسىنىڭ بالالارىنا ارنالعان قر ۇلتتىق قورىنىڭ نىسانالى ترانسفەرت ەسەبىنەن بولىنگەن 180 گرانتىنا 154 بالا قۇجات تاپسىرعان. قۇجاتتارى مەن جيناعان بال كورسەتكىشتەرى بويىنشا تالاپقا ساي بولعان 120 بالا وسى گرانتقا يە بولدى. دەگەنمەن كوميسسيا مۇشەلەرى قالعان 34 بالانىڭ اتاۋلى الەۋمەتتىك كومەك الاتىن جانە كوپ بالالى وتباسىدان شىققانىن ەسكەرىپ, ولاردىڭ جوو-دا ءبىلىم الۋىنا شەشىم قابىلدادى.