اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە GMAT فورماتىنداعى, ياعني ماگيستراتۋرانىڭ ءبىلىم بەرۋ باعدارلامالارىنا كەشەندى تەستىلەۋدىڭ تانىستىرىلىمى ءوتتى.
ءىس-شاراعا ۋنيۆەرسيتەت رەكتورى تاكير بالىقباەۆ, سىبايلاس جەمقورلىققا قارسى ءىس-قيمىل اگەنتتىگىنىڭ الماتى قالاسى بويىنشا دەپارتامەنتىنىڭ باستىعى قايرات سۇنتاەۆ, ونىڭ ءبىرىنشى ورىنباسارى دانيار تاۋمۇرات, ارنايى مونيتورينگتىك توپتىڭ مۇشەلەرى, قازاقستان رەسپۋبليكاسى ءبىلىم جانە عىلىم مينيسترلىگىنىڭ جانە ۇلتتىق تەستىلەۋ ورتالىعىنىڭ وكىلدەرى, ۋنيۆەرسيتەت باسشىلىعى مەن قابىلداۋ كوميسسياسىنىڭ قىزمەتكەرلەرى قاتىستى.
ەمتيحان الدىنداعى تەستىلەۋدىڭ اشىقتىعىن جانە تەستىلەۋ نورمالارىنىڭ بۇزىلماۋىن قامتاماسىز ەتۋ ماقساتىندا رەكتور تاكير بالىقباەۆ الماتى قالاسى بويىنشا سىبايلاس جەمقورلىققا قارسى كۇرەس قىزمەتى وكىلدەرىن, ارنايى مونيتورينگتىك توپتىڭ مۇشەلەرىن قر ءبىلىم جانە عىلىم مينيسترلىگى كوميسسياسىنىڭ قۇرامىمەن, تەستىلەۋ جانە كوميسسيا قۇرامىنىڭ جۇمىسىمەن تانىستىرىپ, اۋديتوريالاردا ورناتىلعان بەينەباقىلاۋعا ارنالعان تەحنيكالىق قۇرالداردى ۇسىندى.
تەستىلەۋ بارىسىن اشقان اباي اتىنداعى قازۇپۋ-دىڭ وقۋ ءىسى جونىندەگى پرورەكتورى اسان ساتمىرزاەۆ بارلىق تالاپكەرلەردى تەستىلەۋ ەرەجەلەرىنە ەنگىزىلگەن وزگەرىستەر تۋرالى حاباردار ەتىپ, GMAT (Graduate Management Admission Test) فورماتى تۋرالى اقپارات بەردى, سونىمەن قاتار ەمتيحان تاپسىرۋشىلارعا ساتتىلىك تىلەدى.
بيىل العاش رەت GMAT فورماتىنداعى تەستىلەۋ ۇدەرىسىن ءبىلىم جانە عىلىم مينيسترلىگىنىڭ كوميسسياسىمەن جانە ۇلتتىق تەستىلەۋ ورتالىعىمەن بىرگە ارنايى مونيتورينگتىك توپتىڭ مۇشەلەرى باقىلايتىن بولادى. ۇمىتكەرلەردىڭ اتا-انالارى كەشەندى تەستىلەۋ بارىسىن ونلاين رەجيمىندە وقۋ عيماراتىنىڭ سىرتىندا ورناتىلعان ەكراندار ارقىلى باقىلاي الادى. سونىمەن قاتار, اۋديتوريالاردا تالاپكەرلەرگە ىڭعايلى بولۋ ءۇشىن بارلىق جاعداي جاسالعان.
تەستىلەۋ كەزىندە جوعارى بالل جيناعان تالاپكەرلەر گرانتقا يە بولادى جانە وقۋ ءۇشىن ۋنيۆەرسيتەتتى وزدەرى تاڭدايدى. ءبىلىم سالاسىنداعى بۇل باستاما مەملەكەتتىك گرانت ورىندارىن تابىستاۋ ۇدەرىسىنىڭ اشىقتىعى مەن ايقىندىلىعىن, سونىمەن قاتار ۋنيۆەرسيتەتتەردىڭ باسەكەگە قابىلەتتىلىگىن ارتتىرادى.
الماتى