ابايدىڭ اندەرى شىرقالىپ, كۇيلەرى تارتىلدى, شىعارمالارىنان ۇزىندىلەر وقىلدى.
ۇلى ابايدىڭ تۋعان كۇنى قارساڭىندا وسكەمەندەگى س.امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتىنىڭ باستاماسىمەن اباي اۋدانى اكىمدىگىنىڭ قولداۋىمەن «اباي ەلىنە تاعزىم» اتتى فورۋم ءوتتى.
ۋنيۆەرسيتەتتىڭ ءباسپاسوز قىزمەتىنىڭ حابارلاۋىنشا, فورۋمعا وقۋ ورنىنىڭ رەكتورى مۇحتار تولەگەن باستاعان وقىتۋشىلار مەن ستۋدەنتتەر, جيىنى 72 ادام وسكەمەننەن ارنايى كەلىپتى. شارا بارىسىندا ابايدىڭ اندەرى شىرقالىپ, كۇيلەرى تارتىلدى, شىعارمالارىنان ۇزىندىلەر وقىلدى.
سونداي-اق, «شقو-نىڭ قاسيەتتى جەرلەرىن زەرتتەۋدەگى س.امانجولوۆ اتىنداعى شقمۋ-دىڭ ۇلەسى» كورمەسى, «اباي وقۋلارى» ءوتىپ, ۋنيۆەرسيتەتىشىلىك «اباي وقۋلارى» سايىسىنىڭ جەڭىمپازدارى ماراپاتتالدى.
ابايتانۋ سالاسىنا ەڭبەگى سىڭگەن بىرقاتار ازاماتتارعا ۋنيۆەرسيتەتتىڭ عىلىمي كەڭەسى شەشىمىمەن «اباي» مەدالى تاپسىرىلدى. رەسمي شارالاردان سوڭ اباي رۋحىنا, اتا-بابالار ارۋاعىنا قۇران باعىشتالىپ, 300-گە تارتا ادامعا اس بەرىلدى. اباي, شاكارىم مۇراجايلارىنا ساياحات جاسالىپ, اباي ەلى, ۇلى تۇلعالارى, اباي, شاكارىم, مۇحتار مۇراسىنا قاتىستى تاعىلىمدى اڭگىمەلەر ايتىلدى.
«فورۋمنىڭ ماقساتى – ەلباسىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسى اياسىندا اباي قۇنانباەۆ ەسىمىن ۇلىقتاۋ, ۇلىلار ولكەسىنە تاعزىم ەتۋ, ستۋدەنت جاستار اراسىندا اباي مۇراسىن ناسيحاتتاۋ. س.امانجولوۆ اتىنداعى شقمۋ ۇجىمىنىڭ يگى باستاماسىن باسقا وقۋ ورىندارى جالعاستىرىپ, «اباي ەلىنە تاعزىم» كيەلى كەرۋەنى ابايدىڭ كەلەر زاماندارعا رۋحاني ساپارىن جالعاستىرا بەرسىن!» دەيدى ۋنيۆەرسيتەت رەكتورى م.تولەگەن.
شىعىس قازاقستان وبلىسى