شىعارماشىلىق ادامى ءۇشىن تابيعاتتان اسقان تالىمگەر ۇستاز جوق. ول اسىرەسە قيالىمەن جارىسقا تۇسكەن قىلقالام يەسى ءۇشىن تاپتىرماس شابىت قاينارى دەسەك, ارتىق ايتقاندىق ەمەس. تابيعات-انانىڭ قىلاۋ تۇسپەگەن تۇما سۇلۋلىعىن جان الەمىمەن ءتۇيسىنىپ, كوكىرەك كوزىمەن كورە بىلگەن سۇڭعىلا سىرلى ءبىر توپ تالانتتى سۋرەتشىنىڭ ورتاق تاقىرىپقا ورايلاستىرىلعان «ازيا شىڭدارى» اتتى حالىقارالىق سۋرەت كورمەسى سوزىمىزگە ايعاق.
ەلوردانىڭ دوستىق ۇيىندە قالالىق قازاقستان حالقى اسسامبلەياسىنىڭ قولداۋىمەن وتكەن ەۋرازيالىق شىعارماشىلىق گيلدەياسىنىڭ (لوندون) ايتۋلى جوباسى قىلقالام ءتىلىن ءتۇسىنىپ, قۇپياسىن وقي بىلگەن ءار تاماشالاۋشى ءۇشىن ونەردىڭ ۇلكەن تارتۋى بولعانى ءسوزسىز.
«ازيا شىڭدارى» – نازيرا جەنىشبەكوۆا-بارريونۋەۆا (پاريج), Guli Bost (لوندون) جانە بيبىگۇل سماقوۆا (الماتى) سىندى سۋرەتشىلەردىڭ بىرلەسكەن جوباسى. باس شاھار تۇرعىندارىن ەۋرازيالىق شىعارماشىلىق گيلدەياعا مۇشە سۋرەتشىلەر توبىنىڭ ونەر ورىسىمەن تانىستىرۋ جانە جاس تالانتتاردى قولداۋ ماقساتىندا ۇيىمداستىرىلعان شارانىڭ اشىلۋ سالتاناتىندا ءسوز العان كورمە اۆتورلارىنىڭ ءبىرى, الماتىلىق بەلگىلى قىلقالام يەسى بيبىگۇل سماقوۆا اسەرىمەن ءبولىسىپ, جالپى كورمەنىڭ مازمۇنىن تانىستىرىپ ءوتتى.
– بۇگىن سۋرەتشىلەر قاۋىمى ءۇشىن ەرەكشە وقيعا. ناقتىراق ايتساق, بۇل كورمەدە سىزدەر بوياۋ بولمىسىن ۇعۋعا ۇمتىلعان نازىكجاندى قىلقالام يەلەرىنىڭ ىلە الاتاۋى مەن ىستىقكولگە بارعان ساپارىنىڭ شىعارماشىلىق جەمىسىنە باعا بەرەسىزدەر. قازاق پەن قىرعىز ەلى سۋرەتشىلەرىنىڭ قيال قارىمىن ءبىر باعىت پەن ورتاق ارنادا توعىستىرۋدى كوزدەگەن ايتۋلى پلەنەر-جوبا باۋىرلاس حالىقتاردىڭ ونەر قورجىنىنا ۇلكەن ولجا سالدى دەپ بىلەمىز. شىلدە ايىنىڭ 1-ءى مەن 6-سى ارالىعىندا ىستىقكولدىڭ وڭتۇستىك جاعالاۋلارىنا شىعارماشىلىق ساپارمەن بارعان ەدىك. سول ساپار ءبىز ءۇشىن وتە جەمىستى بولدى. تابيعاتتىڭ سۇلۋ كورىنىستەرىنەن تاۋسىلماس شابىت العانىمىز سونشالىق, بىردەن بىلەك سىبانىپ جۇمىسقا كىرىستىك. ناتيجەسى – مىنە, كوز الدىلارىڭىزدا. اراعا تۋرا ءبىر اي ۋاقىت سالىپ, ىلە الاتاۋى سىلەمدەرىنەن العان ۇمىتىلماس اسەرىمىزدى كورمەگە شىعارىپ وتىرمىز. اۆتورلاردىڭ ءبىرى ءوزىم بولعاندىقتان, اقىلداسا كەلە اتالعان كورمەنىڭ تۇساۋكەسەرىن قازاقستاندا دا وتكىزۋدى ۇيعاردىق, – دەدى سۋرەتشى پلەنەر ساپارىنىڭ ايشىقتى اسەرىمەن ءبولىسىپ.
قىلقالام يەسى اتاپ وتكەندەي, ايتۋلى پلەنەرلىك ساپار – تابيعات اتموسفەراسىن مەيلىنشە سەزىنىپ, ونى قالاي ءدال جانە جاندى جەتكىزۋ كەرەگىن تۇسىندىرۋگە نەگىزدەلگەن جوبا. ياعني, تابيعاتتىڭ ءتىرى تۇسىندىرمەسى. سونىڭ ارقاسىندا سۋرەتشى مەن تابيعاتتىڭ اراسىندا بارىنشا شىنايى بايلانىس ورناپ, ونەر تۋىندىلارىنا دەگەن كوزقاراس كوكجيەگى كەڭىپ, تىڭ تاجىريبەلەرگە بارۋعا جان-جاقتى جول اشىلادى. بۇل دەگەنىڭىز – قيال قاناتىندا قالىقتاعان سۋرەتشىلەر ءۇشىن تاپتىرماس رۋحاني ازىق.
ءبىز تاماشالاعان كورمە راسىمەن دە ءوزىنىڭ شىنايى ءھام تابيعاتتىڭ وزىندەي جاندىلىعىمەن, كوز تارتارلىق سۇلۋلىعىمەن ەستە قالدى. كورمەگە ەڭ جاس سۋرەتشى 9 جاسار ايبيكە كۋبانىچبەكوۆانىڭ «سۇيىكتى جاز», «سارقىراما» كارتينالارىمەن بىرگە, وسى قاتارداعى ەڭ ەگدە قىلقالامشى ءمارۋا بايتۇرسىنوۆانىڭ دا ۇزدىك جۇمىستارى قويىلدى.
– ءبىزدىڭ ارامىزداعى ءمارۋا بايتۇرسىنوۆا دەگەن سۋرەتشى 60 جاسىندا العاش رەت قولىنا قىلقالام العان. ول اۋەلى عالامتور ارقىلى كارتينانى لەنتامەن كەستەلەۋدى ۇيرەندى. بۇگىنگى كورمەگە «دالا اۋەنى» اتتى تسيكلدى جۇمىسى قويىلدى. وندا سۋرەتشىنىڭ اناسى – ون ءۇش بالا ءوسىرىپ, جۇزدەن استام نەمەرە سۇيگەن ابزال جان قىمبات اپايدىڭ انالىق كەلبەتى, جالپى قازاقتىڭ بارلىق ۇلتتىق بولمىس, سالت-ساناسى شىنايى بەينەلەنگەن. ءمارۋا اناسىنىڭ بەينەسىن كارتيناعا تۇسىرەردە كيىز, لەنتا, كەسكىندەمە سىندى بىرنەشە تەحنيكانى پايدالانعان. بۇل دا ايتۋلى جۇمىستىڭ ەرەكشەلىگىن ەسەلەي تۇسەدى, – دەپ جوبا اۆتورى بيبىگۇل سماقوۆا كورمەگە قاتىسقان سۋرەتشىلەردىڭ ادامي جانە قولتاڭبالىق ەرەكشەلىكتەرىنە دە توقتالىپ ءوتتى.
اتالعان سۋرەتشىلەردەن بولەك, كورمەدە سونىمەن قاتار ءاسيا بەكىشەۆا, گۇلنار تابانوۆا, ادەليا سەراليەۆا, نۇرىم قينازبەكوۆ, گۇلسەيىم توقباەۆا, ءالفيا مۇحامەديانوۆا سىندى تالانتتى سۋرەتشىلەردىڭ جۇمىستارى دا كوپشىلىك نازارىنا ۇسىنىلدى. سۋرەتشىلەر ءوز كارتينالارىندا ادام مەن قورشاعان ورتا اراسىنداعى ءتىنى ۇزىلمەس بەرىك بايلانىستى, جالپى تابيعاتتىڭ سوزبەن ايتىپ جەتكىزگىسىز تاڭعاجايىپ اسەمدىگىن بەدەرلى بەينەلەيدى.تۇمسا تابيعات سىرى سەزىممەن سۋرەتتەلگەن كوركەم گالەرەيانى قىرعىزستان سۋرەتشىلەر وداعىنىڭ مۇشەسى سىرعا ساراركيەۆا, قازاقستاننىڭ ەڭبەك سىڭىرگەن قايراتكەرى حانىم ايداش, ەتنوديزاينەر ىرزا تۇرسىنزادا باستاعان قىلقالام مەن ديزاين الەمىنىڭ ماماندارى دا تاماشالاپ, جوعارى باعالادى.
كورمەگە كەلۋشىلەر ىلە الاتاۋىنىڭ سۇلۋلىعىن, «ماناس توستاعانى», «اققايناردىڭ شاشىراۋى» جانە «بارىستىڭ كوز جاسى» سارقىرامالارىن, بارسكوون تاۋ شاتقالدارىن, جەتى وگىز سىندى قاسيەتتى مەكەندەر مەن تابيعي ورىنداردى سۋرەتشىلەردىڭ كوزىمەن كورۋگە مۇمكىندىك الدى.
ۇيىمداستىرۋشىلاردىڭ ايتۋىنشا, الدا «ازيا شىڭدارى» كورمەسىنىڭ اۋقىمىن كەڭەيتۋ جوسپارى قولعا الىنىپ, العاشقى جوبالارى جۇيەلەنىپ تە ۇلگەرىپتى. وسى ماقساتتا قازان ايىنىڭ 12-13 جۇلدىزىندا كورمەنى پاريج قالاسىنداعى قازاقستاننىڭ ەلشىلىگىندە كورسەتۋ جۇمىستارىنا دايىندىق قىزۋ ءجۇرىپ جاتىر. جوبا اۆتورلارى پلەنەرلىك ساپارىن قىرعىزستانمەن عانا شەكتەمەي, كەلەشەكتە تاشكەنت پەن مينسكىدە جالعاستىرماق نيەتتە.
ونەرسۇيەر قاۋىم سۇلۋلىق پەن شىنايىلىققا باي جاڭاشىل كورمەنى ەلوردالىق دوستىق ۇيىنەن ەكى اي بويى تاماشالاي الادى.