بەيسەنبى, 28 اقپان 2013 7:55
حيروناو وكۋما, «KIODO News» اقپارات اگەنتتىگى ماسكەۋ بيۋروسىنىڭ ءجۋرناليسى (جاپونيا): – قازاق جەرىندە ەكى كۇنگە سوزىلعان «يران ماسەلەسىنە» قاتىستى الماتى كەلىسسوزدەرى يران مەن «التى ەل» اراسىندا جاڭا بايلانىستاردىڭ اشىلۋىنا جول سالدى دەپ ايتۋعا بولادى. بۇل ساياسي كەزدەسۋ بۇعان دەيىنگى وسى تاقىرىپتىڭ سەڭىن بۇزعانداي. تاراپتار وزدەرىن قىزىقتىراتىن ۇسىنىستاردى ءبىر-بىرىنە وتكىزە ءبىلدى.
بەيسەنبى, 28 اقپان 2013 7:55
حيروناو وكۋما, «KIODO News» اقپارات اگەنتتىگى ماسكەۋ بيۋروسىنىڭ ءجۋرناليسى (جاپونيا): – قازاق جەرىندە ەكى كۇنگە سوزىلعان «يران ماسەلەسىنە» قاتىستى الماتى كەلىسسوزدەرى يران مەن «التى ەل» اراسىندا جاڭا بايلانىستاردىڭ اشىلۋىنا جول سالدى دەپ ايتۋعا بولادى. بۇل ساياسي كەزدەسۋ بۇعان دەيىنگى وسى تاقىرىپتىڭ سەڭىن بۇزعانداي. تاراپتار وزدەرىن قىزىقتىراتىن ۇسىنىستاردى ءبىر-بىرىنە وتكىزە ءبىلدى.
بۇل ماسەلە جونىندە رەسەي ءوزىمەن ارىپتەس باتىس ەلدەرى سەكىلدى يراننىڭ يادرولىق باعدارلامانى بەيبىت ماقساتتا قولدانۋ تالابىن بەرىك ۇستاناتىندىعى ايان. الماتى كەلىسسوزدەرىندە كوپتەگەن پايدالى پىكىرلەر مەن ۇسىنىستار ايتىلدى. يراندىق دەلەگاتسيا قۇرامىنداعى وسى سالانىڭ جاۋاپتى تۇلعالارى مەن ساراپشىلارىنىڭ بۇل جولعى كەلىسسوز جۇرگىزۋ مانەرى بارلىعىمىزدى ورتاق ءتىل تابىسۋعا ءتۇبى قول جەتكىزەمىز دەگەن سەنىمگە جەتەلەدى.
الماتى قالاسىندا وتكەن 3+3 تۇرپاتىنداعى يراننىڭ يادرولىق باعدارلاماسى تاقىرىبىن تەرەڭ قوزعاعان كەلىسسوزدەر جۇمىسىنا ءوزارا ۇنقاتىسۋ الاڭىن ۇسىنعانى ءۇشىن قازاقستانعا جانە ونىڭ پرەزيدەنتى نۇرسۇلتان نازارباەۆقا العىسىمىزدى بىلدىرەمىز. قۋاتى جونىنەن الەمدەگى ءتورتىنشى يادرولىق ارسەنالىنان باس تارتقان ەل رەتىندە قازاقستان بۇل كەلىسسوزگە وزىندىك زور ۇلەسىن قوسا بىلگەندىگىن باسا ايتقىم كەلەدى.
ءساۋىر ايىندا تاعى دا الماتى قالاسىندا بولاتىن كەلەسى كەزدەسۋدەن, ارينە, بارشا ادامزاتقا يگى شەشىم قابىلدانسا دەپ تىلەيمىز. مەنىڭ پىكىرىمشە, الەمنىڭ ءار قالاسىندا وتكىزىلىپ جۇرگەن «يران ماسەلەسى» تەك ساياسي ۇنقاتىسۋ قۇرالى بولىپ قالماي, ناقتى ءبىر شەشىمىن تاباتىن جانە ۋراندى بەيبىت ماقساتتا قولدانۋ ىسىنەن بارلىق ادامزاتقا پايداسى تيەتىن ناتيجەگە جەتەلەيتىن تاجىريبە بولۋى كەرەك دەپ ەسەپتەيمىن.
ايھان زەنگين, يران يادرولىق باعدارلاماسىن زەرتتەۋشى: – الماتىداعى بۇل باسقوسۋ ماسكەۋ كەلىسسوزدەرىنە قاراعاندا وتە ماڭىزدى بولدى. ارينە, بۇل تاقىرىپ ءوزىنىڭ شەگىنە جەتپەۋى سەبەپتى تاعى دا ناقتى شەشىمگە قول جەتكىزىلمەگەنى بارشامىزعا ايان. ءبىر سوزبەن ايتقاندا, بۇل جەڭىمپازدار ويىنى ەمەس, جەڭىلۋشىلەر ويىنى دەۋگە ابدەن بولادى. ەكى تاراپ تا ەرەن ىلگەرىلەۋشىلىككە قول جەتكىزە المادى. بۇل ۇنقاتىسۋدىڭ ۇتقانى – تاراپتار بۇدان كەيىن دە بۇل تاقىرىپتى سىپايى قوزعاۋعا جول اشتى, كەلەسى جولى رەسمي جاعدايدا جىلى كەزدەسۋ مۇمكىندىگىنە يە بولدى.
يراننىڭ يادرولىق باعدارلاماسى تاقىرىبىن سوڭعى 10 جىلدان بەرى تياناقتى زەرتتەپ جۇرگەن ادام رەتىندە الماتى قالاسىندا الداعى وتەتىن كەزدەسۋ بۇدان دا جەمىستىرەك بولادى دەپ سەنىم ارتار ەدىم.
قوناقجاي قازاق ەلىنە كەلەر كەزدە مەن قازاقستاننىڭ يادرولىق قالدىقتار بانكىن جۇزەگە اسىرۋعا مۇددەلى ەكەندىگىن ءبىلدىم. ەگەر بۇل بانك جۇمىس ىستەي باستاسا, يران قازاقستانمەن وسى ماسەلەدە تىعىز قاتىناس ورناتار ەدى. ارينە, بۇل ەۋروپالىق وداق ءۇشىن «يران ماسەلەسىنەن» وزگە تاعى ءبىر «باس قاتىرارلىق» جۇمىس بولادى دەپ ويلايمىن.
يراننىڭ يادرولىق باعدارلاماسى جونىندەگى جان-جاقتى كەلىسسوزدەرگە تىكەلەي مۇرىندىق بولۋ ارقىلى قازاقستان الەمدىك ساياساتتا وزىندىك جاڭا بەينەگە يە بولدى دەپ ايتار ەدىم. الەمدەگى ۇلكەن يادرولىق قارۋدان باس تارتقان ەل رەتىندە قازاقستاندىق دەلەگاتسيا قۇرامىن دا وسىنداي كەلىسسوز الاڭىنان بولاشاقتا كورۋگە الەمدىك ساراپشىلار قۋانا كەلىسەر ەدى دەگىم كەلەدى.
الماتى.