جىل باسىنان بەرى باتىس قازاقستان وبلىسىندا ادام ساۋداسىنا قاتىستى 4 قىلمىستىق وقيعا انىقتالعان. ونىڭ ىشىندە 1 فاكتى جاسوسپىرىمدەردى جەزوكشەلىككە تارتۋ بولسا, 3 وقيعا جەڭگەتايلىقپەن اينالىسۋ بويىنشا تىركەلگەن.
بىرىككەن ۇلتتار ۇيىمى دۇنيەجۇزىلىك ادام ساۋداسىنا قارسى كۇرەس كۇنى دەپ جاريالاعان اتاۋلى كۇنگە وراي باتىس قازاقستان وبلىستىق پوليتسيا دەپارتامەنتى وڭىردەگى ادام ساۋداسىنا قاتىستى قىلمىستىق احۋال تۋرالى مالىمەتتەردى جاريالادى. جوعارىداعى وقيعالارعا قوسا, 2019 جىلدىڭ باسىنان بەرى «قوعامدىق ورىنداردا جىنىستىق سيپاتتاعى قىزمەت ۇسىنۋ ماقساتىندا ءتيىسۋ» دەگەن ايىپپەن اق جايىق وڭىرىندە قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 449 بابى 1 ءبولىمى بويىنشا 17 اكىمشىلىك قۇقىقبۇزۋشىلىق انىقتالعان.
«وسىعان سايكەس باتىس قازاقستان وبلىستىق پوليتسيا دەپارتامەنتى كريمينالدىق پوليتسيا باسقارماسىنىڭ قىزمەتكەرلەرى «ەۋرازيا» ساۋىقتىرۋ كەشەنىندە, «سامال» ءجاسوسپىرىم لاگەرىندە جانە جەتىم بالالار تاربيەلەنەتىن بالالار اۋىلىندا «ادام ساۋداسىنا قارسى بىرگە كۇرەسەيىك!» اتتى ءىس-شارا وتكىزدى. شارانىڭ ماقساتى – جاستار اراسىندا ءتۇسىندىرۋ جۇمىستارىن جۇرگىزىپ, مادەني اعارتۋ جانە ءىس-شارانى اقپاراتتىق-ناسيحاتتاۋ. شاراعا باتىس قازاقستان وبلىستىق ءبىلىم باسقارماسىنىڭ باس مامانى ا. زالمۇقانوۆا جانە ادامداردىڭ قۇقىعىن قورعاۋ جانە زاڭدىلىقتى ساقتاۋ قازاقستاندىق حالىقارالىق بيۋروسى باتىسقازاقستاندىق فيليالىنىڭ ديرەكتورى پ. كوچەتكوۆ قاتىسىپ, تاقىرىپ اياسىندا بالالارعا ءتۇسىندىرۋ جۇمىستارىن جۇرگىزدى. كەيىن وقۋشىلارعا تاعدىر تالكەگىنە ءتۇسىپ, ادامنىڭ ارباۋىندا قالعان قىزدىڭ ءومىرى جونىندە بەينەروليك كورسەتىلدى. شارا سوڭىندا ادام ساۋداسىنىڭ الدىن الۋ ماقساتىنداعى ۇلەستىرمەلى پاراقشالارى تاراتىلدى», دەيدى بقو پد ءباسپاسوز قىزمەتىنىڭ مامانى ءاليا ناۋرىزعاليەۆا.
ايتا كەتەيىك, وبلىس اۋماعىندا «STOP ترافيك» جەدەل-الدىن الۋ ءىس-شاراسى قازاقستان رەسپۋبليكاسى ءىىم نۇسقاۋىنا سايكەس توقسان سايىن ۇيىمداستىرىلادى.
باتىس قازاقستان