سەنبى, 6 ءساۋىر 2013 2:11
جالپى, قۇس, سونىڭ ىشىندە تاۋىق اتاۋلىنى ءوسىرۋ قازاق ءۇشىن جات دۇنيە ەمەس. بىراق قانداي تاۋىق ءوسىرۋ كەرەك جانە ونى نە ءۇشىن وسىرەمىز دەگەن ماسەلەگە كەلگەندە, بۇل تۋرالى كوپ ويلانىپ جاتپايتىندىعىمىز اڭعارىلادى. ال, نەگىزىندە, وسى ءىستى كاسىپ رەتىندە قاراستىراتىن بولساق, تەك تاۋىق وسىرۋمەن عانا ءوز جاعدايىڭىزدى تۇزەتىپ الۋعا بولادى ەكەن. ماماندار سونىڭ ىشىندە, اسىرەسە, برويلەر تاۋىعىن وسىرگەن پايدالى دەپ وتىر.
سەنبى, 6 ءساۋىر 2013 2:11
جالپى, قۇس, سونىڭ ىشىندە تاۋىق اتاۋلىنى ءوسىرۋ قازاق ءۇشىن جات دۇنيە ەمەس. بىراق قانداي تاۋىق ءوسىرۋ كەرەك جانە ونى نە ءۇشىن وسىرەمىز دەگەن ماسەلەگە كەلگەندە, بۇل تۋرالى كوپ ويلانىپ جاتپايتىندىعىمىز اڭعارىلادى. ال, نەگىزىندە, وسى ءىستى كاسىپ رەتىندە قاراستىراتىن بولساق, تەك تاۋىق وسىرۋمەن عانا ءوز جاعدايىڭىزدى تۇزەتىپ الۋعا بولادى ەكەن. ماماندار سونىڭ ىشىندە, اسىرەسە, برويلەر تاۋىعىن وسىرگەن پايدالى دەپ وتىر.
سەبەبى, برويلەر – تەز ءوسىپ جەتىلەتىن, ەتى جۇمساق تا ءدامدى بولىپ كەلەتىن, ازىقتاندىرۋ شىعىندارى ونى وسىرۋشىگە نەعۇرلىم ارزانعا تۇسەتىن تاۋىق ءتۇرى. ادەتتە برويلەر تاۋىعىن 6-9 اپتانىڭ ىشىندە, سالماعى 1,5-2 كيلوعا جەتكەن كەزدە سويىپ, پايدالانادى. برويلەر ەتى ديەتالىق تاعام تۇرىنە جاتادى. ونىڭ ەتىنىڭ قۇرامىندا 22,5 پايىزعا دەيىن بەلوك بولادى. بۇل بەلوكتاردىڭ 92 پايىزى ادام دەنساۋلىعى ءۇشىن وتە پايدالى امين قىشقىلدارىنان تۇرادى.
برويلەر تاۋىقتارىنىڭ مىنا تۇرلەرى قولدان وسىرۋگە قولايلى دەپەسەپتەلەدى:
كورنۋەل تاۋىعى (كورنيش). بۇل تاۋىق ءتۇرى ەڭ العاش مالاي حالقى وسىرەتىن ازيل تاۋىعىن جەرگىلىكتى تاۋىقتارمەن بۋدانداستىرۋ ناتيجەسىندە انگليادا پايدا بولعان.
جۇمىرتقا – ەت باعىتىنداعى پليمۋتروك تاۋىعى. ول العاش رەت اقش-تا پايدا بولعان. بۇل تاۋىق تۇرلەرى شۇبار, اق جانە باسقا دا تۇرلەردى قامتيدى.
سونداي-اق, برويلەر تاۋىعىنىڭ كۋچيندىك يۋبيلەيلىك, پانتسيرلىك, رود-ايلاند, نيۋ-گەمپشير, ءبىرىنشى مامىر تۇقىمدارىن دا پايدالانۋعا بولادى.
برويلەر تاۋىقتارىن كۇتۋ جولدارى. برويلەر تاۋىعىن كۇتۋ ءۇشىن ەڭ الدىمەن ولاردى ورنالاستىراتىن ورىن-جايلاردى تاڭداپ الۋ قاجەت. ورىن-جاي, ءبىزدىڭ تىلمەن ايتقاندا, تاۋىق قورا, مىناداي تالاپتارعا جاۋاپ بەرۋى ءتيىس. ەڭ الدىمەن قورادا تاۋىقتار ەركىن قوزعالا الاتىن كەڭىستىك بولۋى كەرەك. ويتكەنى, اۋا رايىنىڭ قولايسىز جاعدايىندا, اسىرەسە, قىسقى ماۋسىم كەزدەرىندە تاۋىقتار بۇل قورادا تاۋلىك بويى ۇستالادى. ەكىنشىدەن, تاۋىق قورا برويلەردى سىرتقى قولايسىز اۋا رايى جاعدايىنان قورعاي الاتىنداي جىلى دا جارىق بولۋى ءتيىس. سونىمەن قاتار, مۇندا اۋانى تازارتىپ وتىرۋعا مۇمكىندىك بەرەتىن جەلدەتكىشتىڭ بولعانى دا ءجون جانە تازارتۋعا جەڭىل بولۋىن دا ويلاستىرۋ كەرەك.
برويلەر بالاپاندارىن ءوسىرۋ تاسىلدەرى. ادەتتە برويلەر تاۋىقتارىن ءوسىرۋ ءۇشىن ولاردىڭ بالاپانىن برويلەر قۇستارىن وسىرەتىن فابريكالاردان نەمەسە ستانسالاردان ساتىپ الادى. بالاپاندى تۋعان بەتتە, ياعني ءبىر تاۋلىك پەن ءۇش تاۋلىكتىڭ ارالىعىندا ساتىپ العان ءجون. ساتىپ الىنعان بالاپانداردى العاشقى كەزدە تور ىشىندە ۇستايدى. مۇنداي جاعدايدا بالاپاندار جەدەل سالماق قوسادى جانە قيمىل-قوزعالىستارى شەكتەۋلى بولعاندىقتان ازىقتى دا از جەيدى.
توردى ءار ادام ءوزى دە جاساي الادى. ونىڭ ەدەنى مەن الدىڭعى ەسىگىنە جۇمساق شىبىقتاردى پايدالانعان ءجون. ءاربىر بالاپانعا ۇزىندىعى كەمىندە 3 سم. بولاتىن ازىقتاندىرۋ ورنى ءازىرلەنەدى. سونىمەن قاتار, ازىق سالىناتىن قالتاشانىڭ بوس تۇرماۋىن, ياعني وندا ۇنەمى ازىقتىڭ بولۋىن ەسكەرگەن ءجون. توردىڭ ىشىنە بالاپانداردىڭ ىشۋىنە سۋ قۇياتىن ورىن ازىرلەپ قويۋ قاجەت. ول دا سۋدان بوس تۇرماعانى ءجون.
بالاپاندار ءوسىپ جەتىلگەن كەزدە ولاردى تاۋىق قورالارعا جونەلتۋگە بولادى. مۇندا بالاپاندار تەز ءوسىپ جەتىلۋ ءۇشىن تەمپەراتۋرانىڭ تۇراقتى بولعانى ءجون. بالاپانداردى ءجيى-ءجيى ازىقتاندىرىپ وتىرعان جاعدايدا ولار 48-70 كۇننىڭ ىشىندە 1,5 كيلو سالماققا دەيىن جەتەدى.
برويلەر بالاپاندارىن ازىقتاندىرۋ ءۇشىن قۇرامىندا قاجەتتى ۆيتاميندەر مەن مينەرالدى قوسپالارى بار ارناۋلى قۇرعاق قۇراماجەم پايدالانىلادى. ازىقتىڭ بۇل ءتۇرى تاۋىق قورادا تاۋلىك بويى تۇراقتى تۇردە بولعانى ءجون.
برويلەر تاۋىقتارىن ازىقتاندىرۋ جولدارى. برويلەر تاۋىقتارىن ازىقتاندىرۋدىڭ وزىندىك ەرەكشەلىكتەرى بار. ويتكەنى, مۇنداي تاۋىق تۇرلەرى قۇرامىندا ازوت پەن بەلوك مولىنان كەزدەسەتىن قۇنارلى ازىق تۇرلەرىن قاجەت ەتەدى. مۇنداي قۇنارلى زاتتار ەڭ الدىمەن استىق داندەرىندە مولىنان كەزدەسەدى. برويلەر تاۋىعى جەيتىن ازىقتىڭ 3/2 بولىگىن استىق داندەرى, ال قالعان بولىگىن ءتۇرلى تاماق قالدىقتارى مەن مينەرالدى زاتتار قۇراعانى ءجون.
برويلەر تاۋىقتارىنىڭ جۇمىرتقالاۋ كەزىندە ولارعا بەرىلەتىن ازىق قۇرامىندا كالتسيدىڭ مولىراق بولعاندىعىن ەسكەرۋ قاجەت. وسى كەزدە وعان قۇرامىندا مولىنان كەزدەسەتىن قۇراماجەم ازىرلەپ بەرۋ كەرەك. ەگەر ازىق قۇرامىندا كالتسي جەتكىلىكسىز بولسا, وندا تاۋىقتار ەدەن سىلاقتارىن شۇقي باستايدى. ءتىپتى كەيبىر جاعدايدا ءوز جۇمىرتقالارىن شۇقىپ, ولاردى جارىپ تا تاستايدى. ال جۇمىرتقالاۋ كەزەڭى اياقتالعان شاقتا ولاردى استىق داندەرىمەن جانە ءتۇرلى تاعام قالدىقتارىمەن ازىقتاندىرا بەرۋگە بولادى.
جازعى ۋاقىتتاردا تاۋىقتاردى دالاعا شىعارىپ, جايىپ العان ءجون. بۇل كەزەڭدە تاۋىقتار ەركىن جايىلۋ ارقىلى ءوز اعزالارىنا قاجەتتى ازىق قۇرامىن وزدەرى تاۋىپ جەي الادى. ال قىسقى كەزەڭدە قولدا تۇرعاندا ولار جەمىس تامىرلارىمەن, جوڭىشقامەن جانە ۇنتاقتالعان قالاقايمەن ازىقتاندىرىلادى. ارينە, قىستى كۇنى تاۋىققا قاجەتتى جاسىل وسىمدىكتەر تاۋىپ بەرۋ قيىن بولاتىندىقتان, ازىق راتسيونىنا كارتوپ, ازىقتىق قىزىلشا, ءسابىز جانە ءشوپتى قوسۋعا بولادى. تاۋىققا جۇمىرتقالاۋ كەزىندە ءداننىڭ ءبىر بولىگىن ىلعالداندىرىپ بەرۋ كەرەك.
برويلەر تاۋىقتارىن وتكىزۋ. برويلەر تاۋىقتارىن وتكىزۋ ءۇشىن ەڭ الدىمەن ولاردىڭ تۇراقتى وتكىزۋ رىنوگىنىڭ بولۋىن ەسكەرگەن ابزال. سوندىقتان ءسىز بۇل ىسكە كىرىسپەس بۇرىن بۇل ءونىمدى قاي جەرگە وتكىزۋگە بولاتىندىعىنا الدىن-الا زەرتتەۋلەر جۇرگىزىپ كورىڭىز. ماسەلەن, كافە-رەستوراندارعا بارىپ, ولاردىڭ قوجايىندارىمەن سويلەسىپ, كەلىسىم جاساۋ ارقىلى ءوز ونىمدەرىڭىزدى شاعىنداپ وتكىزە الاسىز. ەگەر ءسىز ولاردى تۇراقتى تۇردە برويلەر ونىمىمەن قامتاماسىز ەتە الاتىندىعىڭىزعا سەنىمدى بولساڭىز, بۇل ماسەلە ولاردىڭ كوڭىلىنەن شىعۋى ابدەن مۇمكىن. ويتكەنى, ادامدار كوبىرەك تۇتىناتىن ساپالى دا ءدامدى ءونىم ءتۇرىن تۇراقتى تۇردە جەتكىزىپ بەرە الاتىن سەنىمدى سەرىكتەستىڭ پايدا بولۋى ەڭ الدىمەن ولاردىڭ ءوز بيزنەسىن تۇراقتاندىرۋىنا قولايلى جاعداي تۋعىزاتىندىعىن ەسكەرىڭىز.
برويلەر ءوسىرۋدىڭ مولشەرلى شىعىندارى:
ءبىر بالاپان شامامەن العاندا 300 تەڭگە تۇرادى. ەگەر ءسىز 30 بالاپان ساتىپ الاتىن بولساڭىز, وعان 9 مىڭ تەڭگە جۇمسايسىز.
برويلەر تاۋىعىنا قاجەتتى 1 كيلو ازىقتىڭ باعاسى 67 تەڭگە. ولاردى 2 اي ازىقتاندىرۋ ءۇشىن سىزگە كەمىندە 80 كيلوداي جەم قاجەت بولادى. سوندا ءسىزدىڭ وعان جۇمسايتىن شىعىنىڭىز شامامەن العاندا 5500 تەڭگەنى قۇرايدى.
ءسويتىپ, ءسىز 30 بالاپاندى ساتىپ الىپ, ولاردى ازىقتاندىرىپ ءوسىرىپ جەتكىزۋ ءۇشىن بارلىعى 15 مىڭ تەڭگە كولەمىندە شىعىن شەگەسىز.
برويلەر وسىرۋدەن تۇسەتىن مولشەرلى كىرىستەر:
ءبىر برويلەر تاۋىعىن ساتقاندا ودان كەم دەگەندە 1200 تەڭگە پايدا تابۋعا بولادى. سوندا ءسىز 30 تاۋىقتان 36 مىڭ تەڭگە پايدا كورە الاسىز.
ادەتتە, بۇل كاسىپپەن شۇعىلدانعان ادام تەك 30 بالاپاندى ساتىپ الىپ باعۋمەن شەكتەلمەيتىنى انىق. ويتكەنى, بۇل كاسىپتەن دۇرىس پايدا كورۋ ءۇشىن ەڭ كەمىندە جۇزدەگەن تاۋىق ءوسىرۋ قاجەت. سوندا عانا ءسىزدىڭ جوعارىداعى تابىسىڭىز بىرنەشە ەسەلەپ ارتا تۇسەتىن بولادى.
سونىمەن قاتار, كەيبىر ادامدار برويلەر تاۋىعىن جۇمىرتقا الىپ, ساتۋ ءۇشىن دە وسىرەدى. قازىرگى كۇنى جاي تاۋىقتاردىڭ جۇمىرتقاسىنىڭ ءوزى بازارلاردا 200 تەڭگەنىڭ ماڭايىندا ەكەندىگىن ەسكەرسەك, ءسىز برويلەر تاۋىعىنىڭ جۇمىرتقاسىن الىپ ساتۋ ارقىلى ءوز تابىسىڭىزدى ودان ءارى ەسەلەي تۇسەتىن بولاسىز.
پايدالى كەڭەستەردى مىنا سايتتاردان الۋعا بولادى:
http://yesyes.ru/business-98-page-3.html
http://subscribe.ru/arcive/food.yhastok/201001/03121233.html
http://webfermer.narod.ru/broiler_doma.htm
ازىرلەگەن
سۇڭعات ءالىپباي,
«ەگەمەن قازاقستان».