بەلگىلى جۋرناليست ەرلان بەكحوجين باستاعان شىعارماشىلىق توپتىڭ تاقىرىپتى اشۋعا تالپىنىپ كوپ ىزدەنگەندەرى كورىنىپ تۇر. تاسپاعا ءتۇسكەن الەمدىك تۇلعالار تولعانىسى, تولىپ جاتقان دەرەكتەر مەن دايەكتەر ءبىزدىڭ تاۋەلسىز مەملەكەتىمىزدىڭ دۇرىس جولمەن دامىپ, ءوركەنيەت كوشىندە ءوز ءۇلگىسىن قالىپتاستىرعانىن العا تارتادى.
ءيا, قازاقستان وركەندى وزگەرىستەردىڭ ورىسىنە اياق باستى. ەلدىڭ جاڭا پرەزيدەنتىن سايلادى. حالقىمىز تاعى ءبىر تاڭداۋىن جاساپ, وزدەرىنىڭ وسى ۋاقىتقا دەيىنگى ۇلاعاتتى ۇستانىمدارىنان اينىمايتىنىن تانىتتى. ەگەمەندىك تۇسىندا ەلباسى قالىپتاستىرعان جاقسى ءداستۇرلەردىڭ جالعاسۋىنا ءمۇددەلى ەكەندىكتەرىن جاريا قىلدى.
ءسويتىپ تالايلاردىڭ ساناسىن سان ساققا جۇگىرتكەن ماسەلەنىڭ نۇكتەسى قويىلدى. كەزىندە ارينە ءارتۇرلى الىپ-قاشپا اڭگىمەلەر ايتىلعانىن بىلەمىز. بىراق نۇرسۇلتان نازارباەۆ قاي كەزدەگىدەي ناعىز كوشباسشىعا ءتان كورەگەندىكپەن كۇردەلى ءىستىڭ كۇرمەۋىن تاپپاسا تاريحتا قايتالانباس قايراتكەر بولىپ قالماس ەدى.
مۇنى وسى فيلمدە ويلارىن ورتاعا سالعان حالىقارالىق سپيكەرلەر دە اتاپ ءوتىپتى. سولاردىڭ كەيبىر سوزدەرىن كەلتىرە كەتكەن ءجون سەكىلدى.
فرانتس ۆرانيتسكي, اۋستريانىڭ 1986-1997 جىلدارداعى فەدەرالدىق كانتسلەرى:
– ومىرلىك تاجىريبە كورسەتكەندەي, كوپتەگەن ليدەرلەر ۇلكەن توڭكەرىستىڭ ءناتيجەسىندە تاقتان تايىپ جاتادى. بۇل زاڭسىز ءۇردىس بولعاندىقتان البەتتە, ۇرەي تۋدىرارى انىق. پرەزيدەنت نازارباەۆتىڭ ءوز ەركىمەن وكىلەتتىگىن توقتاۋى دا وزىندىك ءبىر «رەۆوليۋتسيا». الايدا ول زاڭدى تۇردە جۇزەگە اسقان ءارى اينالاسىنداعىلاردىڭ العاۋسىز ءسۇيىسپەنشىلىگىنە ءبولەنەتىن بەيبىت رەۆوليۋتسيا.
روزا وتىنباەۆا, قىرعىز رەسپۋبليكاسىنىڭ 2010-2011 جىلدارداعى پرەزيدەنتى:
– بيلىكتى بەيبىت جولمەن بەرۋ – مەنىڭشە, ورتالىق ازياعا ونشا ءتان ەمەس ءتارتىپ. ەل-جۇرتىمىزدى تەگىندە وسىعان ۇيرەتۋىمىز كەرەك.
رومانو پرودي, يتاليانىڭ بۇرىنعى پرەمەر-ءمينيسترى:
– ەشبىر ساياساتكەر ماڭگىلىك ەمەس. ەل تاريحى بىزبەن بىتپەيدى. ءبىراق كەيبىرەۋلەر وسىنى ءتۇسىنبەيدى. نۇرسۇلتان نازارباەۆ بيلىك الماسقاندا بولاتىن كەلەڭسىزدىكتەردىڭ الدىن الدى. ەگەر كوشباسشى وتستاۆكاعا كەتىپ بارا جاتىپ تا ءوزىنىڭ ىقپالىنان ايىرىلماسا مەن ونى دانالىقتىڭ كورىنىسىنە بالايمىن.
الەكساندر كۆاسنەۆسكي, پولشانىڭ 1995-2005 جىلدارىنداعى پرەزيدەنتى:– الەمدە نۇرسۇلتان نازارباەۆتاي ساياسات سەركەلەرى ساۋساقپەن سانارلىقتاي عانا. ول باتىل شەشىم قابىلدادى. مەن بۇل قادام ءوز قامىن ەمەس, قازاقستاننىڭ بولاشاعىن ويلاعاندىقتان جاسالدى دەپ ەسەپتەيمىن.
ەكرانداعى جىلى لەبىزدەر لەگى وسىلاي جالعاسا بەرەدى. سويلەۋشىلەر ەلباسى نۇرسۇلتان نازارباەۆتىڭ زامانىمىزدىڭ زاڭعار تۇلعاسى ەكەنىن, پرەزيدەنت قاسىم-جومارت توقاەۆتىڭ وعان لايىقتى ءىزباسار بولاتىندىعىنا, الەمدىك قوعامداستىقتان ويىپ وتىرىپ ورىن العان قازاقستاننىڭ الداعى ۋاقىتتاردا دا العان بەتىنەن قايتپاي, قارىشتى قارقىنمەن وركەندەيتىندىگىنە سەنىم بىلدىرەدى.
سونىمەن بۇكىل الەم «قازاقستاننىڭ كەلەشەگى قالاي بولادى؟»دەگەن سۇراققا جاۋاپ العان سىڭايلى. بۇعان ساياسي باعىتتىڭ ساباقتاستىعى, ەلدەگى ىشكى تۇراقتىلىقتىڭ بەرىكتىگى كەپىلدىك بەرەرى داۋسىز.
توقسان اۋىز ءسوزدىڭ توبىقتاي ءتۇيىنىن ايتساق, ەلىمىزدەگى ساياسي ساباقتاستىق ستراتەگياسىن سارالاعان بۇل فيلم كوپشىلىك كوزايىمىنا اينالادى دەگەن ۇمىتتەمىز.