ءيا, سوڭعى ءبىر اپتادا نۇر-سۇلتان قالاسى فيلم تۋدىرۋشىلار, ونى كوپشىلىككە تاراتاتىن ماماندار جانە كينوسۇيەر قاۋىمنىڭ شىعارماشىلىق پىكىر مەن ۇزدىك تاجىريبە الماسۋ الاڭىنا اينالدى. وعان الەمنىڭ تۇكپىر-تۇكپىرىنەن ۇزدىك اكتەر, رەجيسسەر مەن جەتەكشى پروديۋسەرلەردى جيناعان XV حالىقارالىق «ەۋرازيا» كينوفەستيۆالىنىڭ وتكىزىلۋى سەبەپ.
فەستيۆال باعدارلاماسى قانشالىقتى سان تاراپتى بولسا, قورىتىندى ناتيجەنى كۇتكەن قاۋىمنىڭ كوڭىل تولقىنىسى مەن ىشكى ارپالىسى دا الۋان ءتۇرلى بولدى. ويتكەنى ءار كورەرمەننىڭ ءوز تاڭداۋى بولعانىمەن دە, شەشۋشى ءسوز – ءبارىبىر قازىلار القاسىنىڭ قۇزىرىندا. ال شىعارىلعان ءناتيجەمەن مەيلى قولداڭىز, مەيلى قارسى شىعىڭىز, ءبارىبىر كەلىسۋگە تۋرا كەلەدى. سەبەبى ونەر – شەكسىزدىك دەسەك تە, جۇلدە – شەكتەۋلى.
سالتاناتتى جيىندى مادەنيەت جانە سپورت ءمينيسترى اقتوتى رايىمقۇلوۆا ءوزىنىڭ قۇتتىقتاۋ سوزىمەن اشىپ بەردى.
– مىنە, بۇگىن ەلوردا كۇنىمەن جانە جاستار جىلىمەن ورايلاسىپ كەلگەن حV حالىقارالىق «ەۋرازيا» كينوفەستيۆالى ءوز ءمارەسىنە جەتىپ وتىر. تاماشا كينو مەرەكەسىمەن بارشاڭىزدى قۇتتىقتاۋعا رۇقسات ەتىڭىزدەر. ءيا, شىنىمەن دە, فەستيۆالدىڭ جەتى كۇنى كوپتەگەن شىعارماشىلىق كەزدەسۋلەر مەن جارقىن وقيعالارعا تولى بولدى. جانە وسىلاردىڭ ىشىندەگى كينو ماماندارى مەن كورەرمەندەر ءۇشىن ەڭ ماڭىزدىسى – ەۋرازيا قۇرلىعىنىڭ «مەن» دەگەن ۇزدىك كينوگەرلەرىنىڭ ءارتۇرلى جانرداعى فيلمدەرىن تاماشالاۋعا مۇمكىندىك العانى. الداعى ۋاقىتتا دا فەستيۆالىمىز ودان ءارى دامىپ, قاناتىن كەڭگە جايا بەرۋىنە تىلەكتەسپىن. سونداي-اق ايتۋلى ونەر بايقاۋىنىڭ اياسىندا شەتەلدەن كەلگەن ماماندار جانە ءوزىمىزدىڭ وتاندىق كينەماتوگرافيستەر ءبىر-بىرىمەن كاسىبي تاجىريبە الماسىپ, الەمنىڭ ۇزدىك كينو ماماندارى مەن كومپانيالارى اراسىندا ماڭىزدى رەسمي قۇجاتتارعا, مەموراندۋمدارعا قول قويىلدى. بولاشاقتا دا وتاندىق كينومىزدى دامىتىپ, مارتەبەسىن بيىك ەتۋگە باعىتتالعان جەمىستى دە جارقىن جۇمىستار جاسالا بەرەدى دەپ سەنەمىن, – دەپ بايقاۋ قاتىسۋشىلارى مەن قوناقتارىنا قۇتتىقتاۋ لەبىزىن جەتكىزگەن مينيستر فەستيۆال جەڭىمپازدارىن ماراپاتتاۋ ءراسىمى الدىندا قازاقستاننىڭ حالىق ءارتىسى دوسحان جولجاقسىنوۆقا «قازاقستان كينوسىنىڭ دامۋىنا قوسقان ۇلەسى ءۇشىن» ارنايى سىيلىعىن تابىس ەتتى.
ۇلتتىق كينەماتوگرافيامىزدىڭ ارداگەرلەرىن ەلەۋلى ەڭبەگى ءۇشىن ماراپاتتاعان تولقىنىستى ءساتتى ودان ءارى دە جاعىمدى جاڭالىقتار جالعادى. اتاپ ايتساق, فەستيۆالدىڭ باس سەرىكتەسى «حابار» اگەنتتىگىنىڭ ارنايى ديپلومدارىمەن – تاتار رەجيسسەرى يۋليا زاحاروۆانىڭ «حاليما» ءفيلمى جانە رەجيسسەر ازيز زايروۆتىڭ «قىز بەن تەڭىز» كينوتۋىندىسى ماراپاتتالدى. ال «NETPAC تاڭداۋى» بايقاۋدان تىس باعدارلاماسىنىڭ جۇلدەسى رەسەيلىك «الپاۋىت» («دىلدا») لەنتاسىنا بۇيىردى. سىيلىقتى اتاقتى قىتايلىق رەجيسسەر سە فەي تاپسىردى.
مىنە, ءسويتىپ قاتىسۋشىلاردى جانە جانكۇيەرلەردى ۇزاق كۇتتىرگەن نەگىزگى بايقاۋدىڭ جەڭىمپازدارىنىڭ ەسىمى جاريالانار تولقىنىستى ءسات تە كەلىپ جەتتى. سالتاناتتى ءراسىم اۋەلى ۇزدىك قىسقا مەترلى فيلمدەردى ماراپاتتاۋدان باستالدى. اتالعان بايقاۋ بويىنشا گران-پري جۇلدەسى قىتايلىق «جارقىن كۇندەر» كينولەنتاسىنا بۇيىردى. فيلم رەجيسسەرى ماريا حابۋلل گولليۆۋدتىڭ شەتەلدىك ءباسپاسوز قاۋىمداستىعىنىڭ اتقارۋشى حاتشىسى سەرگەي ءراحليننىڭ قولىنان ماراپاتقا يە بولدى. ال قازىلار القاسىنىڭ ارنايى جۇلدەسىن وزبەكستاندىق شوكير حوليكوۆتىڭ «ءشاي» فيلمى جانە بەلارۋس ميتري سەمەنوۆ-الەينيكوۆتىڭ «فرانكا» كينوتۋىندىلارى ەنشىلەدى.
«ۇزدىك اكتەر» جۇلدەسى «ەحو» فيلمىندەگى (يزرايل, 2018 ج) ءساتتى جۇمىسى ءۇشىن يورام تولەدانوعا بۇيىرسا, «ۇزدىك اكتريسا» اتاعى «اليسا» فيلمىندەگى (فرانتسيا, اۋستراليا, 2019 ج) ءرولى ءۇشىن ەميلي پيپوننەگە بەرىلدى. جۇلدەنى تانىمال رەسەيلىك اكتەر كيريلل گرەبەنششيكوۆ تابىستادى. سونىمەن قاتار بۇل اتالىمداعى قازىلار القاسىنىڭ ارنايى سىيلىعىن ليۋبوۆ بوريسوۆانىڭ «مەنىڭ توبەمنەن كۇن باتپايدى» كارتيناسى (ساحا رەسپۋبليكاسى (ياكۋتيا), 2019 ج) جەڭىپ الدى.
ال «ۇزدىك رەجيسسەرلىك جۇمىس» اتالىمىنداعى ءجۇلدەنى قازاقستاننىڭ حالىق ءارتىسى, قازاقستاندىق كينەماتوگرافيا مەترى تالعات تەمەنوۆ وڭتۇستىك- كورەيالىق «پارازيتتەر» ءفيلمنىڭ رەجيسسەرى پون دجۋن حوعا تابىس ەتتى. «ۇزدىك ستسەناري ءۇشىن» اتالىمىنداعى سىيلىق ماكەدونيا, بەلگيا, فرانتسيا, حورۆاتيا, سلوۆەنيا ەلدەرىنىڭ ورتاق جوباسى – «قۇداي بار, ونىڭ ەسىمى – پەترۋنيا» ءفيلمىنىڭ اۆتورلارى تەونا سترۋگار ميتەۆسكا مەن ەلما تاتاراگيچكە بەرىلدى.
جەڭىمپازداردى ماراپاتتاۋ ءراسىمىنىڭ شارىقتاۋ شەگى – ارينە, باس جۇلدە يەسىنىڭ ەسىمى جاريالانار ءسات. سونىمەن, XV حالىقارالىق «ەۋرازيا» كينوفەستيۆالىنىڭ گران-ءپريى وتاندىق رەجيسسەر فارحات ءشارىپوۆتىڭ «تۇلعالىق ءوسۋ ترەنينگى» (2019 ج) فيلمىنە بۇيىردى. جۇلدەنى حالىقارالىق قازىلار القاسىنىڭ توراعاسى, تانىمال ۆەنگر رەجيسسەرى تاماش توت تابىستادى.
ماراپاتتاۋ راسىمىنەن كەيىن فەستيۆالدىڭ پرەزيدەنتى, كينەماتوگرافيستەر وداعىنىڭ ءتوراعاسى, بەلگىلى كينورەجيسسەر ەرمەك تۇرسىنوۆ ساحناعا شىعىپ, سالتاناتتى جيىندى قورىتىندىلادى. ايتۋلى كينو مەرەكەسى اياسىندا وتكەن ءىس-شارالار مەن كورسەتىلىمدەر كورەرمەندەر قاتتى قىزىعۋشىلىعىن تۋدىرعانىن اتاپ ءوتىپ, بايقاۋعا قاتىسۋشىلاردىڭ, حالىقارالىق قازىلار القاسى مۇشەلەرىنىڭ جۇمىسى ءۇشىن العىسىن ءبىلدىرىپ, جەڭىمپازداردى قۇتتىقتادى.
– فەستيۆال اياقتالدى. ءجۇلدەلەر تابىستالدى. كەلگەندەرىڭىزگە قۋانىشتىمىن, كەلەسى جىلى كەزدەسكەنشە, – دەپ تۇيىندەدى ءسوزىن رەجيسسەر. مىنە, وسىلايشا جەتى كۇن بويى كينوسۇيەر قاۋىم كوڭىلىنە ءتۇرلى ەموتسيالار مەن جارقىن ەستەلىكتەر ۇيالاتقان فيلم مەرەكەسى ءوز مارەسىنە جەتىپ, كەزەكتى جەڭىمپازىنىڭ ەسىمىن جاريالادى جانە ول – قازاقستان! جاساي بەر, قازاق ونەرى!