– گۇلجانات قويباعارقىزى, پرەزيدەنت ءسوزى سىزگە قانداي وي سالدى؟
– ءوزىڭىز قىزمەت ىستەيتىن ەلىمىزدىڭ باس باسىلىمى – «Egemen Qazaqstan» اتالعان راسىمگە وراي «ساباقتاستىق سالتاناتى» دەگەن باس تاقىرىپ قويىپتى. مەملەكەت باسشىلارى اۋىسقان كەزدە ءبىر جاعىنا بۇرا تارتپايتىن ساباقتاستىقتىڭ بولۋى, ەلىمىزدىڭ تۇڭعىش پرەزيدەنتى – ەلباسى بەلگىلەپ بەرگەن سارابدال ساياساتتىڭ ودان ءارى جالعاسۋى تۇراقتى ءارى قاۋىپسىز دامۋدىڭ باستى كەپىلى دەپ سانايمىن. بۇعان دەيىنگى رەفورمالاردىڭ جاڭاشا ءبىر قىرىنان بايىپتالىپ, تەرەڭدەي تۇسەتىنى ۇلكەن مەرەي. قويعان العاشقى ساۋالىڭىزعا قايتارار جاۋابىم وسىنداي.
– رەسپۋبليكا پرەزيدەنتى بەلگىلەپ بەرگەن باستى باعىتتار ءجونىندە نە ايتار ەدىڭىز؟
– تاۋەلسىزدىك جىلدارىندا ەل ەكونوميكاسىن العا قاراي دامىتۋدىڭ جاڭا تۇعىرناماسى جاسالىپ, جۇزەگە اسا باستادى. مۇنداي وزگەرىستەر الەۋمەتتىك سالا مەن بلوكتىڭ ءوسىپ-وركەندەۋىنە دە وڭ سەپتىگىن تيگىزدى. ايتسە دە الەۋمەتتىك جانە رۋحاني تۇرعىدان جاڭعىرۋ ىسىندە بارلىق ماسەلە شەشىمىن تاۋىپ ۇلگەردى دەۋگە, ارينە بولمايدى. وسى ورايدا ەلىمىزدىڭ جاڭادان سايلانعان پرەزيدەنتى قاسىم-جومارت توقاەۆ ءوزىنىڭ جولباستار سوزىندە الەۋمەتتىك سالاعا, سونىڭ ىشىندە قازاقستاندىقتاردىڭ تابىسى مەن تۇرمىسىن ودان ءارى جاقسارتۋعا قاتىستى ناقتى بايلامدار جاساعانى كوكەيگە بىردەن قوندى.
بۇدان شىعاتىن باستى ءتۇيىن – الداعى ۋاقىتتا جاڭا جۇمىس ورىندارى كوبەيىپ, حالىقتى ءتيىستى جالاقىمەن قامتۋ, سونداي-اق مۇعالىمدەر مەن دارىگەرلەر مارتەبەسىن كوتەرۋ جونىندە ناقتى قادامدار جاسالاتىندىعى. ءبىر سوزبەن ايتقاندا, حالىقتىڭ كوكەيىندە جۇرگەن ماسەلەلەرگە مەملەكەت باسشىسى تاراپىنان ايرىقشا كوڭىل بولىنەتىنى قۋانىش سەزىمىنە بولەدى.
سونداي-اق بۇعان دەيىن قازاقستان قوعامىندا ۇلتتىق تابىستىڭ ءادىل بولىنۋىنە قاتىستى ارقيلى پىكىرلەر بولعانى راس. وسىنداي كوپشىلىكتى تولعاندىرعان ماسەلەگە دە ايقىندىق پەن جاريالىلىق بەرگەنى اتاپ ايتۋعا تۇرارلىق. ويتكەنى ونىڭ ستراتەگيالىق ءمانى مەن ماڭىزى وتە جوعارى. سونىمەن بىرگە قاسىم-جومارت توقاەۆ 10 باعىتقا بايلانىستى سوزىندە بيۋدجەت قاراجاتتارىن ۇنەمدى تۇردە جۇمساۋ, ونى ەڭ الدىمەن پايداسى مەن تيىمدىلىگى جوعارى الەۋمەتتىك سەرپىن بەرە الاتىن جوبالارعا باعىتتاۋ كەرەكتىگىن تۇيىندەپ بەردى.
قازىرگى كەزدە كوپشىلىكتىڭ كوكەيىندە جۇرگەن باستى پروبلەمالاردىڭ ءبىرى –ەكولوگيالىق احۋال ەكەنى بەلگىلى. پرەزيدەنتتىڭ بۇل ماسەلەگە دە باسا نازار اۋدارعانى ەل-جۇرتقا, ولاردىڭ دەنساۋلىعىنا دەگەن جاناشىرلىقتان تۋعان شەشىم ەكەنى ايقىن. مەملەكەت باسشىسى اقتوبە وبلىسىنا ساپارى كەزىندە دە ءوڭىر ەكولوگياسىن جاقسارتۋ مەن قورشاعان ورتانى كوزدىڭ قاراشىعىنداي قورعاۋ جونىندەگى وي-پىكىرلەرىن ورتاعا تاستاعان بولاتىن. اقتوبە – ءوندىرىسى مەن ونەركاسىبى جان-جاقتى دامىعان ءوڭىر. مۇنداعى كاسىپورىنداردان شىعاتىن زياندى وندىرىستىك قالدىقتاردى رەتتەۋ مەن جويۋ ىسىندە دە ءوز شەشىمىن كۇتكەن ماسەلەلەر از ەمەس. بۇل رەتتە پرەزيدەنت پىكىرى ءىستى العا جىلجىتۋدىڭ باستى تۇتقاسى بولا الاتىنىنا ەشقانداي كۇمانىمىز جوق.
– پرەزيدەنت اتاپ كورسەتكەن 10 باعىتتىڭ ىشىندە سىزگە ءبىر تابان جاقىنداۋ, جانىڭىزعا بىردەن ۇيالاي كەتكەن ءبىر-ەكى باعىتتى اتاپ كورسەتە الاسىز با؟
– ارينە, ەلدىڭ ەرتەڭى – جاستار. ولارعا مەملەكەت تاراپىنان قامقورلىق پەن قولداۋ تۋعىزىلسا, بۇل سەنىمدى جاستار تولىقتاي اقتايتىنىنا سەنىم مول. وسى ورايدا پرەزيدەنتتىڭ ءوز قىزمەتىنە رەسمي تۇردە كىرىسۋ كەزىندە جاستارعا قاتىستى باعدارلامالىق باعىتتا ايتقان ءسوزى جانىمىزدى جادىراتتى. مەن – ەڭ الدىمەن انامىن. وتباسىمىزدا ءۇش بالا ءوسىپ كەلەدى. ال تۇتاستاي ەلىمىزدە جاس تولقىننىڭ جەلكىلدەپ وسكەن قۇراقتاي ۇلكەن لەگى ەگەمەن ەلىمىزدىڭ ءوسىپ-وركەندەۋىنە ءوز ۇلەستەرىن قوسۋدى ماقسات ەتسە, پرەزيدەنت اتاپ كورسەتكەندەي, ەلىمىزدىڭ بولاشاعى دا جارقىن.
ءبىزدىڭ جاستارىمىز ماقساتكەر, ەڭبەكسۇيگىش, كرەاتيۆتى, سوندىقتان قازاقستاننىڭ بولاشاعى سەنىمدى قولدا دەپ وي تۇيەدى قاسىم-جومارت كەمەل ۇلى. ەكىنشىدەن, 10 باعىتتىڭ ىشىندە قازاقستاندىقتاردى قولجەتىمدى باسپانامەن قامتۋ ءجونىندەگى ماسەلەنىڭ دە ورنى بولەك ەكەنى حاق. سونداي-اق بۇعان دەيىن رەسپۋبليكانىڭ تۇڭعىش پرەزيدەنتى – ەلباسى باستاپ بەرگەن باعىتتار ودان ءارى جالعاساتىنى مەنى جىلى سەزىمگە بولەدى.
– اڭگىمەڭىزگە راحمەت.
اقتوبە