وسلو, 18 ماۋسىم 2019 جىل – وسلودا «قازاقستان: جاڭا ەكونوميكالىق مۇمكىندىكتەر» تاقىرىبى بويىنشا بيزنەس سەمينار ءوتتى. قازاقستاننىڭ نورۆەگياداعى ەلشىلىگى ۇيىمداستىرعان ىسشاراعا نورۆەگيالىق بيزنەس پەن سالالىق ينستيتۋتتاردىڭ ترانسپورت پەن لوگيستيكا, اۋىل شارۋاشىلىعى, ساۋدا, تەلەكوممۋنيكاتسيالار, ەنەرگەتيكا, قۇرىلىس, تاماق ونەركاسىبى جانە باسقا سالالاردىڭ وتىزدان استام وكىلدەرى قاتىستى.
نەگىزگى بايانداما جاساعان قازاقستاننىڭ سىرتقى ىستەر ءمينيسترىنىڭ ورىنباسارى رومان ۆاسيلەنكو قازاقستانداعى پرەزيدەنتتىك سايلاۋدىڭ قورىتىندىلارى جانە پرەزيدەنت قاسىم-جومارت توقاەۆتىڭ ۇلىقتاۋ راسىمىندە ايقىنداعان ون باسىمدىعى تۋرالى اقپاراتتاندىردى.
«مەملەكەت باسشىسىنىڭ قاعيدالارى – «ساباقتاستىق. ادىلدىك. ورلەۋ». پرەزيدەنت قازاقستاننىڭ الەمگە, جاڭا جەتىستىكتەرگە جانە تەحنولوگيالارعا اشىق ەكەنىڭ انىق كورسەتتى. ءبىزدىڭ ەلىمىز ىسكەر ادامداردى بۇدان بىلاي دا قولداپ, ينۆەستيتسيالاردى تارتۋ مەن قورعاۋ, ىسكەرلىك بەلسەندىلىكتى ىنتالاندىرۋ, ورتا تاپتى نىعايتۋ ساياساتىن جۇرگىزەتىن بولادى», - دەدى ءمينيستردىڭ ورىنباسارى.
قازاقستان مەن نورۆەگيا اراسىنداعى ساۋدا اينالىمى 2018 جىلى 60 ملن. دوللارىن قۇرادى. ر. ۆاسيلەنكونىڭ ايتۋىنشا, بۇل ساۋدا-ەكونوميكالىق ىنتىماقتاستىقتىڭ زور الەۋەتىن ايعاقتايدى. بيزنەس سەمينار كەزىندە ءوزارا ءىس-قيمىلدىڭ ءۇش نەگىزگى باعىتى ايقىندالدى. ولار ترانسپورت پەن لوگيستيكا, اۋىل شارۋاشىلىعى (قازاقستاننان بيداي, نورۆەگيادان بالىق پەن تەڭىز ونىمدەرىن تاسىمالداۋ, اكۆامادەنيەتتى بىرلەسىپ دامىتۋ) جانە قارجى قىزمەتتەرى.
ر. ۆاسيلەنكو نورۆەگيا بيزنەسى ءۇشىن «استانا» حالىقارالىق قارجى ورتالىعىنىڭ مۇمكىندىكتەرىن تانىستىرىپ, «AstanaHub» حالىقارالىق IT ستارتاپتار ورتالىعى جانە حالىقارالىق جاسىل تەحنولوگيالار مەن ينۆەستيتسيالىق جوبالار ورتالىعىنىڭ نورۆەگيالىق دامۋ ينستيتۋتتارىمەن ىنتىماقتاسۋ الەۋەتى تۋرالى ايتىپ بەردى.
بيزنەس سەمينار كەزىندە قازاقستانداعى شەتەلدىك ينۆەستورلار ءۇشىن جاسالعان مۇمكىندىكتەر تۋرالى «Kazakh Invest» ۇلتتىق كومپانياسىنىڭ وڭىرلىك وكىلى جاندوس نۇرلانوۆ بايانداپ بەردى.