«رۋحاني جاڭعىرۋ» باعدارلاماسى اياسىندا ۇيىمداستىرىلعان فەستيۆال ۇلىتاۋ اۋداندىق ءمادەنيەت ۇيىندە وتكەن «ەدىگە تاۋى – ەسكى جۇرت ەسكەرتكىشى» اتتى عىلىمي-تاجىريبەلىك كونفەرەنتسيامەن باستالدى. القالى جيىندى اۋدان اكىمى ءانۋار ومار اشىپ, ءجۇرگىزىپ وتىردى. كونفەرەنتسيا جۇمىسىنا قاتىسقان تاريح عىلىمدارىنىڭ دوكتورى, پروفەسسور جامبىل ارتىقباەۆ, تاريح عىلىمدارىنىڭ دوكتورى, پروفەسسور تىلەگەن سادىقوۆ, جازۋشى-ولكەتانۋشى كامەل ءجۇنىستەگى, جازۋشى-ەتنوگروف ءتورەحان مايباس جانە باسقالار التىن وردانىڭ اتاعى الىسقا كەتكەن ءامىرى ەر ەدىگەنىڭ اقيقات پەن اڭىزعا تولى ءومىرتاريحى تۋرالى تىڭ دەرەكتەردى العا تارتىپ, كونە تاريحتىڭ كومبەسىنەن سۋىرتپاقتاپ سىر تارتتى.
جيىننان سوڭ قوناقتار قاسيەت قونعان ەدىگە تاۋىنا بارىپ, قاتپارىنا تاريح تۇرعان كيەلى مەكەنمەن جاقىنىراق تانىسۋ ءمۇمكىندىگىنە يە بولدى.
ءتۇس اۋا ءداستۇرلى جانە بارد ءاندەر بايقاۋىنىڭ ىرىكتەۋ كەزەڭىندە ونەرپازدار باق سىناستى. كەش تۇسە جاستار ءۇشىن «التىباقان اندەرى» مەرەكەسى ۇيىمداستىرىلىپ, التىباقان تەپكەن جاستار شىرقاعان قازاقتىڭ حالىق اندەر جۇلدىزى جىمىڭداعان ۇلىتاۋ اسپانىندا قالىقتادى. «كوكمايسا» ەتنوفەستيۆالىنىڭ ەكىنشى كۇنى قوناقتار تەاترلاندىرىلعان كورىنىستەردىڭ كۋاسى بولدى. مۇنان سوڭ قولدانبالى ونەر بويىنشا شەبەرلىك ءدارىستەرى ۇيىمداستىرىلدى. كەشكە قاراي ءان بايقاۋىنىڭ شەشۋشى سايىسىنا جولداما العان ورىنداۋشىلار ونەر كورسەتىپ, كورەرمەن قاۋىمنىڭ قۇلاق قۇرىشىن قاندىردى. سايىس سوڭىندا جەڭىمپازدار مەن ءجۇلدەگەرلەر جينالعان قاۋىم قۇرمەتىنە گالا-كونتسەرت قويىپ, ۇلىتاۋدىڭ دالاسىن انگە بولەدى.ەتنوفەستيۆالدە ۇيىمداستىرىلعان ساداق اتۋ, مەشكەيلەر سايىسى, قاتىن كۇرەس سىندى سايىستار جۇرتشىلىقتىڭ ەرەكشە قىزىعۋشىلىعىن تۋدىرعانى راس. سونىمەن قاتار ايتۋلى مەرەكەدەگى قىزىقتىڭ كورىگىن قىزدىرعان اۋدارىسپاق, اساۋ ءۇيرەتۋ, تەڭگە الۋ, قىز قۋ سىندى ۇلتتىق سپورت ويىندارىنىڭ دا وتە جوعارى دەڭگەيدە ۇيىمداستىرىلعانىن دا ايتا كەتكەن ءلازىم. سونان سوڭ, وسى ويىنداردا توپ جارعان ورەندەردىڭ ءبىر دە بىرەۋى قۇر قول قايتپادى. جەڭىمپازدار مەن جۇلدەگەرلەردىڭ ءبارى اقشالاي سىيلىقپەن ماراپاتتالدى.
ال كوكپار مەن الامان بايگە دەگەندە جۇرتتىڭ دەلەبەسى ءتىپتى قوزدى. كوكپار دوداسىندا جاڭاارقالىق ەردەن جامانوۆ جەتەكشىلىك ەتكەن «اقجول» جانە «اقتۇبەك» كوماندالارى باس جۇلدەنى ءوزارا ساراپقا سالدى. جەڭىمپاز اتانعان «اقجول» ۇجىمىنىڭ پالۋاندارى 300 مىڭ تەڭگە جۇلدەنى تاقىمعا باستى.
ال الامان بايگەنىڭ 24 شاقىرىمدىق سىنىنا 18 سايگ ۇلىك تۇسكەن ەدى. بۇل دودادا شەت اۋدانىنداعى «اقوي» اۋىلىنىڭ اتىنان قوسىلعان جۇيرىك الدىنا قارا سالمادى. ات يەسى الكەن جىلتىركوزوۆكە باس جۇلدەگە دەپ تىگىلگەن 500 مىڭ تەڭگە وسىلايشا بۇيىردى.فەستيۆالدىڭ سوڭعى كۇنىندە قوناقتار مەن قاتىسۋشىلار قاسيەتتى ۇلىتاۋ تاۋلارىنا اتپەن ساياحات جاساپ, تاريح تۇنعان ءولكەنىڭ تۇمسا تابيعاتىن تاماشالاپ, جانعا شيپا اۋاسىمەن تىنىستادى.
ۇلت ۇياسىنا ات ارىتىپ جەتكەن جۇرتتىڭ كوڭىلىنەن شىققان «كوكمايسا» ەتنوفەستيۆالىنىڭ جوعارى دەڭگەيدە وتۋىنە ەڭبەك سىڭىرگەن ۇلىتاۋ اۋدانىنىڭ اكىمى ءانۋار وماروۆتىڭ اتالعان دۋماندى شارا مەن وڭىردەگى ءتۋريزمدى دامىتۋدى ءوزارا بايلانىستىرىپ, وسى باعىتتا جاسالىپ جاتقان جۇيەلى جۇمىستار تۋرالى ايتقانى جاندى سەمىرتتى.
– بۇل ەتنوفەستيۆالدىڭ باستى ماقساتىنىڭ ءبىرى – الىس-جاقىن شەتەلدەردەن كەلەتىن تۋريستەردى ۇلىتاۋدىڭ تاعىلىمدى تاريحى مەن قۇندى ەسكەرتكىش-جادىگەرلەرىنە قىزىقتىرۋ. وسى ارقىلى اۋداندا ءتۋريزمدى كەشەندى تۇردە دامىتۋعا بولاتىنىنا دەگەن سەنىم مول. بۇل دەگەنىڭىز – تۋريزممەن بىرگە وركەن جاياتىن ينفراقۇرىلىمنىڭ يگىلىگىن جەرگىلىكتى جۇرت كورىپ, جاڭا جۇمىس ورىندارى اشىلادى دەگەن ءسوز. جالپى, بۇل يگىلىكتى ءىستىڭ مەملەكەت باسشىسى قاسىم-جومارت توقاەۆتىڭ پرەزيدەنتتى ۇلىقتاۋ راسىمىندە ءسويلەگەن ءسوزىندە جاڭا جۇمىس ورىندارىن اشۋدى جانە حالىقتى لايىقتى جالاقىمەن قامتۋدى الداعى ۋاقىتتا ەرەكشە نازاردا ۇستايتىن باعىتتىڭ ءبىرى رەتىندە اتاعانىمەن استاسىپ جاتقانى كوڭىلگە دەم بەرەدى, – دەدى اۋدان اكىمى ءا.وماروۆ.
راسىندا دا, سىرتتان كەلگەن مەيمانداردىڭ ريزا كوڭىل, ىستىق ىقىلاستى لەبىزدەرىنە قاراپ, بۇل «كوكمايسا» ەتنوفەستيۆالى سىندى رۋحاني تۇرعىداعى شاراپاتى مول شارانى شەتەلدىك قوناقتاردى قازاق حالقىنىڭ تاسقا باسىلعان تاريحىمەن جانە الەمدىك وركەنيەتكە ولشەۋسىز ۇلەس قوسقان ۇلى مادەنيەتىمەن تانىستىرۋدىڭ وتە ۇتىمدى جانە اسا ءتيىمدى مۇمكىندىگى دەپ ايتۋعا تولىق نەگىز بار. قاراعاندى وبلىسى, ۇلىتاۋ اۋدانى