ارباداعى بيدەن ەل بىرىنشىلىگى مەن بي سپورتىنان «ەۋرازيا-2019» حالىقارالىق تۋرنيرىنە 26 جۇپ قاتىستى. ەلىمىزدىڭ تۇكپىر-تۇكپىرىنەن جايىق جاعاسىنا جينالعان ونەرپازداردىڭ مۇمكىندىكتەرى شەكتەۋلى بولعانىمەن, ساحناعا شىققانداعى شابىتتى شاقتارى كورەرمەنگە ايرىقشا اسەر ەتتى.
ەرەكشە دوداعا ارنايى كەلگەن قوناقتار قاتارىندا قوستانايلىق ارۋنا جاقسىعۇلوۆا دا بولدى. «ءۇمىت-نادەجدا» قوعامدىق قورىن قۇرىپ, ەلىمىزدە العاشقىلاردىڭ ءبىرى بولىپ «ارباداعى بي» جوباسىن باستاعان ارۋنا جاقسىعۇلوۆا قامكوڭىل جاندارعا بي ونەرىنىڭ قىر-سىرىن ۇيرەتىپ ءجۇر. «ءارتۇرلى تاعدىردى باستان كەشكەن ءبىزدى بىرىكتىرەتىن ءبىر نارسە بار, ول – ارباداعى ءومىر. ارينە پاندۋستاردىڭ تالاپقا ساي ەمەستىگى, اربانىڭ قىمباتتىعى سەكىلدى ماسەلەلەر از ەمەس. بىراق بىزگە ودان دا زور اسەر ەتەتىنى – كوڭىل, قورشاعان ورتانىڭ نازارى. قوعامداعى بەلسەندىلىگىمىزدى ارتتىرعىمىز كەلەدى. وسى رەتتە ءبيدىڭ ماڭىزى ەرەكشە, ادامدارمەن ارالاسامىز, كوپشىلىكتىڭ ورتاسىندا بولعان كەزدە كوڭىل كۇيىمىز دە كوتەرىلەدى», دەيدى ا.جاقسىعۇلوۆا.
اتىراۋدا وتكەن ايرىقشا شارانى «اەليتا» بي كلۋبى ۇيىمداستىردى. ونىڭ نەگىزىن قالاۋشىلار – وبلىستىق سپورتتىق بيلەر فەدەراتسياسىنىڭ جەتەكشىلەرى ليديا, نۇرلان مۇقانوۆتار. ەكى كۇنگە سوزىلعان بايقاۋدىڭ جۇلدەگەرلەرى قاتارىندا ەسبولات بالباەۆ پەن ايسۇلتان قايىرلىنىڭ ەسىمدەرى اتالدى. سونداي-اق ءسابينا قاسىموۆا, ماليكا مۇقتاروۆا, ميحايل بىچكوۆسكي, ۆلاديسلاۆ ساحنو, دانيال تسىحلەر, الەكساندر چاشين, رومان ليتۆينوۆ, ەسەت دارىباەۆ, تالعات امانبەكوۆ, اسىلبەك قاپارباەۆ, وكسانا ليم, ماقسات سارسەنباەۆتار جۇلدەلى ورىنداردى ەنشىلەپ, جوعارى ناتيجە كورسەتتى.
ال «ەۋرازيا-2019» حالىقارالىق سپورتتىق بي تۋرنيرىندە نيكيتا بووس, سانجار ىزدىباەۆ, الماس تۇقپاتۋللين, ارتۋر شاتوۆ, داريا قابىل, تولقىن ءىزدىباەۆا, اسيليا ەلەۋسىن, ميحايل فادين, ميراس جاڭاتالاپ, سالتانات وتەشقالي, ەسكەندىر گوحگالتەر جەڭىمپاز بولىپ تانىلدى.– وسىنداي شارالار ارقىلى ەرەكشە قاجەتتىلىكتەرى بار ادامداردى وڭالتۋعا, قوعامعا بەيىمدەۋگە بولادى. ەلباسى باستاماسىمەن قولعا الىنعان «كەدەرگىسىز كەلەشەك» باعدارلاماسىنىڭ ماڭىزى زور, – دەيدى ۇيىمداستىرۋشى ليديا مۇقانوۆا.
اتىراۋ