كاسىپوداقتار فەدەراتسياسىنان پرەزيدەنتتىككە كانديدات بولعان امانكەلدى تاسپيحوۆ سايلاۋ اشىق, جاريالى ءوتتى دەپ ەسەپتەيدى. «بارلىق جەردە ءبىزدىڭ بايقاۋشىلارىمىز بولدى. زاڭ بۇزۋشىلىقتى بايقاعان جوقپىز. ەشقانداي ارىز ءتۇسكەن جوق. قازاقستاندىقتار تۇراقتىلىققا, ىنتىماققا كوبىرەك بەت بۇرىپ, سوعان داۋىس بەردى», دەگەن امانكەلدى تاسپيحوۆ وسىعان دەيىنگى ءوز ءۇندەۋلەرىندە ەڭبەككەرلەردىڭ ماسەلەسىنە بايلانىستى ناقتى ۇسىنىستارىن ايتقانىن جەتكىزدى. كاسىپوداقتار فەدەراتسياسىنىڭ توراعاسى باقىتجان ءابدىرايىم بۇل ۇسىنىستاردىڭ ورىندالا باستاعانىن ايتتى, باعدارلاماداعى تۇيتكىلدى ماسەلەلەردى شەشۋ بويىنشا جۇمىس جالعاسا بەرەتىنىن اتاپ ءوتتى.
«114 جىل تاريحى بار كاسىپوداق تۇڭعىش رەت ءوزىنىڭ ءۇمىتكەرىن پرەزيدەنت سايلاۋىنا ۇسىندى. ءبىز ۇسىنعان ۇمىتكەردىڭ باعدارلاماسىندا جالاقىنى, تابىستى كوتەرۋ, الەۋمەتتىك قورعاۋ, جۇمىس ورىندارىنداعى قاۋىپسىزدىك ماسەلەسى بولعانىن بىلەسىزدەر. پرەزيدەنت قاسىم-جومارت توقاەۆ ۇمىتكەرلەردىڭ ۇسىنىستارى بويىنشا ۇكىمەتكە تاپسىرما بەرگەنىن اتاپ ءوتتى. بۇل حالىق ءۇشىن ۇلكەن جەتىستىك. جاقىن ارادا ەڭبەك قاۋىپسىزدىگىنە بايلانىستى ارنايى باعدارلاما قابىلدانعالى جاتىر. كوپتەن بەرى ورىندالماي كەلگەن ەڭبەك كودەكسىنە وزگەرىستەر مەن تولىقتىرۋلار ەنگىزۋ ۇكىمەتتەن پارلامەنتكە ۇسىنىلدى. جۇمىس ورىندارىنداعى قاۋىپسىزدىككە بايلانىستى ءبىزدىڭ قاتىسۋىمىزبەن ارنايى جۇمىس توبى قۇرىلىپ, جاقىندا ۇكىمەت وتىرىسىندا قاۋلى قابىلدانباقشى. ءبىز كوتەرگەن وزەكتى ماسەلەلەردى شەشۋدىڭ جولدارىن قاراستىرىپ, جۇمىستى جۇرگىزە بەرەمىز», دەدى ب.ءابدىرايىم.
بەلگىلەنگەن باعىتتار جاڭادان سايلانعان قازاقستان رەسپۋبليكاسى پرەزيدەنتىنىڭ جاڭا جۇمىس ورىندارىن اشۋ, لايىقتى ەڭبەكاقى تولەۋدى قامتاماسىز ەتۋ, سونداي-اق مەملەكەت باسشىسىنىڭ ۇلىقتاۋ ءراسىمى بارىسىندا ايتقان ءادىل الەۋمەتتىك ساياساتتى جۇرگىزۋ ءبولىگىندەگى باستامالارمەن ۇندەس. باسقوسۋدا باس كەڭەس مۇشەلەرى ەلىمىزدە الەۋمەتتىك ادىلەتتىلىكتى نىعايتۋ, ەڭبەك جاعدايلارىن جانە ەڭبەكتى قورعاۋدى جاقسارتۋ, ءوندىرىستەگى جازاتايىم وقيعالاردىڭ الدىن الۋ, قىزمەتكەرلەردىڭ سالاماتتى جانە قاۋىپسىز ەڭبەك جاعدايلارىن جاساۋعا جۇمىس بەرۋشىلەردىڭ قىزىعۋشىلىعىن ارتتىرۋ, كورپوراتيۆتىك الەۋمەتتىك جاۋاپكەرشىلىكتى دامىتۋ, قىزمەتكەرلەردىڭ ەڭبەكتى قورعاۋعا كەڭىنەن قاتىسۋىن قامتاماسىز ەتۋ جانە بارلىق كاسىپورىندار مەن ۇيىمداردا قوعامدىق باقىلاۋ ينستيتۋتىن دامىتۋ جونىندەگى باستامالاردى ىسكە اسىرۋدى جالعاستىرۋعا نيەت ءبىلدىردى.