مەرەيلى مىندەتتەر مەجەلەندى
كەشەگى وتكەن كەزەكتەن تىس پرەزيدەنتتىك سايلاۋدا وتانداستارىمىز ايرىقشا بەلسەندىلىك تانىتىپ, مەملەكەتتىڭ جاڭا باسشىسىن سايلادى. بۇگىن مىنە, قاسىم-جومارت كەمەل ۇلى وزىنە سەنىم ارتقان حالقى الدىندا ادال قىزمەت ەتۋگە انت قابىلداپ, سايلاۋالدى ۇسىنعان باعدارلاماسىندا ايتىلعان ەل يگىلىگى جولىنداعى ماڭىزدى ءمىندەتتەردى جۇزەگە اسىرۋعا سەرت ەتتى.
قاسىم-جومارت توقاەۆ قازاقستان رەسپۋبليكاسىنىڭ پرەزيدەنتى عانا ەمەس, قارۋلى كۇشتەردىڭ جوعارعى باس قولباسشىسى رەتىندە دە ءتول اسكەرىمىزدىڭ الەۋەتىنە ايرىقشا نازار اۋدارىپ وتىر. تاياۋدا عانا ۇلتتىق ۇلاننىڭ ەلوردا ىرگەسىندە ورنالاسقان جەدەل قۇرامىندا بولىپ, قۇقىقتىق ءتارتىپ اسكەرىنىڭ ماتەريالدىق-تەحنيكالىق بازاسىمەن تانىستى. سونداي-اق ۇلاندىقتارمەن كەزدەسۋ بارىسىندا ۇلتتىق ۇلانداعى كۇرمەۋى شەشىلمەگەن ماسەلەلەردى نازارعا الدى. دالىرەك ايتساق, استانالىق اۋەجاي ماڭىندا سالىنىپ جاتقان ۇلتتىق ۇلان اۆياتسياسىنىڭ قۇرىلىسىن اياقتاۋ, اسكەريلەرگە قاراستىرىلعان تۇرعىن ءۇي تولەمدەرىنىڭ قارىزىن تولىققاندى تولەۋ سىندى ماسەلەلەردىڭ وڭ شەشىلۋىن ۇكىمەتكە تاپسىرعان بولاتىن. ۇلتتىق ۇلان جەكە قۇرامى دا وزىنە جۇكتەلگەن قىزمەتتىك-جاۋىنگەرلىك ءمىندەتتەردى اتقارىپ, قوعامدىق ءتارتىپ پەن قاۋىپسىزدىكتى, ىشكى تىنىشتىقتىڭ ساقتالۋىن قامتاماسىز ەتۋ ارقىلى ەلباسى باستاعان, جالعاسىن جاڭا پرەزيدەنت قولعا العان ماقساتتاردى باعىندىرۋ ىسىنە ۇلەس قوساتىن بولادى.
قايرات ۇمبەتوۆ,
حالىق قاھارمانى, ۇلتتىق ۇلان وفيتسەرى, پولكوۆنيك
حالىقتىق قۇرىلىم
تۇتاس تاريحي ءداۋىردىڭ اسا جاۋاپتى كەزەڭىن باستان وتكەرىپ وتىرعان قازاقستاندىقتار ەلىمىزدىڭ بارلىق ماڭىزدى سالالارىن قامتيتىن ۇلكەن وزگەرىستىڭ كۋاسى بولعالى وتىر. قازاقستان حالقىنىڭ قولداۋى مەن سەنىمىنىڭ ناتيجەسىندە جەڭىسكە قول جەتكىزگەن قازاقستان پرەزيدەنتى قاسىم-جومارت توقاەۆتىڭ ۇلىقتالۋ راسىمىنەن كەيىن قوعام العاش رەت ۇلتتىق قوعامدىق سەنىم كەڭەسى قۇرىلاتىنىن ەستىدى. بۇل – العىشارتى بۇرىننان ءپىسىپ-جەتىلگەن قوعامدىق ساياساتتاعى ۇلكەن ماسەلە.
ازاماتتىق قوعام ءۇشىن قوعامدىق كەلىسىم يدەياسىنىڭ ماڭىزى اسا زور. بۇل ەڭ الدىمەن, قوعامدىق پىكىر سەركەلەرىمەن, ۇكىمەتتىك ەمەس ۇيىمدارمەن, ازاماتتىق قوعام وكىلدەرىمەن, قاراپايىم ازاماتتارمەن اشىق ءارى شىنايى كەرى بايلانىس جاساۋعا مۇمكىندىكتەر سىيلايتىن تاپتىرماس ءتيىمدى الاڭ. قوعامدىق باستامانىڭ قوزعاۋشى كۇشى بولىپ جۇرگەن وزىق ويلى ازاماتتار قاي وڭىردە بولسا دا جەتەرلىك, ولار ەندىگى جەردە جەرگىلىكتى حالىقتىڭ جاعدايىمەن تانىسىپ, دەرەكتەر مەن مالىمەتتەردى قوزعاپ, تىركەپ قانا قويماي, سول ماسەلەلەردى جۇزەگە اسىرۋ مەن شەشۋدىڭ جولدارىن تابۋعا دا كومەكتەسەدى. سەبەبى ەل يگىلىگى ءۇشىن قابىلدانعان مەملەكەتتىك باعدارلامالاردان قوعام كەندە بولمادى. ولاردىڭ بارلىعى دا حالىق ءۇشىن, قوعام ءۇشىن اسا ماڭىزدى ەدى.
بىراق ولاردىڭ كەيبىرىنىڭ جەرگىلىكتى بيلىك شەڭبەرىندە تولىق كۇشىندە جۇزەگە اسپاعانىن, و باستا جوسپارلانعانداي ءتيىمدى جۇمىس ىستەمەگەنىن, كۇتكەن ءناتيجەنى كورسەتپەگەنىن كورىپ وتىرمىز. قوعامدىق پىكىردىڭ جەتەكشىلەرى, ۇكىمەتتىك ەمەس ۇيىمداردىڭ وكىلدەرى جەرگىلىكتى ماسەلەلەردى بىلۋىمەن قاتار, ول قيىندىقتاردىڭ نەدەن تۋىنداعانىن, نە سەبەپتى ورىندالماي وتىرعانىن, ونى ءجۇزەگە اسىرۋ ءۇشىن قانداي ءادىس-تاسىلدەرگە جۇگىنۋ كەرەگىن, جالپى مەملەكەتتىك باعدارلامالاردى تولىققاندى ءجۇرگىزۋدىڭ سان باعىتتاعى جولدارىن نۇسقاي الادى. ياعني, بۇل باعدارلامالاردى ماقساتتى نىسانعا, حالىق ورتاسىنا جەتكىزۋدىڭ تەتىكتەرىن ناق وسى ازاماتتار قامتاماسىز ەتەتىن بولادى.
وكىنىشكە قاراي, حالىقتىڭ يگىلىگى مەن قوعامنىڭ پايداسى ءۇشىن قابىلدانعان باعدارلامالاردىڭ بىرقاتارى شيكى كۇيىندە شەشىمىن تاپپاعان بولسا, وعان شەنەۋنىكتەر عانا ەمەس, تالاپ ەتەتىن ازاماتتاردىڭ بەلسەندىلىگىنىڭ تومەندىگى دە كىنالى. مەنىڭشە, ۇلتتىق قوعامدىق سەنىم كەڭەسى وسى كەدەرگىلەر توڭىرەگىندەگى اقپاراتتى, پىكىرلەردى مەملەكەتتىك ورگاندارعا, ءتىپتى مەملەكەت باسشىسىنا دەيىن جەتكىزىپ, ءجۇزەگە اسىرۋدا وتە ماڭىزدى قىزمەت اتقارادى دەپ ويلايمىن.
التىناي كوبەەۆا,
«اقپاراتتىق رەسۋرس ورتالىعى» قوعامدىق قورىنىڭ ديرەكتورى
بارشانىڭ يگىلىگىنە ارنالعان باعدارلاما
قاسىم-جومارت توقاەۆ حالىقتىڭ الەۋمەتتىك تۇرمىسىن جاقسارتۋ ماقساتىندا بارشانىڭ يگىلىگى ءۇشىن باعدارلاما ۇسىندى. ساباقتاستىق ادىلدىك, ورلەۋ – ءۇش تاعانىن تىرەك ەتكەن جوبانىڭ بولاشاعى زور دەپ ايتار ەدىم. باعدارلاما اياسىندا «بىرگە» اكتسياسى شەڭبەرىندە حالىقتىڭ جاپپاي ۇسىنىس-پىكىرى جيناقتالدى. بۇگىندە 530 مىڭعا جۋىق ءوتىنىش كەلىپ ءتۇستى. 1 500 000-نان استام ادام ۇسىنىس-پىكىر ايتتى. ەڭ ءبىرىنشى الەۋمەتتىك ماسەلەلەرگە, الەۋمەتتىك قامسىزداندىرۋعا ەرەكشە كوڭىل بولىنەدى. جاستاردى جۇمىسپەن قامتۋ, ءبىلىم سالاسىنا بايلانىستى ءتۇيتكىلدى ماسەلەلەردى شەشۋ جايىندا ۇسىنىستار كوپتەپ ءتۇستى. قاسىم-جومارت توقاەۆ از قامتىلعان, كوپ بالالى وتباسىلارعا باسپانا سالۋ, از قامتىلعان جانە كوپ بالالى وتباسىلارعا, مۇمكىندىگى شەكتەۋلى جاندارعا, بارلىق ساناتتاعى مۇقتاج ادامدارعا بەرىلەتىن الەۋمەتتىك كومەكتىڭ اۋقىمى كوبەيەتىنىن ايتقان بولاتىن. سونداي-اق مۇمكىندىگى شەكتەۋلى ادامدارعا دا الەۋمەتتىك كومەك قولجەتىمدى بولادى.
قاسىم-جومارت كەمەل ۇلى – مەملەكەتتىك قىزمەتتە جوعارى لاۋازىمداردا ۇزاق جىلدار جۇمىس ىستەگەن تاجىريبەلى ساياساتكەر. ءبىلىم مەن عىلىم, الەۋمەتتىك, ەكونوميكالىق ماسەلەلەردى جاقسى بىلەدى.
«ساباقتاستىق. ادىلدىك. ءورلەۋ» تۇعىرناماسى قولدانىستاعى باعدارلامالاردى ءارى قاراي جالعاستىرادى. حالىقتى قولجەتىمدى تۇرعىن ۇيمەن قامتاماسىز ەتۋ ءۇشىن قازىرگى بار باعدارلامالاردى تۇرعىن ءۇي قۇرىلىسىنىڭ بىرىڭعاي ساياساتىنا بىرىكتىرۋ جوسپاردا بار. سونىمەن بىرگە جۇمىسسىزدىق ازايىپ, ەڭبەكاقى كوتەرىلەدى. «اكتسيا» اياسىندا ايتىلعان ۇسىنىستار تالدانىپ, جۇزەگە اسادى.
قانىبەك جۇماشەۆ,
Nur Otan پارتياسىنىڭ حاتشىسى