MENAFN
قازاقستان پرەزيدەنتى قاسىم-جومارت توقاەۆتى ۇلىقتاۋ ءراسىمى ۇيىمداستىرىلدى. ءىس-شارا ەل استاناسىنداعى تاۋەلسىزدىك سارايىندا ءوتتى.
ءراسىم بارىسىندا جاڭا سايلانعان پرەزيدەنت مەملەكەتتىك تىلدە انت بەردى. وسىدان باستاپ پرەزيدەنت رەسمي تۇردە قىزمەتىنە كىرىسەدى.
ەستەرىڭىزگە سالا كەتەيىك, 9 ماۋسىمدا قازاقستاندا پرەزيدەنت سايلاۋى وتكەن بولاتىن. داۋىس بەرۋ ناتيجەسى بويىنشا قاسىم-جومارت توقاەۆ 70 پايىزدان استام باسىمدىقپەن جەڭىسكە جەتتى.
ايتا كەتەرلىگى, تاۋەلسىز قازاقستان تاريحىندا العاش رەت تۇڭعىش پرەزيدەنت نۇرسۇلتان نازارباەۆ سايلاۋعا قاتىسقان جوق.
ۇلىقتاۋ راسىمىندە ءسوز سويلەگەن ق.توقاەۆ الداعى 1 قىركۇيەكتەن باستاپ ەلدەگى جەمقورلىقتى جوياتىن قۇجات ازىرلەنەتىنىن جەتكىزدى.
ناستوياششەە ۆرەميا
قازاقستان استاناسىندا قاسىم-جومارت توقاەۆتى ۇلىقتاۋ ءراسىمى ءوتتى. ول رەسمي تۇردە 5 جىلعا ەل پرەزيدەنتى بولىپ سايلاندى. ول قازاق تىلىندە انت بەردى.
قازاقستان پرەزيدەنتى قاسىم-جومارت توقاەۆ كونستيتۋتسياعا قولىن قويىپ تۇرىپ: «قازاقستان حالقىنا ادال قىزمەت ەتۋگە, قازاقستان رەسپۋبليكاسىنىڭ كونستيتۋتسياسى مەن زاڭدارىن قاتاڭ ساقتاۋعا, ازاماتتاردىڭ قۇقىقتارى مەن بوستاندىقتارىنا كەپiلدiك بەرۋگە, قازاقستان رەسپۋبليكاسى پرەزيدەنتiنiڭ وزiمە جۇكتەلگەن مارتەبەلi مiندەتiن ادال اتقارۋعا سالتاناتتى تۇردە انت ەتەمiن», دەپ انت قابىلدادى.
ۇلىقتاۋ ءراسىمى سايلاۋ ناتيجەسى جاريالانعاننان كەيىن ەكى كۇننەن سوڭ ءوتىپ وتىر. 9 ماۋسىمدا قازاقستاندا پرەزيدەنت سايلاۋى ءوتىپ, قاسىم-جومارت توقاەۆ 70 پايىزدان استام باسىمدىقپەن جەڭىسكە جەتتى.
FOX NEWS
قازاقستاننىڭ جاڭادان سايلانعان پرەزيدەنتى قاسىم-جومارت توقاەۆتى ۇلىقتاۋ سالتاناتى ءوتتى. ءوز سوزىندە جاڭا پرەزيدەنت ءبۇگىنگە دەيىن ەلدى باسقارىپ كەلگەن نۇرسۇلتان نازارباەۆتىڭ ساياساتىن جالعاستىراتىنىن ايتتى.
قاسىم-جومارت توقاەۆ 9 ماۋسىم كۇنى پرەزيدەنتتىك سايلاۋدا 70 پايىزدان استام داۋىسپەن جەڭىسكە جەتكەن ەدى. ناۋرىز ايىندا نۇرسۇلتان نازارباەۆ پرەزيدەنتتىك وكىلەتتىگىن توقتاتقاننان كەيىن سول كەزدە سەنات توراعاسى بولعان ق.توقاەۆ ونىڭ ورنىنا كەلگەن ەدى.
«بۇل سايلاۋدىڭ ناتيجەسىنەن ءبىز حالىقتىڭ ەلباسى ساياساتىنىڭ جالعاسقانىن قالايتىنىن كوردىك», دەدى توقاەۆ ۇلىقتاۋ راسىمىندە. نۇرسۇلتان نازارباەۆ قاۋىپسىزدىك كەڭەسىنىڭ ءتوراعاسى رەتىندە ءالى دە ءوز ەلىنە قىزمەت كورسەتە بەرەتىنى بەلگىلى.
«مەن قازاقستان حالقىنا ادال قىزمەت ەتۋگە, قازاقستان رەسپۋبليكاسىنىڭ كونستيتۋتسياسى مەن زاڭدارىندا وزىمە جۇكتەلگەن مىندەتتەمەلەردى ءادىل اتقارۋعا, حالىقتىڭ قۇقىعى مەن بوستاندىعىنا كەپىلدىك بەرۋگە انت ەتەمىن!» دەدى جاڭادان سايلانعان مەملەكەت باسشىسى.
ءوز سوزىندە الەۋمەتتىك ماسەلەلەردى ايرىقشا كوتەرگەن جاڭا پرەزيدەنت بىرقاتار رەفورمالاردىڭ بولاتىنىن دا يشارالادى. سونىڭ ىشىندە باي مەن كەدەيدىڭ تابىس ايىرماشىلىعىن ازايتۋدى, ەلدە ورتا تاپ قالىپتاستىرۋدى جانە تابيعي بايلىقتاردان تۇسەتىن ۇلتتىق بايلىقتى تەڭدەي جانە ءادىل بولەتىنىن ايتتى.
سونىمەن قاتار پرەزيدەنت ادام قۇقى مەن ءسوز بوستاندىعىنىڭ دا دامۋىن نازارىندا ۇستايتىنىن جەتكىزدى. سايلاۋالدى ناۋقان كەزىنەن باستاپ پىكىر الۋاندىعىنا وڭ قارايتىنىن, دەگەنمەن ەڭ الدىمەن ديالوگ ورناتۋ كەرەكتىگىن ايتقان قاسىم-جومارت توقاەۆ بارشا قازاقستاندىقتاردى ءبىرتۇتاس ۇلت بولىپ بىرىگۋگە شاقىردى.
الەمدەگى ءىرى حالىقارالىق اقپارات جانە جاڭالىقتار اگەنتتىكتەرىنىڭ ءبىرى THE ASSOCIATED PRESS تە ەلىمىزدەگى ەل پرەزيدەنتىنىڭ كەزەكتەن تىس سايلاۋى تۋرالى جازدى. جاڭا سايلانعان مەملەكەت باسشىسى قاسىم-جومارت توقاەۆتى ۇلىقتاۋ ءراسىمى تۋرالى «قازاقستاننىڭ جاڭا پرەزيدەنتى قىزمەتىنە كىرىستى» دەگەن ماقالادا قازاقستاننىڭ جاڭا پرەزيدەنتى قىزمەتىنە كىرىسىپ, زور سەنىم ارتقانى ءۇشىن قازاقستاندىقتاردىڭ بارىنە العىس ايتقانىن جازدى.
سونداي-اق ق.توقاەۆ تاۋەلسىزدىك العان ساتتەن باستاپ ەل باسقارعان قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ ەرەكشە ءرولىن اتاپ ءوتىپ, وسى ساباقتاستىقتى ساقتاۋ جانە ونى ودان ءارى نىعايتۋ جولىندا جۇمىلۋعا شاقىردى. اگەنتتىك ق.توقاەۆتىڭ «بۇل سايلاۋدا ازاماتتار ەلباسى ن.نازارباەۆتىڭ باعىتىن جالعاستىرۋ ءۇشىن ماعان داۋىس بەرگەنىن مويىنداۋ كەرەك», دەگەن ءسوزىن دە كەلتىرگەن.
«قاسىم-جومارت توقاەۆ 9 ماۋسىمدا وتكەن سايلاۋدا 70,96 پايىز باسىمدىقپەن جەڭىسكە جەتكەن بولاتىن. وعان 6 539 715 ادام داۋىس بەرگەن. ق.توقاەۆ ناۋرىز ايىندا نۇرسۇلتان نازارباەۆ ءوز وكىلەتتىلىگىن توقتاتقاننان كەيىن پرەزيدەنت قىزمەتىنە كىرىسكەن», دەپ اقپاراتتىق اگەنتتىك وتكەنگە شولۋ جاساعان.
سونىمەن قاتار اگەنتتىك «مەنىڭ ماقساتىم – قوعامنىڭ بىرلىگىن قامتاماسىز ەتۋ جانە ءاربىر ازاماتتىڭ قۇقىعىن قورعاۋ. قازاقستاننىڭ ۇلتتىق ءمۇددەسىن ارقاشان جانە بارلىق جەردە قورعايتىن بولامىن», دەگەن قاسىم-جومارت توقاەۆتىڭ ءسوزىن كەلتىرگەن. پرەزيدەنت ۇلىقتاۋ راسىمىندە سويلەگەن سوزىندە قوعامداعى ون باسىم باعىتتى بەلگىلەپ, ولاردىڭ بارلىعىن جاقىن ارادا جۇزەگە اسىرۋ كەرەگىن ايتتى. ونىڭ ىشىندە حالىقتىڭ تابىسىن ارتتىرۋ جانە ءال-اۋقاتىن جاقسارتۋ, سىبايلاس جەمقورلىققا قارسى ءتيىمدى ءىس-قيمىلدار جاساۋ, سوتتىق-قۇقىقتىق رەفورما, ادىلەتتى الەۋمەتتىك ساياسات, تۇرعىن ءۇي ماسەلەسىن شەشۋ, وڭىرلەردى دامىتۋ, تەپە-تەڭدىك جانە كوپۆەكتورلى سىرتقى ساياسات, سونداي-اق, جاستاردى قولداۋ ماسەلەلەرى كوتەرىلدى.
تۇركيانىڭ جەتەكشى باسىلىمدارى دا پرەزيدەنت ۇلىقتاۋ ءراسىمىن حابارلاۋدان قالىس قالمادى. ولار جاڭا مەملەكەت باسشىسىن سايلاۋداعى جەڭىسىمەن, قىزمەتىنە كىرىسۋىمەن قۇتتىقتاپ, ساتتىلىك تىلەستى.
اتاپ ايتار بولساق, انادولۋ اگەنتتىگى تاۋەلسىزدىك سارايىندا وتكەن ماڭىزدى شاراعا تۇڭعىش پرەزيدەنت – ەلباسى نۇرسۇلتان نازارباەۆ, ۇكىمەت مۇشەلەرى, پارلامەنت دەپۋتاتتارى, كونستيتۋتسيالىق كەڭەس مۇشەلەرi, جوعارعى سوت سۋديالارى, قازاقستاندا ءتىركەلگەن ديپلوماتيالىق كورپۋس وكىلدەرى جانە باسقا دا شاقىرىلعان قوناقتاردىڭ قاتىسقانىن, 2500-گە جۋىق ادام بولعانىن حابارلايدى.
سونىمەن بىرگە ۇلىقتاۋ ءراسىمى بارىسىندا ورتالىق سايلاۋ كوميسسياسى جاڭا سايلانعان پرەزيدەنتكە قازاقستان رەسپۋبليكاسى پرەزيدەنتىنىڭ كۋالىگىن تاپسىرعانىن, پرەزيدەنت ءراسىم بارىسىندا قازاقستان حالقىنا انت بەرگەنىن جازادى. تۇرىك اگەنتتىگى قازاقستان كونستيتۋتسياسىنا سايكەس جاڭادان سايلانعان پرەزيدەنت انت بەرگەننەن كەيىن رەسمي قىزمەتiنە كىرىسەتىنىن حابارلادى.
ودان كەيىن انادولۋ اگەنتتىگى مەملەكەت باسشىسى ۇلىقتاۋ راسىمىندە ءسويلەگەن سوزىندە زور سەنىم ارتقانى ءۇشىن قازاقستاندىقتاردىڭ بارىنە العىس ايتقانىن, قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ ەرەكشە ءرولىن اتاپ وتكەنىن جەتكىزگەن. پرەزيدەنتتىڭ «قازاقستاننىڭ ۇلتتىق مۇددەسىن ارقاشان جانە بارلىق جەردە قورعايتىن بولامىن» دەگەن ءسوزىن كەلتىرەدى.
«قازاقستان پرەزيدەنتى ون نەگىزگى باعىتتى بەلگىلەپ بەردى جانە ولاردىڭ ءبارىن جۇزەگە اسىرۋعا دەرەۋ كىرىسۋ كەرەگىن ايتتى. قازاقستان پرەزيدەنتى قولعا الاتىن نەگىزگى ماسەلەسى – سىبايلاس جەمقورلىققا قارسى ءتيىمدى ءىس-قيمىلدار جاساۋ ەكەنىن ەسكەرتتى. ودان بولەك, حالىقتىڭ تابىسىن ارتتىرۋ جانە ءال-اۋقاتىن جاقسارتۋ, سوت-قۇقىقتىق رەفورما, ادىلەتتى الەۋمەتتىك ساياسات, تۇرعىن ءۇي ماسەلەسىن شەشۋ, وڭىرلەردى دامىتۋ, تەپە-تەڭدىك جانە كوپۆەكتورلى سىرتقى ساياسات, سونداي-اق, جاستاردى قولداۋدى قولعا الاتىنىن مالىمدەدى» دەلىنگەن اگەنتتىك حابارلاماسىندا.