«بۇگىن شىمكەنت قالاسىندا العاشقى بەلسەندى ۇزاق ءومىر ءسۇرۋ ورتالىعىنىڭ سالتاناتتى اشىلۋىنا قاتىستىم. ورتالىق زاماناۋي تۇلعاعا قاجەتتى بارلىق جاعدايمەن قامتاماسىز ەتىلگەن. ينتەرنەت-كافە, ەمدىك-ۋقالاۋ, فيزيكالىق-ەمدەۋ بولمەسى, كينوزال, كىتاپحانا, ترەناجەرلىق زال, يوگا, ۇستەل تەننيسى, بيليارد ايماقتارىمەن جانە بالالارعا ارناپ جابدىقتالعان ويىن بولمەلەرىمەن قامتىلعان. بۇل ورتالىقتىڭ ءبىر ەرەكشەلىگى - مۇندا تەك قاريالار عانا ەمەس, سونىمەن بىرگە ءومىردىڭ تالكەگىنە ۇشىراعان جەتىم بۇلدىرشىندەرىمىز دە ارنايى كەلىپ, اتا-اجە مەيىرىمى مەن قامقورلىعىنا بولەنۋگە مۇمكىندىك الادى. قارتتارىمىز بولسا ءومىردىڭ ءبىر قۋانىشى - بالالارمەن ۋاقىت وتكىزىپ, نەمەرە ماپەلەمەك. مۇنداي مۇمكىندىكتەر قارتتارىمىزدىڭ دا, بالالاردىڭ دا دەنساۋلىعى مەن رۋxاني كۇيىنە وڭ اسەرىن تيگىزەدى دەگەن سەنىمدەمىن», دەيدى قالا اكىمى.
مەگاپوليستەگى جانعا جايلىلىق سىيلايتىن ورتالىقتا زەينەتكەر قاريالار مەن مۇمكىندىگى شەكتەۋلى جاندار, بالالار ءۇيىنىڭ تاربيەلەنۋشىلەرى بوس ۋاقىتتارىن وتكىزىپ, دەنساۋلىقتارىن جاقسارتا الادى. سونداي-اق, مۇندا زەينەتكەرلەرگە تەگىن الەۋمەتتىك جانە مەديتسينالىق قىزمەت كورسەتىلەدى.
«قوعامنىڭ دامۋى قاريالارىمىزعا كورسەتىلەتىن قامقورلىقپەن بايقالادى. جىلدىڭ باسىنداعى ەسەپتىك كەزدەسۋدە قالا تۇرعىندارىنىڭ ءبىرى مەنەن شىمكەنتتەن قارت كىسىلەرگە ءومىر سالتىن جاقسارتىپ, دەنە شىنىقتىرۋعا ارنالعان ورتالىق اشۋدى سۇرانعان بولاتىن. مىنە, بۇگىن وسى ورتالىقتى اشىپ وتىرمىز. زەينەتكەرلەر مەن قاريالار بۇل ورتالىققا وتباسىمەن, بالالارى جانە نەمەرەلەرىمەن كەلە الادى», دەدى ع.ءابدىراحىموۆ.
شىمكەنتتەگى بۇل ورتالىق ەلباسى نۇرسۇلتان ءابىش ۇلى نازارباەۆتىڭ وتانداستارىمىزدىڭ ءومىر ءسۇرۋ جاسىن ۇزارتۋ مەن بۇقارالىق سپورتتى دامىتۋ تاپسىرماسى اياسىندا اشىلىپ وتىر. ايتا كەتەرلىگى, شىمكەنتتىكتەردىڭ ءومىر ءسۇرۋ جاسى ۇزارىپ كەلەدى. مەگاپوليس تۇرعىندارىنىڭ قازىرگى تاڭداعى ورتاشا جاسى 78 جاستان اسادى.
يگىلىكتى شارادا قالا اكىمى تۇرعىنداردى سپورتپەن جاپپاي شۇعىلدانىپ, سالاۋاتتى ءومىر سالتىن ۇستانۋعا شاقىردى. قارتتارعا ارناپ قويىلعان كونتسەرتتىك قويىلىمدا بالاشا قۋانعان زەينەتكەرلەر بي بيلەپ, ءان سالىپ, مەرەكە شاتتىعىنا بولەندى.