زامانعا بەيىمدەلگەن قىز-كەلىنشەكتەرىمىزدىڭ قۇراق قۇراۋعا, تەكەمەت باسۋعا, ءبىر قارىس ءجىپسىز-اق, جۇننەن تاماشا كيىم ۇلگىلەرىن جاساۋعا دەگەن قۇلشىنىستارى قايتا ويانعانىن كورىپ ءجۇرمىز. ون ساۋساعىنان ونەرى تامعان زامانداستاردىڭ ىسمەرلىگى ءتانتى بولۋعا تۇرارلىق. دارالىققا باستايتىن بۇل ونەر تالاي دارىندى ابىرويعا بولەپ, اسىراپ وتىر.
جىبەك, التىن, كۇمىس ءتۇستى ءجىپتەرمەن زەرلەنىپ, اسىل, تابيعي تاستارمەن كومكەرىلىپ جاسالاتىن سۋتاج ونەرىنە دەن قويعان سالتانات بالا كۇنىنەن ونەرگە جاقىن بولدى. 7-8-سىنىپتا وقىپ جۇرگەندە قالاداعى تۋىستارىنىڭ ۇيىنە قىدىرىپ كەلىپ, اۋىلدى ساعىنىپ سالاتىن سۋرەتتەرى ءالى جادىندا. سالتاناتتىڭ سالعان سۋرەتتەرىن كورگەن نەمەرە ءاپكەسى اناسىنا «قىزىڭىز سۋرەتتى جاقسى سالادى ەكەن, ديزاين ماماندىعىنا وقىتقانىڭىز ءجون», – دەپ كەڭەس بەرگەن. ۇلتتىق ءبىرىڭعاي تەستىلەۋدەن ۇرىككەن سول كەزەڭدەگى تالاي وقۋشى سياقتى, سالتانات تا 9-سىنىپتى ءبىتىرىپ, كوللەدجگە قۇجات تاپسىرۋعا شەشىم قابىلدايدى.
اناسى بۇل شەشىمىن قۇپتاپ, ەكەۋى الماتىعا كەلىپ ورال تاڭسىقباەۆ اتىنداعى ساندىك-قولدانبالى ونەر كوللەدجىنە قۇجات تاپسىردى. سالتانات ءوز ماماندىعىن تاڭداۋدا قاتەلەسپەپتى, ارنايى سۋرەت مەكتەبىن ءبىتىرىپ كەلگەن ۇل-قىزداردان قالماي, «ساندىك تەاتر ونەرى» ماماندىعى بويىنشا كوللەدجدى ۇزدىك ءبىتىرىپ شىقتى. ءوز ىسىنە مىعىم, باستاعان ءىسىن اياقسىز قالدىرمايتىن قازاقتىڭ قارشاداي قىزى بۇدان ءارى وقۋىن «سىمبات» ءسان اكادەمياسىندا جارناما ديزاينى ماماندىعى بويىنشا جالعادى.
قازىر سالتانات امانگەلدىقىزى تۇرمىستا. وسكەن-ونگەن ءۇلكەن اۋلەتتىڭ يبالى كەلىنى. جۇبايى ەرىك دۇيسەمباەۆ قازاقتىڭ م.اۋەزوۆ اتىنداعى مەملەكەتتىك اكادەميالىق دراما تەاترىندا قويۋشى-سۋرەتشى. سالتانات ءوز ماماندىعى بويىنشا ەمەس, اۋرۋحانادا جۇمىس ىستەپ جۇرسە دە, سۇيىكتى ءىسىن تاستاماي ەل ىشىندە سۋتاج دەپ اتالىپ كەتكەن قولونەرمەن اينالىسىپ, قىز-كەلىنشەكتەرگە ارناپ ءتۇرلى اشەكەيلەر جاساپ ءجۇر. جاساعان اشەكەيلەرى كوزدىڭ جاۋىن الادى. ولارداعى تۇستەردىڭ ۇيلەسىمى مەن تالعام نازىكتىگى ادامدى ءبىردەن باۋرايدى. «شەبەردىڭ قولى ورتاق» دەگەن حالقىمىز دارىندى ادامنىڭ زامان اعىمىنا ساي تۇرلەنگەن ونەردىڭ بارلىعىن مەڭگەرە الاتىنىن بولجاسا كەرەك. سالتانات تا زامان اعىمىنا ساي, جاڭا ونەر ءتۇرىن ءوز كۇشىمەن مەڭگەرىپ, ءوز قيالىمەن اشەكەيلەردىڭ ديزاينىن تۋدىرادى. ونىڭ قولىنان شىققان زاتتار كىپ-كىشكەنتاي بولعانمەن, ونى جاساۋ ءۇشىن تەمىردەي ءتوزىم مەن ينەنىڭ كوزىنەن وتكەندەي ىجداعاتتىلىق كەرەك ەكەنىن اڭعارۋ قيىن ەمەس. ەندەشە, بۇگىن سالتاناتتىڭ شەبەر قولى مەن ۇشقىر قيالىنان شىققان اشەكەيلەرمەن تانىسىڭىزدار.