قازاقستاندا كونستيتۋتسيالىق رەفورمالار اياسىندا پرەزيدەنتتىڭ سايلاۋ جۇيەسىندەگى, قارجى سەكتورىنداعى جانە جەرگىلىكتى اتقارۋشى بيلىكتەگى وكىلەتتىكتەرى ناقتىلاندى. جاڭارتىلعان نورمالار مەملەكەتتىك ينستيتۋتتاردىڭ جۇمىسىن ۇيلەستىرۋگە, باسقارۋ تيىمدىلىگىن ارتتىرۋعا جانە قوعامدىق باقىلاۋدى كۇشەيتۋگە باعىتتالعان, دەپ حابارلايدى Egemen.kz.
مەملەكەت باسشىسى ورتالىق سايلاۋ كوميسسياسىنىڭ قىزمەتىن قامتاماسىز ەتۋدە نەگىزگى ءرول اتقارادى. پرەزيدەنت كوميسسيا تۋرالى ەرەجەنى بەكىتىپ, ونىڭ قىزمەت ءتارتىبىن ايقىندايدى. سونىمەن قاتار سايلاۋ مەن رەفەرەندۋمعا دايىندىق جانە ونىڭ قورىتىندىلارى تۋرالى اقپاراتتى تۇراقتى تۇردە تىڭدايدى.
زاڭنامادا پرەزيدەنتتىڭ رەسپۋبليكالىق رەفەرەندۋم وتكىزۋ ماسەلەسىندەگى قۇزىرەتى دە ناقتى كورسەتىلگەن. مەملەكەت باسشىسى رەفەرەندۋم وتكىزۋدى ءوز باستاماسىمەن نەمەسە مەملەكەتتىك ينستيتۋتتار مەن ازاماتتاردىڭ ۇسىنىسى نەگىزىندە شەشە الادى. رەفەرەندۋم باستاماسىن كەمىندە 200 مىڭ ازامات كوتەرە الادى.
ۇسىنىستار قارالعاننان كەيىن پرەزيدەنت رەفەرەندۋم وتكىزۋ, زاڭدى رەفەرەندۋمسىز قابىلداۋ نەمەسە باستامانى كەرى قايتارۋ تۋرالى شەشىم قابىلدايدى. سونداي-اق قوعام پىكىرىن ناقتى كورسەتۋ ءۇشىن رەفەرەندۋمعا شىعارىلاتىن سۇراقتاردىڭ مازمۇنىن تۇزەتۋگە قۇقىلى.
قارجى جۇيەسىن باسقارۋ سالاسىندا دا پرەزيدەنتكە ماڭىزدى وكىلەتتىكتەر بەرىلگەن. پرەزيدەنت ۇلتتىق بانك توراعاسىن تاعايىنداپ, قىزمەتىنەن بوساتادى, سونداي-اق ونىڭ ورىنباسارلارىن بەكىتەدى. بۇل اقشا-نەسيە ساياساتىنىڭ تۇراقتىلىعىن ساقتاۋعا جانە قارجى جۇيەسىندەگى ۇيلەسىمدى جۇمىستى قامتاماسىز ەتۋگە باعىتتالعان.
سونىمەن بىرگە مەملەكەت باسشىسى ۇلتتىق بانكتىڭ قىزمەتى تۋرالى ەسەپتى توقسانىنا كەمىندە ءبىر رەت تىڭدايدى. بۇل قارجى جۇيەسىنىڭ تۇراقتىلىعىن باقىلاۋعا مۇمكىندىك بەرەدى.
پرەزيدەنتتىڭ وكىلەتتىگى جوعارى اۋديتورلىق پالاتا قىزمەتىنە دە قاتىستى. مەملەكەت باسشىسى پالاتا توراعاسىن تاعايىنداپ, قۇرىلتايدىڭ كەلىسىمىمەن سەگىز مۇشەسىن بەس جىل مەرزىمگە بەكىتەدى. بۇدان بولەك, وسى ورگاننىڭ قىزمەتىن رەتتەيتىن ەرەجەنى دە پرەزيدەنت بەكىتەدى.
جوعارى اۋديتورلىق پالاتا پرەزيدەنت الدىندا تۇراقتى ەسەپ بەرەدى. بۇل مەملەكەتتىك قاراجاتتىڭ جۇمسالۋىنا باقىلاۋدى كۇشەيتىپ, سىرتقى ءاۋديتتىڭ تيىمدىلىگىن ارتتىرۋعا مۇمكىندىك بەرەدى.
جاڭارتىلعان نورمالاردا پرەزيدەنتتىڭ جەرگىلىكتى اتقارۋشى بيلىكتى قالىپتاستىرۋداعى ءرولى دە ايقىندالعان. مەملەكەت باسشىسى استانا, وبلىستار جانە رەسپۋبليكالىق ماڭىزى بار قالالاردىڭ اكىمدەرىن ءتيىستى ءماسليحاتتاردىڭ كەلىسىمىمەن تاعايىندايدى.
پرەزيدەنت اكىمدەرگە تاپسىرما بەرىپ, ولاردىڭ ورىندالۋىن ەسەپتەۋلەر ارقىلى باقىلاپ وتىرادى. قاجەت بولعان جاعدايدا, سونىڭ ىشىندە ءماسليحات سەنىمسىزدىك بىلدىرگەن كەزدە, اكىمدەردى قىزمەتىنەن بوساتۋعا قۇقىلى.
سونىمەن قاتار پرەزيدەنتكە تىكەلەي باعىناتىن مەملەكەتتىك ورگانداردىڭ قىزمەتىنە قاتىستى وكىلەتتىكتەر دە بەكىتىلگەن. جاڭا پرەزيدەنت قىزمەتىنە كىرىسكەننەن كەيىن مۇنداي ورگانداردىڭ باسشىلارى جاڭا تاعايىنداۋلار جاسالعانعا دەيىن ءوز مىندەتىن اتقارا بەرەدى.
مەملەكەت باسشىسى بۇل ورگانداردىڭ قۇرىلىمى مەن شتات سانىن بەكىتىپ, باسشىلارىن جانە ولاردىڭ ورىنباسارلارىن تاعايىندايدى. سونداي-اق ۆەدومستۆولاردى قۇرۋ, قايتا ۇيىمداستىرۋ نەمەسە تاراتۋ تۋرالى شەشىم قابىلداي الادى. بۇدان بولەك, پرەزيدەنت اتالعان ورگاندار جەتەكشىلەرىنىڭ ەسەبىن تۇراقتى تۇردە تىڭداپ وتىرادى.