ءبىلىم باسقارماسىنىڭ باسشىسى گۇلميرا كارىموۆانىڭ ايتۋىنشا, مۇنداعى ءبىلىم مەن ءتالىم-تاربيە ساپاسى كوڭىل كونشىتە بەرمەيدى. سونداي-اق ينتەرنات ۇلگىسىندەگى ءبىلىم وردالارىنا جۇمسالاتىن شىعىن دا از ەمەس. وسىنداي تۇيتكىلدى ماسەلەلەردى شەشۋ ماقساتىمەن بيىل ەنگىزىلگەن «ۋاقىتشا وتباسى» پيلوتتىق جوباسى ءوز تيىمدىلىگىن كورسەتىپ, ودان ءارى جالعاسىن تاباتىن بولادى.
وبلىس اكىمدىگىنىڭ وتىرىسىندا «ۋاقىتشا وتباسى» جوباسىنىڭ ورىندالۋ بارىسى تالقىلانىپ, 485 ءبىلىم وشاعىنىڭ 78 پروتسەنتى شاعىن مەكتەپتەرگە جاتاتىنى بەلگىلى بولدى. 229 ەلدى مەكەندە وقۋ ورىندارى مۇلدەم جوق. بالالار كورشى اۋىلدارعا كۇندەلىكتى قاتىناۋعا بولماسا ينتەرناتتاردا تۇرۋلارىنا تۋرا كەلەدى. باعدارلاما قولعا الىنعالى 31 مەكتەپتىڭ وقۋشىلارى ۋاقىتشا پاتروناتقا بەرىلىپتى. بالالار ۇيدەگىدەي ءتالىم-تاربيە الادى. ۇنەمى قاداعالاۋدا بولاتىندىقتان, ساباقتى نەگىزسىز بوساتۋ, اۋا رايىنىڭ قولايسىزدىعىنان مەكتەپكە كەلمەي قالۋ سەكىلدى فاكتىلەردىڭ ازايعانى بايقالادى.
«مەكتەبى جوق اۋىلدىڭ وقۋشىسىن باسقا ەلدى مەكەندەگى وتباسى ۋاقىتشا قولىنا الادى. ولار بالانىڭ وقۋ ۇلگىرىمىنە, تارتىبىنە تولىق جاۋاپ بەرەدى», دەيدى گۇلميرا رايىنبەكقىزى. پيلوتتىق جوبا ءۇش اۋداندا جۇرگىزىلىپ, 61 بالا 54 وتباسىعا ورنالاستىرىلعان. ماسەلەن, م.جۇماباەۆ اۋدانىندا 15 وتباسى 17 بالانى قابىلداسا, ونىڭ 13-ءى– وقۋشىلاردىڭ تۋىستارى. بالانى قامقورلىعىنا العان وتباسىعا اي سايىن 45 مىڭ تەڭگە مولشەرىندە ەڭبەكاقى مەن 7 اەك كولەمىندە قوسىمشا اقى تولەنەدى.
ايماق باسشىسى قۇمار اقسالوۆ جوباعا وزگە اۋدارداردى دا تارتۋ قاجەتتىگىن, جاڭا وقۋ جىلىندا وعان قاتىسۋشىلار سانىن ەكى ەسەگە دەيىن ارتتىرۋ مۇمكىندىكتەرىن قاراستىرۋدى, تۇرعىنى از شاعىن اۋىلدار ۋاقىت وتە كەلە جابىلاتىنىن الدىنالا ەسكەرىپ, كۇنىبۇرىن قام جاساۋدى ءتيىستى ورىندارعا جۇكتەدى.
سولتۇستىك قازاقستان وبلىسى