قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆ بەلگىلەگەن جاستار جىلى ەلىمىزدىڭ دارىندى بالالارىنا قۇرمەت كورسەتۋدىڭ العاشقى سالتاناتىن وتكىزۋدىڭ تاڭداۋى قوستاناي قالاسىنا ءتۇستى. بۇل قوستانايلىقتار ءۇشىن زور مارتەبە, ماقتانىش ەكەنى ايان. مۇنى وبلىس اكىمى ارحيمەد مۇحامبەتوۆ رەسپۋبليكالىق بەدەلدى بالالار سىيلىعىنىڭ العاشقى لاۋرەاتتارىن قۇتتىقتاعاندا دا اتاپ ءوتتى.
– ەلىمىزدىڭ بولاشاعىنا بالايتىن جاس دارىندارعا ارنالعان بۇل سىيلىقتى تۇڭعىش تاپسىرۋدىڭ توبىل-تورعاي وڭىرىندە ءوتۋى بەكەر ەمەس دەپ بىلەمىز. ويتكەنى قوستاناي – حالقىمىزدىڭ تۇڭعىشتارىن بەرگەن توپىراعى قۇنارلى, قاسيەتتى ولكە. قوس وزەننىڭ بويىندا تۇڭعىش رەت تارحان اتاعىن العان باتىر, مامىلەگەر شاقشاق جانىبەك, تۇڭعىش عالىم شوقان, تۇڭعىش اعارتۋشى ىبىراي, تۇڭعىش قازاق رومانىن جازعان مىرجاقىپ, تۇڭعىش كاسىبي دارىگەر مۇحامەدجان قاراباەۆ, تۇڭعىش جۋرناليست مۇحامەدجان سەرالين, تاعى باسقا ىرىلەرىمىز تۋىپ, بالالىق شاعىن وتكىزدى. بۇگىن توپ جارىپ, سىيلىق الاتىن جاس ورەندەرىمىز ەرتەڭ ەلىمىزدىڭ كوك بايراعىن جەلبىرەتىپ, تالاي حالىقارالىق دەڭگەيدەگى اسۋلاردى اسىپ, بيىكتەردى باعىندىراتىنىنا ءبىز سەنىمدىمىز. جاس دارىنداردى جەتىستىكتەرىمەن قۇتتىقتاي وتىرىپ, سىزدەردىڭ ىزدەنۋلەرىڭىزگە, ەڭبەك ەتۋلەرىڭىزگە ەلباسى نۇرسۇلتان نازارباەۆتىڭ سىندارلى ساياساتى ارقاسىندا ەلىمىزدە بارلىق جاعداي جاسالعاندىعىن ايتقىم كەلەدى. ءبىزدىڭ وبلىستا دا مۇنىڭ جاقسى مىسالدارى بار, – دەدى ارحيمەد بەگەجان ۇلى.
«جاس وركەن» بالالار سىيلىعى 14 اتالىم بويىنشا ەلىمىزدىڭ 8 وبلىسىنان كەلگەن 28 جاس دارىنعا جانە مۇنىڭ سىرتىندا قوسىمشا اتالىمدارمەن بالالار مەن جاسوسپىرىمدەر ۇيىمدارى مەن گازەتتەر, بالالار تاقىرىبىنا ارنالعان جوبالارعا تاپسىرىلدى. سىيلىققا يە بولعان جاس دارىندار ىشىندە قارىمى قازىردەن كورىنگەن قالامگەرلەر, انشىلەر, بيشىلەر, شەشەندەر, اقىندار, بلوگەرلەر, سپورتشىلار, زەرتتەۋشىلەر, تاعى باسقالار بار. ولاردىڭ ارقايسىسى وسى سىيلىققا دەيىن وزدەرىن رەسپۋبليكالىق, حالىقارالىق بايقاۋلاردا مويىنداتىپ ۇلگەرگەن. انا ءسۇتى اۋزىنان كەتپەگەن بالا بولسا دا, ولاردىڭ بۇعاناسى قاتپاي جاتىپ, شىعارماشىلىق جولى, تىندىرعان ءىسى تاڭعالارلىق. ال وسى بايقاۋدىڭ باس جۇلدەسى «جىل تاڭداۋى» اتالىمى ءانشى بالا ەرجان ماكسيمگە بەرىلدى. رەسەيدىڭ «ءبىرىنشى ارناسىنىڭ» «گولوس. دەتي» تەلەجوباسىنا قاتىسقاننان كەيىن رەسەيدىڭ ايگىلى ماماندارىنىڭ جوعارى باعاسىنا يە بولىپ, تالانتى جارقىراپ كورىنگەن 12 جاسار بالانىڭ اتى قازىر الىسقا كەتىپ ۇلگەردى, ەرجاننىڭ ەسىمى ءبۇگىندە ەلدىڭ اۋزىنان تۇسپەيدى. ول قوستانايعا قۇرقول كەلمەپتى, سالتاناتتى شاراعا قاتىسقاندار الدىندا ءان شىرقاپ بەردى. وعان وبلىس اكىمى ارحيمەد مۇحامبەتوۆ «جاس وركەن» سىيلىعىنىڭ مازمۇنىن سىيدىرعان ءمۇسىنشەنى, ديپلوم, اقشالاي سىيلىق سەرتيفيكاتىمەن بىرگە التىنمەن اپتالعان ەكسكليۋزيۆتى ۇيالى تەلەفون سىيلادى.
«بولار ەلدىڭ بالاسى ون بەسىندە باسپىن دەر» دەگەن عوي حالقىمىز. ەرجان ون ەكىگە ەندى كەلدى. ويىن بالاسى كەزى, بىراق ول ويىن ەمەس, ويدىڭ جەتەگىندە, الدىنا قويعان ماقساتى بيىك. جۋرناليستەردىڭ قاۋمالاپ, «بالاڭىز ۇلكەن ساحناعا تىم ەرتە شىقتى, بۇل ءسىزدى انا رەتىندە قوبالجىتپاي ما؟ الدا قانداي جوسپارلارى بار؟» دەگەن سۇراقتارىنا اناسى گۇلميرا الىبەك سەنىمدى جاۋاپ بەردى.
– ەرجان وسىعان دەيىن كوپتەگەن بايقاۋلارعا قاتىستى, ءوزىن ساحنادا ەركىن, سەنىمدى ۇستايدى. وعان مەنىڭ دە سەنىمىم مول. العا قويعان ۇلكەن جوسپارلارى بار, بىراق ونى ايتقىم كەلمەيدى, بالام ءالى جاس, – دەدى گۇلميرا. قازاقتىڭ قارا دومالاق بالاسىنىڭ داۋىسىنا بەرىسى رەسەي, ارىسى ەۋروپا ەلدەرى ءتانتى بولدى. قازىر ءبىر جاعىنان مەكتەپتەگى ساباعىنا, ەكىنشىدەن بايقاۋلارعا دايىندىق, مۋزىكالىق ءبىلىمىن ۇشتاۋ جۇمىستارىنا ۇلگەرۋى ءتيىس ەرجاننىڭ ۋاقىتى دا تىعىز. ول اناسىمەن بىرگە قوستانايداعى شارا باستالار الدىندا 10 مينۋت قانا بۇرىن ۇشىپ كەلىپ, بايقاۋ اياقتالعان سوڭ «گولوس. دەتي» شۋلى جوبانىڭ قايتا وتەتىن فينالىنا قاتىسۋ ءۇشىن جولسوقتى بولىپ, ماسكەۋگە ءجۇرىپ كەتتى.
«جاس وركەن» بالالار سىيلىعىن العان ۇزدىكتەر قاتارىندا قوستانايلىق بەس تالانت توبە كورسەتتى. مىسالى, سولاردىڭ اراسىندا «جاس زەرتتەۋشى» اتالىمىنىڭ جەڭىمپازى الديار ءامىروۆ ينفورماتيكانى قىزىعا زەرتتەيدى. رەسپۋبليكالىق, حالىقارالىق بايقاۋلاردان جۇلدەسىز ورالعان ەمەس. ول مەكتەپتى بىتىرگەن سوڭ پروگرامميست ماماندىعىن يگەرىپ, زەرتتەۋمەن, عىلىممەن اينالىسۋدى ماقسات تۇتادى. ارقالىق قالاسىنداعى ەلەنا تسۆەنتۋح باسقاراتىن, جاس ۇرپاققا ەلگە, جەرگە دەگەن پاتريوتتىق تاربيە بەرۋدەگى جارقىن ىستەردىڭ ۇلگىسىن كورسەتىپ جۇرگەن «جاس ۇلان» بالالار مەن جاسوسپىرىمدەر ورتالىعى دا سىيلىققا لايىق دەپ تابىلدى.
دارىندى بالالاردىڭ ەڭبەگىن ەلەۋدى, ولاردى ناسيحاتتاۋدى ماقسات تۇتقان جوبانىڭ ۇيىمداستىرىلۋى دا ەرەكشە ەكەنىن ايتقىمىز كەلەدى. ۇزدىكتەردى ىرىكتەۋگە ۋاقىت, زامان تالابىنا ساي ينتەرنەت جەلىسى ارقىلى بۇقارا كوپشىلىكتىڭ ءوزى اتسالىستى.
– بۇل «حالىق سۇيىكتىسى» ۇلتتىق سىيلىعى اياسىنداعى بالالارعا ارنالعان العاشقى جوبا. بايقاۋدىڭ شارتتارى فەيسبۋك جەلىسىندە جاريالاندى. جەلىدە جۇرتشىلىق 14 اتالىم بويىنشا ءوزىنىڭ سۇيىكتىسىن ۇسىنۋ كەرەك بولاتىن. 300-دەن اسا پىكىرلەر مەن ۇسىنىستار جازىلدى. سەناتور بىرعانىم ءايتىموۆا باسقاراتىن قۇرامىنا قوعام بەلسەندىلەرى, پارلامەنت دەپۋتاتتارى كىرگەن قازىلار القاسى جۇمىس ىستەدى. بايقاۋدىڭ ەكىنشى ساتىسىنا ءار اتالىمنان 4 ۇمىتكەردى الىپ, ولاردىڭ اراسىندا داۋىس بەرۋ باستالدى. بۇل جەردە قازىلار القاسى بايقاۋ ءتارتىبى جۇيەسىنىڭ بۇزىلماۋىن عانا قاداعالاپ وتىردى, ال داۋىس بەرىپ, كىمنىڭ قانداي ورىنعا, گران-پريگە كىمنىڭ لايىقتى ەكەنىن الەۋمەتتىك جەلىدە جۇرتشىلىق ءوزى شەشتى, – دەيدى «رەسپۋبليكا-ءوڭىر-دامۋ» قوعامدىق قورىنىڭ اتقارۋشى ديرەكتورى الىبەك باينەشوۆ.
مىنە, «جاس وركەن» بالالار سىيلىعىن العان جاس دارىندار وسىنداي جۇيەمەن انىقتالدى. تايىندا وزعان دارابوزداردى حالىق ءوزى كورەدى ەكەن.
قوستاناي