مەملەكەت باسشىسى وڭىرگە جۇمىس ساپارى بارىسىندا «سارىارقااۆتوپروم» اۆتوموبيل قۇراستىرۋ كاسىپورنىنىڭ جۇمىسىمەن تانىستى.
قاسىم-جومارت توقاەۆقا زاۋىتتىڭ دامۋ پەرسپەكتيۆالارى مەن جاڭا ءوندىرىس قۋاتىن قالىپتاستىرۋ ستراتەگياسى جونىندە باياندالدى. سودان كەيىن قازاقستان پرەزيدەنتى شاناقتاردى بويايتىن امبەباپ تسەحتىڭ جانە ءىرى بولشەكتەر ارقىلى قۇراستىرۋ ءادىسى بويىنشا (DKD) اۆتوموبيلدەردى سەرياسىمەن شىعارۋ تسەحىنىڭ جۇمىستارىمەن تانىستى.
مەملەكەت باسشىسى قازاقستاننىڭ بۇگىندە الەمدىك ساپا ستاندارتىنا سايكەس زاماناۋي جوعارى تەحنولوگيالىق ەكونوميكا قۇرىپ جاتقانىن اتاپ ءوتتى.
جالپى زاۋىتتىڭ وندىرىستىك قۋاتى – جىلىنا 28 مىڭنان استام اۆتوموبيل. كاسىپورىن قازىرگى ۋاقىتتا Ankai, MAN, JAC, HYUNDAI جانە Lovol اۆتوموبيل ماركالارىن شىعارادى.
سونىمەن قاتار, وسى سالادا جۇمىس ىستەيتىن شەتەلدىك ينۆەستورلار قازاقستان پرەزيدەنتىنە وزدەرىنىڭ جوباسىن تانىستىردى.