بيىل جانسۇگىروۆ اۋىلىنىڭ وڭتۇستىك-شىعىسىنان جاڭادان 20 ءۇي سالىنىپ, پايدالانۋعا بەرىلە باستاعان ەدى. «نۇرلى جەر» باعدارلاماسى بويىنشا بوي كوتەرگەن باسپانالاردا قازىر كۇن سايىن قونىس تويى تويلانۋدا. نەگىزىنەن الەۋمەتتىك جاعىنان ءالسىز قورعالعان سانات وكىلدەرى پەن مەملەكەتتىك قىزمەتشىلەرگە بەرىلىپ جاتقان ۇيلەر جاڭا ۇلگىدە سالىنعان. سامالعا بۇيىرعان 3 بولمەلى ءۇيدىڭ اۋماعى 68,43 شارشى مەتر ەكەن. ەندى «التىن القالى» انانىڭ ماديار, دانيار, ديانا, بەيبىت جانە اليا, اقبوتا, جانارىس اتتى ۇل-قىزدارى وسى كەڭسارايداي ۇيدە وسەتىن بولدى.
- اۋدانداعى كوپبالالى وتباسىلارعا بارىنشا قولداۋ كورسەتىپ جاتىرمىز. قازىر 58 كوپبالالى جانە الەۋمەتتىك جاعدايى تومەن وتباسى ءۇي كەزەگىنە تىركەلگەن. ونىڭ ىشىندە ۇشەۋى «التىن القا», ون ەكىسى «كۇمىس القا» يەگەرلەرى. ولاردىڭ دا ماسەلەسىن رەتىمەن شەشەمىز, - دەيدى اقسۋ اۋدانىنىڭ اكىمى ەسىم بازارحانوۆ.