بۇل تۋىندى – قان مايداندا شەيىت بولعان بوزداقتاردىڭ رۋحىنا, تىلداعى حالىقتىڭ ەرەن ەڭبەگىنە جاسالعان تاعزىم.
قويىلىمدا تىلداعى حالىقتىڭ سوعىس جىلدارىنداعى شەككەن بەينەتى, جاۋدى جەڭۋگە قوسقان ۇلەسى باياندايدى. مايدانداعى جاۋىنگەرلەردىڭ باسىنان وتكەن وقيعالار دا سۋرەتتەلەدى. رەكۆيەمنىڭ سوعىس تاقىرىبىنا ارنالعان شىعارمالاردان باستى ەرەكشەلىگى, مۇندا قوستانايلىق مايدانگەرلەردىڭ اتى-ءجونى, ولار تۋرالى شىنايى دەرەكتەر پايدالانىلعان. بۇل بۇگىندە تەاتردىڭ ادەبيەت ءبولىمىنىڭ مەڭگەرۋشىسى ابىلاي ماۋداننىڭ كۇردەلى جانردا قويىلىپ وتىرعان العاشقى تۋىندىسى. رەجيسسەرى – تەاتردىڭ كوركەمدىك جەتەكشىسى ءاليا بايماحان.
قويىلىم بارىسىندا قاھارلى جىلدارى تۋعان, حالىققا رۋح بەرىپ, ءۇمىت سىيلاعان, كوڭىلىن دەمدەگەن اندەر جاندى داۋىسپەن شىرقالدى. ارتىستەردىڭ انشىلىك قابىلەتى, ولاردىڭ داۋىس ۇيلەسىمى دە كورەرمەندەردى ەرەكشە ءتانتى ەتتى.
"رەكۆيەم كورەرمەنگە ءتۇرلى وي سالدى. تاريحي مالىمەتتەردى مولىنان قامتىعان. جاندى داۋىستا شىرقالعان اندەر جۇرەك تەبىرەنتتى. سوندىقتان, جەڭىس كۇنىنە ارنالعان بۇل قويىلىمدى تەاتر ارتىستەرىنەن قۇرىلعان كامەرالىق حوردىڭ رەسمي اشىلۋى دەپ ەسەپتەيمىن. ارينە, ءاۋ دەمەيتىن قازاق جوق, بىراق, وزدەرىڭىز بايقاعان شىعارسىزدار, ءبىزدىڭ ترۋپپامىز شەتىنەن ءانشى…" دەدى وبلىستىق مادەنيەت باسقارماسىنىڭ باسشىسى ەرلان قالماقوۆ.
«تەاتر جانىنان حور اشۋعا مادەنيەت باسقارماسىنىڭ قولداۋىمەن وتكەن جىلدىڭ سوڭىنا تامان تالاپتانعان ەدىك. ءاليا بايماحان قويعان «ءانىم سەن ەدىڭ» سپەكتاكلى سول نيەتىمىزگە دەگەن العاشقى قادام بولدى. مۋزىكا مامانى سالتانات جاقاەۆانىڭ ازىرلەۋىمەن حور رەپەرتۋارى ۇنەمى تولىعۋمەن كەلەدى. بۇل باعىتتاعى ىزدەنىستى جۇمىستارىمىز ءالى دە جالعاسىن تابا بەرەدى» دەيدى ابىلاي ماۋدان.