«اقتوبە حروم قوسىندىلارى زاۋىتى» اق قازاقستانداعى جالعىز جانە حروم نەگىزىندەگى جوعارى ساپالى حروم قوسىندىلارىن ءوندىرۋ جانە ەكسپورتتاۋ بويىنشا الەمدىك نارىقتاعى جەتەكشى كاسىپورىنداردىڭ ءبىرى بولىپ تابىلادى. زاۋىت 1957 جىلدىڭ شىلدە ايىندا ىسكە قوسىلدى. بۇگىنگى تاڭدا زاۋىت ونىمدەرى 40-تان استام شەت ەلدەرىنە, ونىڭ ىشىندە ءۇندىستان, اقش, جاپونيا, قىتاي, وڭتۇستىك كورەيا, اۆستراليا جانە ت. ب. ەلدەرگە ەكسپورتتالادى.
- اقتوبە وبلىسىنا جۇمىس ساپارىمىزدىڭ نەگىزگى ماقساتى – وزەكتى ماسەلەلەردى تۇعىنداردىڭ ءوز اۋزىنان ەستىپ, شەشۋگە اتسالىسۋ, - دەپ اتاپ ءوتتى ءماجىلىستىڭ الەۋمەتتىك-مادەني دامۋ كوميتەتىنىڭ حاتشىسى بەيبىت مامراەۆ. دەپۋتاتتارمەن اڭگىمەلەسۋ بارىسىندا زاۋىت قىزمەتكەرلەرى پاتەر الۋدا العاشقى جارنانى سۋبسيديالاۋ, زەينەتكەرلىككە شىعۋ جاسىن قىسقارتۋ, قالانى كوگالداندىرۋ ماسەلەلەرىن قوزعادى. جاستارعا ارنالعان باسپانا الۋداعى باعدارلاماعا قاتىسۋ ماسەلەلەرى دە قوزعالدى.
حالىق قالاۋلىلارى تۇرمىسى تومەن جانە كوپ بالالى وتباسىلاردى مەملەكەتتىك قولداۋ ماسەلەسىنە ەرەكشە توقتالدى. ءماجىلىس دەپۋتاتى قانات مۋسين اتاپ وتكەندەي, بۇل ماسەلەنى شەشۋ ءۇشىن قازىر كوپ نارسە جاسالۋدا, ال انىقتالعان پروبلەمالار ۇكىمەتپەن بىرلەسىپ تالقىلانادى.
- جەرگىلىكتى جەرلەردە ءبىز ءبىراز ماسەلەلەردى انىقتادىق. ەندى قايتىپ ورالعاننان كەيىن ۇكىمەتپەن وسى كومەكتى الۋعا ۇمىتكەر وتباسىنىڭ تابىسىن انىقتاۋ ماسەلەلەرىن تالقىلاۋعا نيەتتەنىپ وتىرمىز. ويتكەنى ءبىز تابىستى انىقتاۋ تۋرالى كوپتەگەن شاعىمدار ەستىدىك. مۇمكىن ءۇي مالىنىڭ بار-جوعىن ەسكەرۋدىڭ قاجەتى جوق شىعار, سەبەبى ونىڭ بولجامدى تابىسى عانا ەمەس, ونى ۇستاۋعا جۇمسالاتىن شىعىنداردى دا ەسكەرۋ قاجەت, - دەدى ول.
ماجىلىسمەندەر, سونداي-اق, وبلىستىڭ ىرعىز, ايتەكە بي, مارتوك جانە بايعانين اۋداندارىنىڭ تۇرعىندارىمەن كەزدەسۋلەر وتكىزدى.