35 جاتىن ورىنعا لايىقتالعان مەديتسينالىق نىسانعا تولىقتاي زاماناۋاي قۇرىلعىلار قويىلعان. جىلىنا 5 مىڭداي ناۋقاستى قابىلداۋعا قاۋقارلى. كلينيكانىڭ جۇمىسىمەن تانىسقان پارلامەنت ءماجىلىسىنىڭ دەپۋتاتتارى سەرگەي زۆولسكي, قۇرالاي كارەكەن, كارىباي مۇسىرمان, ارتۋر پلاتونوۆقا وسىنداي مالىمەتتەر ۇسىنىلىپ, ەندى شەتەلگە شىقپاي-اق ەۋروپالىق دەڭگەيدە جۇمىس ىستەيتىن جوعارى مامانداندىرىلعان وفتالمولوگيالىق دياگنوستيكالىق كەشەن جايلى باسقا دا دەرەكتەر كولدەنەڭ تارتىلدى. ماسەلەن, قانت ديابەتى بار ادامداردىڭ كوز اۋرۋلارى لازەر ارقىلى تەز-اق انىقتالادى. سول سياقتى كوزدىڭ تور قابىعىن, كورۋ جۇيكەسى دىمكاستىگىن جەدەل ەمدەۋ جولدارى دا قاراستىرىلعان.
– تاۋلىك بويى ەمدەۋ, كۇندىزگى ستاتسيونار, جەدەل جاردەم قىزمەتى, وتا, لازەرلىك وتا, دياگنوستيكا قىزمەتتەرىنىڭ ءبىر جەردە بولۋى جاعىنان تەڭدەسسىز مۇنداي بىرەگەي ورتالىق ەلىمىزدىڭ وزگە وڭىرلەرىندە جوق. از قامتىلعان جاندار ءۇشىن وتانىڭ تەگىن جاسالاتىنى الەۋمەتتىك زور كومەك ەكەنىن اتاپ وتكىم كەلەدى. مەكەمەنىڭ وتە جاقسى جابدىقتالعانى, ەمدەلۋشىلەر ءۇشىن بارلىق جاعدايدىڭ تۋدىرىلعانى ساپالى ەم-دوم الۋدىڭ تاماشا مۇمكىندىكتەرى بولىپ تابىلادى, – دەدى ۇجىممەن كەزدەسۋ كەزىندە ا. پلاتونوۆ.
ورتالىقتىڭ مەڭگەرۋشىسى جاننا لاحينا جارتى ميلليارد تەڭگەگە بوي كوتەرگەن مەكەمەدە قىزمەتتەر تاۋلىك بويى كورسەتىلەتىنىن, اقىلى نەگىزدە دە جۇرگىزىلەتىنىن, كوپ وتالار مەملەكەتتىك تاسىرىس ارقىلى تەگىن بەرىلەتىنىن, بۇل ماقسات ءۇشىن 340 ميلليون تەڭگە بولىنگەنىن جەتكىزدى. الداعى ۋاقىتتا مۇندا بالالار وفتالمولوگيا بولىمشەسىن ىسكە قوسۋ بەلگىلەنگەن. جەكە ينۆەستوردىڭ قارجىسىنا تۇرعىزىلعان كەشەن كەيىن مەملەكەتىڭ مەنشىگىنە وتەدى.
بۇگىندە وڭىردە گلاۋكوما, ميوپيا, كاتاراكتا سەكىلدى كوز اۋرۋلارىنا شالدىققان 7 مىڭ ناۋقاس ەسەپتە تۇرسا, 2,5 مىڭدايى – جاسوسپىرىمدەر مەن بالالار.