2019 جىلدىڭ 26 ساۋىرىندە بەيجىڭدە (قحر) «ءبىر بەلدەۋ - ءبىر جول» ەكىنشى حالىقارالىق ىنتىماقتاستىق فورۋمىنىڭ سالتاناتتى اشىلۋى ءوتتى.
فورۋم اياسىندا قازاقستان رەسپۋبليكاسى قارجى مينيسترلىگى مەملەكەتتىك كىرىستەر كوميتەتىنىڭ توراعاسى مارات سۇلتانعازيەۆ پەن قحر باس كەدەن باسقارماسى ءمينيسترىنىڭ ورىنباسارى لي گو مىرزا قازاقستان رەسپۋبليكاسى پرەمەر-ءمينيسترىنىڭ ورىنباسارى جەڭىس قاسىمبەك جانە قحر باس كەدەن باسقارماسىنىڭ ءمينيسترى ني يۋەفەن قاتىسۋىمەن كەدەندىك اكىمشىلىكتەندىرۋ سالاسىنداعى بىرقاتار سەرپىندى جانە ستراتەگيالىق قۇجاتتارعا قول قويدى.
كەدەندىك باقىلاۋدىڭ تيىمدىلىگىن ارتتىرۋ جانە قازاقستان مەن قىتاي اراسىنداعى ءوزارا ساۋدا ستاتيستيكاسىنداعى سايكەسسىزدىكتەردى ازايتۋ ماقساتىندا جۇك تۋرالى تولىق اقپاراتتى ونلاين رەجيمىندە الۋ ءۇشىن قازاقستان رەسپۋبليكاسى جانە قىتاي حالىق رەسپۋبليكاسىنىڭ كەدەندىك شەكارالارى ارقىلى تاسىمالداناتىن تاۋارلار مەن كولىك قۇرالدار تۋرالى الدىن-الا اقپارات الماسۋ تۋرالى حاتتاماعا قول قويىلدى.
بۇل حاتتاما قحر ەكسپورتىنىڭ الدىن-الا دەرەكتەرىن قازاقستان يمپورتىمەن سالىستىرىپ, تەكسەرۋ ۇدەرىسىن اۆتوماتتاندىرۋعا مۇمكىندىك بەرەدى. ول ءوز كەزەگىندە جالعان مالىمدەۋ جانە كەدەندىك قۇندى تومەندەتۋ فاكتىلەرىن انىقتاۋداعى ادام فاكتورىن بارىنشا ازايتادى.
بۇدان باسقا, تاۋارلارعا ماعلۇمداما ءنومىرى تۇرعىسىندا الماستىرىلاتىن اقپاراتتىڭ كەڭەيتىلگەن قۇرامىن ەسكەرە وتىرىپ, سىرتقى ساۋدا بويىنشا كەدەندىك ستاتيستيكا سالاسىندا ادىستەمەلىك جانە اقپاراتتىق حاتتاماعا قول قويىلدى. ول قازاقستان مەن قىتاي اراسىنداعى ءوزارا ساۋدا دەرەكتەرىن سالىستىرمالى تالداۋ تيىمدىلىگىن ارتتىرادى.
«ەكى ەلدىڭ كەدەن قىزمەتتەرى تاۋارلار تۋرالى, سونىڭ ىشىندە كەدەندىك قۇن تۋرالى اقپاراتتى ونلاين رەجيمىندە ءوزارا بەرۋ تۋرالى كەلىستى. بۇل تاريحي شەشىم. مۇنداي ءوزارا ارەكەتتەستىكتىڭ نەگىزگى مىندەتى كەدەندىك ستاتيستيكا اراسىنداعى ايىرماشىلىق دەڭگەيىن ازايتۋ», دەدى قارجى مينيسترلىگى مەملەكەتتىك كىرىستەر كوميتەتىنىڭ توراعاسى مارات سۇلتانعازيەۆ.
سونداي-اق قازاقستان مەن قىتاي ۋاكىلەتتى ەكونوميكالىق وپەراتورلارىن ءوزارا تانۋ تۋرالى مەموراندۋمعا قول قويىلدى. مارات سۇلتانعازيەۆتىڭ ايتۋىنشا, ۋاكىلەتتى ەكونوميكالىق وپەراتورلاردى ءوزارا تانۋ تۋرالى مەموراندۋم بويىنشا جۇمىس 5 جىل بويى جۇرگىزىلدى. كەدەندىك راسىمدەۋ مەن باقىلاۋ ءراسىمىن وڭايلاتۋ قر ۋەو كومپانيالارىنىڭ قىتاي كەڭ نارىعىنا قول جەتكىزۋىن جەڭىلدەتەدى. يمپورت, ەكسپورت جانە لوگيستيكالىق ينفراقۇرىلىمدى دامىتۋعا جاڭا مۇمكىندىكتەر بەرەدى. وسىلايشا قازاقستان ەكونوميكاسىن ودان ءارى تۇراقتى دامىتۋ ءۇشىن جاعدايلار جاسايدى.