ساپار بارىسىندا «ينۆەستيتسيالىق احۋالدى دامىتۋ: وڭدەۋشى ونەركاسىپ سالاسىنا ستراتەگيالىق ينۆەستورلاردى تارتۋ جانە ەكونوميكانىڭ باسىم سەكتورلارىندا «زاكىرلىك ينۆەستورلارمەن» بىرلەسكەن كاسىپورىندار قۇرۋ» تاقىرىبىنا ارنالعان دوڭگەلەك ۇستەل وتىرىسى ءوتتى.
شاراعا سىرتقى ىستەر, ۇلتتىق ەكونوميكا, ەنەرگەتيكا مينيسترلىكتەرىنىڭ, ۇلتتىق كاسىپكەرلەر پالاتاسىنىڭ, «Kazakh Invest» اكتسيونەرلىك قوعامىنىڭ, «استانا» حالىقارالىق كەشەنىنىڭ وكىلدەرى جانە وبلىس اكىمى ن.نوعاەۆ قاتىستى.
سەناتور ولگا پەرەپەچينا دوڭگەلەك ۇستەلگە قاتىسۋشىلارعا ارناعان سوزىندە ەلىمىزدىڭ ينۆەستيتسيالىق احۋالى سالاسىندا اتقارىلعان جۇمىستار تۋرالى ايتىپ بەردى. «قازاقستان رەسپۋبليكاسى تۇڭعىش پرەزيدەنتىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى قازاقستان حالقىنا جولداۋىندا بەرىلگەن تاپسىرماسىنا سايكەس ۇكىمەت ونداعى ماقساتتارعا قول جەتكىزۋ ءۇشىن «ۇلتتىق ينۆەستيتسيالىق ستراتەگيا» ينۆەستيتسيالاردى تارتۋ باعدارلاماسىن» ازىرلەپ, بەكىتكەن بولاتىن. قازىرگى ۋاقىتتا ينۆەستيتسيالىق احۋالدى جاقسارتۋ جونىندەگى وزەكتى ماسەلەلەردى جويۋ ءۇشىن ۇكىمەت كاسىپكەرلىك قىزمەت سالاسىنداعى, ونىڭ ىشىندە سالىق سالاسىنداعى زاڭنامانى جەتىلدىرۋ ماسەلەلەرىن پىسىقتاۋدا», دەدى سەناتور.
دەپۋتات سونداي-اق اتىراۋ وڭىرىندەگى وتاندىق جانە شەتەلدىك ينۆەستورلار ءۇشىن ينۆەستيتسيا تارتۋدىڭ ەرەكشەلىگى مەن ماڭىزدىلىعىن اتاپ ءوتتى.
دەپۋتاتتار مەملەكەتتىك ورگاندار مەن بيزنەس قاۋىمداستىعى وكىلدەرىنىڭ سوزدەرىن تىڭداپ, نەعۇرلىم ماڭىزدى ماسەلەلەر بويىنشا ءتۇرلى كوزقاراستاردى تالقىلادى. اتاپ ايتقاندا, سالىقتىق جەڭىلدىكتەردى بەرۋدىڭ تيىمدىلىگى, شەتەلدىك جۇمىس كۇشىن تارتۋ جونىندەگى راسىمدەردى وڭايلاتۋ, مەملەكەتتىك بيۋدجەتكە تۇسەتىن اۋىرتپالىقتى ازايتۋ قۇرالى رەتىندە مەملەكەتتىك-جەكە مەنشىك ارىپتەستىك تەتىكتەرى, ءونىمنىڭ جاڭا تۇرلەرى نارىعىنا مونيتورينگ جۇرگىزۋ جانە تيىمدىلىگى تومەن ارنايى ەكونوميكالىق ايماقتارعا ينۆەستيتسيالار اعىنىن ۇلعايتۋ ماسەلەلەرى سارالاندى.
سونىمەن قاتار ينۆەستيتسيالىق احۋالدى ودان ءارى جاقسارتۋ ءۇشىن ينۆەستورلاردىڭ قازاقستان سوتتارىنا الدىن الا مىندەتتى تۇردە ءوتىنىش جاساماي, استانا حالىقارالىق قارجى ورتالىعى سوتىنا نەمەسە حالىقارالىق اربيتراجعا جۇگىنۋ قۇقىعىن ەنگىزۋ, سونداي-اق قازاقستان رەسپۋبليكاسىندا احقو شەشىمدەرىنىڭ مىندەتتى تۇردە ورىندالۋىن قاراستىرۋ, ءىرى ينۆەستوردىڭ ينفراقۇرىلىمدى جۇرگىزۋ شىعىندارىن وتەۋ مۇمكىندىگىن قاراۋ, ينۆەستيتسيالاردى تارتۋ جونىندەگى كەشەندى ەكوجۇيە ازىرلەۋ, ونىڭ ىشىندە جەكە جانە شەتەلدىك كومپانيالاردىڭ ۆاليۋتالىق قاۋىپتەرىن حەدجيرلەۋ قۇرالدارىن جاساۋعا بايلانىستى شارالار قابىلداۋ تۋرالى ۇسىنىستار ايتىلدى.
دوڭگەلەك ۇستەل بارىسىندا ايتىلعان ۇسىنىستاردى جۇزەگە اسىرۋ ءۇشىن ۇكىمەتكە جىبەرىلەتىن ۇسىنىمدار جوباسى ازىرلەندى.
بۇدان ءارى سەناتورلار قاراباتان ونەركاسىپ الاڭىنا بارىپ, ۇلتتىق مۇناي-حيميا يندۋسترياسى تەحنوپاركىندە بولدى. ءوندىرىس باسشىسى ا.جانتايلاقوۆ بۇل جوبانىڭ قۇرىلىسى كەزىندە 3 مىڭعا جۋىق ادام, كەيىننەن پايدالانۋعا بەرىلگەندە 550 ادام جۇمىس ىستەيتىنىن اتاپ ءوتتى. «پوليمەر پروداكشن» مەكەمەسىنىڭ باسشىسى ق.بيماعامبەتوۆ پوليەتيلەن ونىمدەرىن ءوندىرۋ جونىندەگى جوسپارلارىمەن تانىستىردى.
جۇمىس ساپارى اياسىندا سەناتورلار ارنايى ەكونوميكالىق ايماق پەن جەكە يندۋستريالىق ايماقتىڭ بىرقاتار نىساندارىن ارالاپ, جۇمىسىمەن تانىستى.