وسىنداي تاريحي جادىگەردىڭ ءبىرى – جامبىل وبلىسى قورداي اۋداندىق ك.ازىرباەۆ اتىنداعى ادەبي-مەموريالدىق مۋزەيدە تۇرعان كەنەن اتانىڭ دومبىراسى. – مەن اكەمنىڭ جەتى دومبىراسىن كوردىم, – دەيدى جىرشى بابامىزدىڭ بالاسى باقىتجان اعا. – سونىڭ ىشىندە «كەنەنىڭ كەر دومبىراسى» دەگەن بولدى. ونى اتاقتى قىرعىزدىڭ توكپە اقىنى سىيلاعان ەكەن. ودان كەيىن ءوزىم كورگەم جوق, 1910 جىلدار شاماسىندا ەركەباي بولىس جاساتىپ بەرگەن ەرەن دومبىراسى بولعانى تۋرالى ەستىگەنىم بار...
ال انا مۋزەيدەگى دومبىرانى كەنەكەڭنىڭ 75 جىلدىق تويىندا اكادەميك احمەت جۇبانوۆ ءوزى جاساتىپ اكەلىپ سىيلاعان ەكەن. مۇنداعى وزدەرىڭىز كورىپ وتىرعان سۋرەت سول تويدىڭ ءۇستىندە فوتواپپارات تاسپاسىنا ءتۇسىپ, كەيىن تاريحقا اينالعان ءبىر بەينە.
ءبىر قىزىعى, كەنەن اتامىزدىڭ بۇعان دەيىن ەشقانداي مەرەيتويى اتاپ وتىلمەپتى. العاش رەت 1954 جىلى ۇكىمەتىمىز اقىننىڭ 70 جىلدىق تويىن اتاپ ءوتۋدى جوسپارلاعانىمەن بۇل شارا كەڭەس ەلىنىڭ كوسەمى ءستاليننىڭ قايعىلى قازاسىمەن قاباتتاسىپ قالىپ, توقتاتىلعان كورىنەدى.
كەنەننىڭ مەرەيتويىنا قاتىسىپ, ءوزىنىڭ سىي-سياپاتىن جاساعان احمەت جۇبانوۆ ءوزىنىڭ ۇزاق جىلدار بويى جۇرگىزگەن عىلىمي-زەرتتەۋ جۇمىسىنىڭ ناتيجەسى «زامانا بۇلبۇلدارى» اتتى كىتابىنىڭ 2001 جىلى قايتالاپ باسىلعان نۇسقاسىندا: «1959 جىلى كەنەننىڭ 75 جاسقا تولۋ سالتاناتى ءوتتى. «توي دەسە قۋ باس دومالايدى» دەگەندەي, الماتىدان, تارازدان, باسقا قالالاردان, كورشىلەس قىرعىزدان كوپتەگەن ادامدار جينالدى. ول كۇنى كەنەن بۇرىنعىسىنان دا جاسارىپ, ۇنەمى جاڭا ءبىر اۋەندەرگە قۇرىلعان شىعارمالار ايتۋمەن بولدى. سونىمەن قاتار جاڭالىقتى كوركەم ءىزسىز قالدىرمايتىن اقىن, ءوزىنىڭ وسى ءبىر كەزەڭىنە, اسۋىنا ارناپ «جەتپىس بەس» دەگەن جاڭا ءانىن مەن سىيلاعان دومبىرامەن ايتىپ بەردى» دەپ ەسكە الىپتى.