سىرتقى ىستەر ءمينيسترى بەيبىت اتامقۇلوۆ ءبىزدىڭ ەلدەگى ديپلوماتيالىق قىزمەتىنىڭ اياقتالۋىنا بايلانىستى ماجارستاننىڭ توتەنشە جانە وكىلەتتى ەلشىسى اندراش ءبارانيدى قابىلدادى.
سىرتقى ساياسي ۆەدومستۆو باسشىسىنىڭ ايتۋىنشا, ماجارستاندىق ديپلومات ەكىجاقتى قارىم-قاتىناستاردى نىعايتۋ جولىندا جەمىستى ىستەر اتقاردى. ونىڭ جارقىن كۋاسى قازاقستان مەن ماجارستان اراسىنداعى جوعارى دەڭگەيدەگى بايلانىستاردىڭ قارقىندىلىعىنىڭ ارتۋى.
«ءبىزدىڭ ەلدەر ستراتەگيالىق ارىپتەستىك ورناۋىنىڭ 5-جىلدىعىن اتاپ ءوتتى. ءوزارا قۇرمەت پەن ءوزارا ءتيىمدى ىنتىماقتاستىق نەگىزىندە قالىپتاسقان ەكىجاقتى ءىس-قيمىلداردىڭ بۇدان بىلاي دا جاندانۋى ءۇشىن بارلىق كۇش-جىگەرىمىزدى سالۋىمىز كەرەك», - دەدى مينيستر.
ماجارستان قازاقستاندىق باستامالارعا قولداۋ كورسەتكەنى, سونداي-اق تۇراقتى كونسۋلتاتسيالار وتكىزۋ ارقىلى ەكى جاقتى سالالاردا جانە حالىقارالىق ارەنادا ىنتىماقتاستىقتى ودان ءارى نىعايتۋعا دەگەن نيەتى ءۇشىن ا.بارانيگە ريزاشىلىق ءبىلدىرىلدى.
ءسىم باسشىسى ماجارستان ەلشىسىنە ونىڭ بۇدان ءارى جالعاساتىن ديپلوماتيالىق قىزمەتىنە تابىستار تىلەپ, ول ارقاشاندا قازاقستاندا قۇرمەتتى قوناق ەكەندىگىن اتاپ ءوتتى. ماجارستان پرەمەر-ءمينيسترىنىڭ شەشىمىمەن ا.باراني سىرتقى ىستەر جانە ەكونوميكالىق بايلانىستار مينيسترلىگى مەملەكەتتىك حاتشىسىنىڭ ورىنباسارى لاۋازىمىنا تاعايىندالدى.