سەنات توراعاسى د.نازارباەۆا م.پەيچينوۆيچ-ءبۋريچتىڭ قازاقستانعا العاشقى رەسمي ساپارىمەن ەكى جاقتى قارىم-قاتىناستىڭ جاڭا پاراعى اشىلاتىنىنا سەنىم ءبىلدىردى. «ءبىز حورۆاتيانى قازاقستاننىڭ بالقانداعى ماڭىزدى ءارى كەلەشەگى زور سەرىكتەس رەتىندە قاراستىرامىز جانە بارلىق سالالار مەن بارلىق دەڭگەيلەردە ءوزارا ءىس-قيمىلدى دامىتۋعا مۇددەلىمىز», دەدى ول.
تاراپتار پارلامەنتارالىق بايلانىستاردى نىعايتۋدىڭ كەلەشەگىن تالقىلادى. سەنات باسشىسى حورۆات دەپۋتاتتارىن قازاقستانعا ساپارمەن كەلۋگە شاقىردى. پارلامەنت دەلەگاتسيالارىنىڭ ساپارلارى ءبىزدىڭ ساياسي ۇنقاتىسۋىمىزدى كەڭەيتۋمەن قاتار, ءوزارا ءىس-قيمىلدىڭ بارلىق سالالارى بويىنشا ەكىجاقتى قارىم-قاتىناستاردى ىلگەرىلەتۋگە مۇمكىندىك بەرەدى.
جوعارعى پالاتا باسشىسى ىنتىماقتاستىقتىڭ اۋىل شارۋاشىلىعى, تۋريزم, اقپاراتتىق تەحنولوگيالار, دەنساۋلىق ساقتاۋ سەكىلدى بولاشاعى زور باعىتتارىن اتاپ وتە كەلىپ, «حورۆاتيانىڭ وزىق تەحنولوگيالار مەن سەرۆيستىك سەكتورلارمەن قوسا اۋىل شارۋاشىلىعى تاجىريبەسى ءبىزدى ەرەكشە قىزىقتىرادى», دەدى. سونداي-اق قازاقستانداعى دەنساۋلىق ساقتاۋ سالاسىنداعى, اتاپ ايتقاندا, مۇمكىندىگى شەكتەۋلى ادامدارعا ارنالعان پروتەزدەر جاساۋ جونىندەگى بىرلەسكەن كاسىپورىندار سانىن ۇلعايتۋ قاجەتتىگى اتاپ ءوتىلدى. سەنات توراعاسىنىڭ تاعى ءبىر ۇسىنىسى – قازاقستان ازاماتتارىنا حورۆاتياعا ۆيزاسىز بارۋ ماسەلەسىن پىسىقتاۋ بولدى.
حورۆاتيا سىرتقى ساياسات مەكەمەسىنىڭ باسشىسى نۇر-سۇلتان قالاسىندا ءوز ەلىنىڭ ەلشىلىگىنىڭ اشىلعانى تۋرالى حاباردار ەتتى. ول ەلباسىنىڭ 2000-شى جىلداردىڭ باسىندا حورۆاتياعا ساپارى تۋرالى جىلى شىرايلى ەستەلىكتەرىمەن ءبولىسىپ, قازاقستان-حورۆات قاتىناستارىن دامىتۋعا جانە قازاقستاندى وركەندەتۋ جانە تۇراقتىلىعىن قامتاماسىز ەتۋگە قوسقان ۇلەسىن جوعارى باعالادى.