اۋەلگىدە وڭىردەگى جاس قالامگەرلەردىڭ باسىن قوسىپ, ورتاق شىعارماشىلىق اۋديتوريا قالىپتاستىرۋ ماقساتىندا «رۋحاني جاڭعىرۋ» باعدارلاماسى اياسىندا باستاۋ العان فورۋم بيىل «جاستار جىلىمەن» ۇشتاستى. سونداي-اق فورۋمدى ۇيىمداستىرعان الماتى وبلىسىنىڭ تىلدەردى دامىتۋ جونىندەگى باسقارماسى وسى جولعى «جەتىسۋ كوكتەمىن» كەگەن اۋدانىنىڭ اۋماعىنداعى تابيعات جاۋھارى – كولساي ماڭىندا, ساتى اۋىلىندا قارسى الۋدى ۇيعارىپتى. ەكى كۇنگە سوزىلعان شارادا جەتىسۋلىق قىرىقتان استام جاس ادەبيەتشىلەر مەن تىلشىلەر وي-پىكىر الماسىپ, ادەبي شەبەرلىك مەكتەبىنەن ءوتتى.
فورۋمنىڭ العاشقى كۇنى قاتىسۋشىلار «كولساي كولدەرى» ۇلتتىق تابيعي پاركى مەملەكەتتىك مەكەمەسىنىڭ عيماراتىندا سەكتسيالىق وتىرىستارعا قاتىستى. سەكتسيالىق جۇمىسقا ساتتىلىك تىلەگەن وبلىستىق تىلدەردى دامىتۋ جونىندەگى باسقارما باسشىسى ايدار باشباەۆ ءوڭىردىڭ جاس ادەبيەتشىلەرى مەن تىلشىلەرىنە الماتى وبلىسىنداعى ادەبيەتتى قولداۋ مەن مەملەكەتتىك ءتىلدىڭ قولدانىس اياسىن كەڭەيتۋگە وراي اتقارىلعان ىستەرگە توقتالدى. سەكتسيالىق وتىرىستىڭ ءوزى دە وسى ەكى تاقىرىپ اياسىندا جالعاستى. مۇندا فورۋمعا قاتىسۋشى جاس تىلشىلەر مەن قالامگەرلەر ءوز ويلارىن ورتاعا سالىپ, جاس اقىندار ولەڭ وقىدى.
- وتكەن جىلى ەلباسىنىڭ «بولاشاققا باعدار. رۋحاني جاڭعىرۋ» باعدارلامالىق ماقالاسىنىڭ نەگىزىندە «جەتىسۋ كوكتەمى» ادەبي فورۋمىنىڭ تۇساۋىن كەسكەن بولاتىنبىز. تالدىقورعان قالاسىندا وتكەن تۇڭعىش فورۋمدا ەلىمىزدىڭ بىرنەشە وبلىسىنان قوناقتار كەلىپ, جاس قالامگەرلەردى قازاقستان جازۋشىلار وداعىنىڭ مۇشەلىگىنە قابىلداۋ سالتاناتى وتكەن ەدى. وسى شارا جاستاردىڭ شىعارماشىلىعىنا سەرپىن بەرىپ, جاڭا ادەبي ورتا قالىپتاسۋعا جول اشقانىن بايقادىق. بيىل جاقسى ءىستى نەگە جالعاستىرماسقا دەپ شەشتىك. ءارى بيىل فورۋمنىڭ قالىبىنا ازداعان وزگەرىس ەنگىزىپ, تەك اقىن-جازۋشىلاردى عانا ەمەس, اۋداندارداعى بەتكە ۇستار بەلسەندى جاستاردى دا جينادىق. اسىرەسە, وزگە ەتنوستار وكىلدەرىنىڭ اراسىندا قازاق ءتىلىن ەركىن مەڭگەرگەن جاستاردى دا ورتامىزعا قوستىق. بۇل قوعامداعى ادەبيەتتىڭ وركەندەۋى مەن مەملەكەتتىك ءتىلدىڭ دامۋىنا جول اشادى, - دەيدى الماتى وبلىستىق تىلدەردى دامىتۋ جونىندەگى باسقارماسىنىڭ باسشىسى ايدار باشباەۆ.
ادەبي شارانىڭ ەكىنشى كۇنى ساتى اۋىلىنداعى مادەنيەت ۇيىندە جالعاستى. قاتىسۋشىلار مەن قوناقتار الدىندا باياندا جاساعان وبلىستىق تىلدەردى دامىتۋ جونىندەگى باسقارما باسشىسى ايدار باشباەۆ ايماقتاعى تىلدىك احۋالعا دا توقتالىپ, ەلىمىزدىڭ لاتىن نەگىزدى الىپبيگە كوشۋ بارىسىنداعى ماڭىزدى جۇمىستاردى دا تىلگە تيەك ەتتى. باسقارما باسشىسىنىڭ ايتۋىنشا, وبلىس تۇرعىندارىنىڭ 60 پروتسەنتتەن استامى لاتىن الىپبيىنە كوشۋدى قولداپ وتىر. وبلىستىق باسقارما ارقىلى «لاتىن الىپبيىنە كوشۋ – زامان تالابى» اتتى 19 بەينەروليك جاسالىپ, ول تەلەارنادان تۇراقتى كورسەتىلۋدە. بىرقاتار اۋدانداردا ءتىلدى وقىتۋ ورتالىقتارى جۇمىس ىستەيدى. الداعى كۇندەردە تاعى 10 اۋداندا وسىنداي ورتالىقتار اشىلىپ, جۇمىسىن جۇرگىزبەكشى. بۇل تۇرعىنداردىڭ لاتىن ءالىپبيىن مەڭگەرۋگە جاسالعان جاعداي.
- «جەتىسۋ كوكتەمى» جاس تىلشىلەر مەن قالامگەرلەردىڭ فورۋمى بىلتىردان باستاۋ العانىن بىلەسىزدەر, بيىلعى باسقوسۋدى وسىناۋ كورىكتى وڭىردە وتكىزۋدى ۇيعاردىق. بۇل جاس تالانتتاردىڭ شىعارماشىلىعىنا وڭ اسەرىن تيگىزەتىن بولادى. جانە بۇگىنگى شارانىڭ ءبىرىنشى فورۋمنان باستى ەرەكشەلىگى - بيىلعى باسقوسۋعا اۋدان, قالالاردان كەلگەن جاس ءتىل جاناشىرلارى مەن قازاق ءتىلىن جەتىك مەڭگەرگەن وزگە ەتنوس وكىلدەرىنىڭ قاتىسۋى بولدى, - دەدى ءوز سوزىندە ايدار كاربوز ۇلى.
جاستار فورۋمىنا ارنايى كەلگەن كەگەن اۋدانىنىڭ اكىمى تالعات بايەدىلوۆ كورىكتى كولساي اۋماعىنا كەلگەن جاس قالامگەرلەرگە ءوڭىر جايىندا اڭگىمەلەپ, شىعارماشىلىق تابىس تىلەدى. سونداي-اق «جەتىسۋ كوكتەمى» ادەبي فورۋمىندا وبلىستىق «ءتىل» وقۋ-ادىستەمەلىك ورتالىعىنىڭ وقىتۋشىسى جانار ەلەسباەۆا, قازاقستان جازۋشىلار وداعى وبلىستىق فيليالىنىڭ ديرەكتورى ەرلان ءجۇنىس, ۇيعىر اۋداندىق «قارادالا تىنىسى» گازەتىنىڭ ءتىلشىسى سابيريام انۆاروۆا, ىلە اۋدانى قاراوي اۋىلىنداعى №18 ورتا مەكتەپ مۇعالىمى ۆالەنتينا تاليۋس, كەربۇلاق اۋدانىنداعى د.قوناەۆ اتىنداعى ورتا مەكتەپتىڭ باستاۋىش سىنىپ مۇعالىمى كامشات شىنارباەۆالار ءسوز الىپ, ءوز ويلارىن ورتاعا سالدى. ال جاس اقىندار ءاليا ىڭكاربەك, قوزىباي قۇرمان جانە مۇحتار كۇمىسبەك جىردان شاشۋ شاشتى.
فورۋم جۇمىسىنا وراي ارنايى ۇندەۋ قابىلداعان جاس ادەبيەتشىلەر مەن تىلشىلەر ءۇشىن تاعى ءبىر جاعىمدى جاڭالىق جاريا بولدى. ول – الماتى وبلىسى اكىمىنىڭ جۇلدەسى ءۇشىن «اق قاۋىرسىن» ادەبي بايقاۋىنىڭ جاريالانعانى ەدى. بيىلعى «جاستار جىلىنا» وراي وتەتىن ادەبي بايقاۋ پوەزيا جانە پروزا جانرلارى بويىنشا «جاستار جىرلايدى» دەگەن اتاۋمەن وتەتىن بولدى.