ت. جۇرگەنوۆ اتىنداعى اكادەميانىڭ ءىزاشارى — الماتى مەملەكەتتىك تەاتر-كوركەمونەر ينستيتۋتى 1977 جىلى قۇرىلعان. ونىڭ العاشقى ستۋدەنتتەرى قۇرمانعازى اتىنداعى كونسەرۆاتوريانىڭ تەاتر فاكۋلتەتىنە 1975 جىلى تۇسكەن تۇلەكتەر ەدى. اكادەميانى وسىدان 40 جىل بۇرىن تامامداعان العاشقى قارلىعاشتار بۇگىندە قازاق ونەرىنە ەلەۋلى ەڭبەك ءسىڭىرىپ جۇرگەن مايتالماندار.
ولاردىڭ قاتارىندا ەلىمىزگە تانىمال تەاتر جانە كينو سالاسىنىڭ حاس شەبەرلەرى بار. اتاپ ايتقاندا, كەزىندە كوكشەتاۋ تەاترىنىڭ نەگىزىن قالاعان, بۇگىندە سول تەاتردىڭ ديرەكتورى مۇرات وسپانوۆ, نۇر-سۇلتان قالاسىنداعى ق. قويشىباەۆ تەاترىن قۇرۋشى بولات يبراەۆ, م. اۋەزوۆ دراما تەاترىنىڭ ءارتيسى گۇلنار ەراليەۆا, كەزىندە اتىراۋ وبلىستىق تەاترىنىڭ ديرەكتورى قىزمەتىن اتقارعان تولەگەن جانگەلديەۆ, بۇگىندە جۇرگەنوۆ اكادەمياسىندا قىزمەت ەتىپ جۇرگەن امان قۇلباەۆ, گۇلنار امانجانوۆا, مايرا سماعۇلوۆا, فاتيگۇل ازىمباەۆا, جامبىل تەاترىنىڭ ونەرپازى گۇلشات قىپشاقوۆا, «تاماشا» تەاترىنىڭ ىرگەسىن قالاۋشىلاردىڭ ءبىرى اقتوبەلىك باحىت ايتوۆا, سەمەيلىكتەر بەرىك قاسىموۆ, سالتانات ازىمباەۆا, قىزىلوردالىق جورابەك دوساەۆ, سونداي-اق راحيليا ماشۋروۆا مەن حاديشا بوكەەۆانىڭ كۋرسىن بىتىرگەن ۇيعىر ءبولىمى تۇلەكتەرى رۋسلان گايتوۆ, اليانۋر ياكۋپوۆ, مۋقاداس قاسىموۆ, ماليكا يميروۆا, گۋلزارا ياحياروۆا جانە ت.ب. بار.
«كەزدەسۋدىڭ نەگىزگى ماقساتى — ۇرپاقتار ساباقتاستىعىن جالعاۋ. ياعني, اعا بۋىن مەن جاس بۋىننىڭ اراسىندا تەاتر ونەرىنىڭ كەشەگىسى مەن بۇگىنى, جالپى تەاتر جونىندە اڭگىمە ءوربىپ, ستۋدەنت جاستار ەلىمىزدىڭ تۇكپىر-تۇكپىرىنەن جينالاتىن ونەر ساڭلاقتارىمەن جۇزدەسەدى», دەيدى وقۋ ورداسىنىڭ ۇجىمى.