بۇگىن پارلامەنت ماجىلىسىندە اقپاراتتىق-كوممۋنيكاتسيالىق تەحنولوگيالار جانە اقپاراتتىق قاۋىپسىزدىكتى قامتاماسىز ەتۋ سالاسىندا اسكەري كادرلاردى دايارلاۋعا ارنالعان حالىقارالىق ىستەر, قورعانىس جانە قاۋىپسىزدىك كوميتەتىنىڭ تاقىرىپتىق وتىرىسى ءوتتى.
كوميتەت توراعاسى مۇحتار ەرمان اقپاراتتىق-كوممۋنيكاتسيالىق تەحنولوگيالار مەن اقپاراتتىق قاۋىپسىزدىكتى قامتاماسىز ەتۋ سالاسىندا اسكەري كادرلاردى دايارلاۋ كيبەرقاۋىپسىزدىك تۇجىرىمداماسى (قازاقستاننىڭ كيبەرقالقانى) مەن ەلباسىنىڭ تاپسىرمالارىن ىسكە اسىرۋدىڭ ماڭىزدى بولىگى ەكەنىن ايتتى. تاقىرىپ بويىنشا قورعانىس ءمينيسترىنىڭ ورىنباسارى, گەنەرال-مايور مۋسليم التىنباەۆ بايانداما جاسادى.
ال, قورعانىس مينيسترلىگىنىڭ راديوەلەكترونيكا جانە بايلانىس اسكەري-ينجەنەرلىك ينستيتۋتى اقپاراتتىق قاۋىپسىزدىك كافەدراسىنىڭ باستىعى اندرەي كوچەشكوۆ, بولاشاق وفيتسەرلەردى دايىنداۋ بويىنشا وقۋ پروتسەسىنىڭ, اسكەري وقۋ ورنىنىڭ ادىستەمەلىك جانە ماتەريالدىق-تەحنيكالىق تۇرعىدان جابدىقتالۋىنىڭ ەرەكشەلىكتەرى, سونىمەن قاتار وقىتۋشى قۇرامىنىڭ دەڭگەيى جونىندە حاباردار ەتتى. تالقىلاۋ بارىسىندا كيبەرقاۋىپسىزدىك سالاسىنداعى زاماناۋي قاۋىپتەر مەن قاتەرلەرگە وقۋ باعدارلامالارىن داعدىلاۋ, وزىق جابدىقتار مەن باعدارلامالىق ونىمدەرمەن قامتاماسىز ەتۋ قاجەتتىلىگى, الەمنىڭ جەتەكشى اسكەري مەكەمەلەرىنە اسكەري ماماندار مەن كۋرسانتتاردى تاجىريبە الماسۋ ءۇشىن جىبەرۋگە قاتىستى شەشىمىن تاپپاعان ماسەلەلەر اڭگىمە وزەگىنە اينالدى.
شاراعا ءماجىلىس دەپۋتاتتارى, قورعانىس, تسيفرلىق دامۋ, قورعانىس جانە اەروعارىش ونەركاسىبى, ءبىلىم جانە عىلىم مينيسترلىكتەرى, ۇلتتىق قاۋىپسىزدىك كوميتەتى, اسكەري جانە ازاماتتىق جوعارعى وقۋ ورىندارى مامانداندىرىلعان فاكۋلتەتتەرىنىڭ باسشىلارى قاتىستى.