2019 جىلعى 24 ساۋىردە نۇر-سۇلتان قالاسىندا قركف باس كەڭەسىنىڭ وتىرىسى ءوتتى. وسى وتىرىستا كاسىپوداقتار فەدەراتسياسى اتىنان پرەزيدەنتتىك سايلاۋعا قاتىسۋعا ۇمىتكەر ۇسىنۋ ماسەلەسى قارالدى.
ەسكە سالا كەتەيىك, كەشە قركف اتقارۋ كوميتەتى كاسىپوداقتار فەدەراتسياسى توراعاسىنىڭ ورىنباسارى مۇحتار تىنىكەەۆتىڭ جانە باتىس قازاقستان وبلىسى اۋماقتىق كاسىپوداقتار بىرلەستىگىنىڭ توراعاسى امانگەلدى تاسپيحوۆتىڭ كانديداتۋرالارىن پرەزيدەنت سايلاۋىنا ۇمىتكەر بولۋعا ماقۇلداپ, باس كەڭەستىڭ قاراۋىنا ۇسىنعان بولاتىن.
تالقىلاۋ بارىسىندا ۇمىتكەرلەردى تىڭداۋ ناتيجەسىندە, سونداي-اق م.تىنىكەەۆتىڭ سايلاۋعا قاتىسۋدان وزدىگىنەن باس تارتۋىنا وراي, قركف باس كەڭەسى امانگەلدى تاسپيحوۆتىڭ كانديداتۋراسىن پرەزيدەنتتىككە ۇمىتكەر رەتىندە ۇسىنۋ تۋرالى شەشىم قابىلداندى.
ول 1959 جىلى 20 قاراشادا باتىس قازاقستان وبلىسىندا دۇنيەگە كەلگەن. لەنين اتىنداعى قازاق پوليتەحنيكالىق ينستيتۋتىن ينجەنەر-مەحانيك ماماندىعى بويىنشا تامامداعان.
ەڭبەك جولىن 1982 جىلى الماتى اۋىر ماشينا جاساۋ زاۋىتىندا ينجەنەر-تەحنولوگ بولىپ باستاعان. ءتۇرلى جىلدارى مەملەكەتتىك ورگانداردا باسشىلىق لاۋازىمداردا قىزمەت اتقارعان, بيزنەس قۇرىلىمدارىندا جۇمىس ىستەگەن.
باتىس قازاقستان وبلىسى ماسليحاتىنىڭ دەپۋتاتى, سونداي-اق سەنات جانە ءماجىلىس دەپۋتاتى بولىپ سايلانعان.
2019 جىلدان بەرى باتىس قازاقستان وبلىسى اۋماقتىق كاسىپوداقتار بىرلەستىگىنىڭ توراعاسى قىزمەتىن اتقارادى.
«قۇرمەت» (2005) وردەنىمەن, مەدالدارمەن ماراپاتتالعان.
ۇيلەنگەن, ەكى بالاسى بار.