بيىل بۇل فەستيۆالگە 21 ەلدەن 74 بەينەروليك قاتىسىپ, ولار ءۇش نوميناتسيا بويىنشا باعالاندى: «تۋريستىك دەستيناتسيا», «تۋريستىك ءونىم» جانە «تابيعات جانە ەكوتۋريزم». قاتىسۋشىلار مەن نومينانتتار اراسىندا يسپانيا, پورتۋگاليا, قىتاي, يندونەزيا, بىرىككەن اراب امىرلىكتەرى, اۆستريا جانە باسقالارى بولدى.
قازاقستاننىڭ بولگاريا رەسپۋبليكاسىنداعى ەلشىلىگىنىڭ باستاۋىمەن جانە قازاقستاننىڭ ۆارنا قالاسىنداعى قۇرمەتتى كونسۋلدىقتىڭ بەلسەندى قاتىسۋىمەن اقپان ايىندا XVI حالىقارالىق تۋريستىك فيلمدەر فەستيۆالىنە قاتىسۋعا ءوتىنىش بەرىلدى.
ءبىرىنشى كەزەڭدە 74 روليكتىڭ 44-ءى كەلەسى تۋرعا ءوتتى, ونىڭ ىشىندە قازاقستان تۋرالى بەينەروليك تە بار ەدى. ەكىنشى كەزەڭدە «تۋريستىك دەستيناتسيا» نوميناتسياسىندا تاعى 3 روليك: بىرىككەن اراب امىرلىكتەرىنەن 1 روليك جانە ەستونيادان 2 روليك سايىسقا ءتۇسىپ, «ءبىز قايدا بارامىز؟» روليگى جەڭىمپاز اتاندى.
فەستيۆال اياسىندا قازاقستان تۋرالى بەينەروليك سونداي-اق ۆەليكو-تىرنوۆو قالاسىنىڭ ورتالىق الاڭىندا كورسەتىلدى.
XVI «On the East Coast of Europe» (ەۋروپانىڭ شىعىس جاعاسىندا) حالىقارالىق تۋريستىك فيلمدەر فەستيۆالى بيىل 16-شى رەت وتكىزىلىپ وتىر. بارلىعى وسى ۋاقىتقا دەيىن 98 ەلدەن 1076 قاتىسۋشى فەستيۆالگە قاتىسىپ, تۋريزم تاقىرىبىنداعى ءتۇرلى فيلمدەر مەن جارنامالىق روليكتەرىن كورسەتتى.
«Kazakh Tourism» ۇلتتىق كومپانياسى» اكتسيونەرلىك قوعامى 2017 جىلى قازاقستان ءتۋريزمىن شەت ەلدە جارنامالاۋ جانە سالاعا ينۆەستيتسيا تارتۋ ماقساتىندا قۇرىلعان. «ءبىز قايدا بارامىز؟» بەينەروليگى 2018 جىلى حالىقارالىق تەلەارنادا كورسەتۋ ءۇشىن ءتۇسىرىلىپ, الەۋمەتتىك جەلىلەردە ۆيرۋستىق جولمەن تاراپ كەتكەن بولاتىن.
اتاپ ءوتۋ كەرەك, 2018 جىلدىڭ قورىتىندىسى بويىنشا بۇل روليك تانىمال رەسەيلىك ساياحات تۋرالى tutu.ru سايتىنىڭ نۇسقاسى بويىنشا جىلدىڭ ەڭ جاقسى بەينەبايانى رەتىندە تانىلعان.