سەنات توراعاسى وتىرىسقا قاتىسۋشىلارعا ارناعان سوزىندە جەرگىلىكتى بيلىك – مەملەكەتتىك باسقارۋدىڭ نەگىزگى بۋىنى ەكەنىن اتاپ ءوتتى. اكىمشىلىك رەفورما جەرگىلىكتى بيلىككە ەلەۋلى وكىلەتتىكتەر بەردى, ءماسليحاتتار اۋىل, اۋىلدىق وكرۋگ, اۋداندىق ماڭىزى بار قالا دەڭگەيىندەگى بيۋدجەتتى دەربەس قالىپتاستىرا الادى. كوممۋنالدىق مەنشىكتى دەربەس باسقارۋ; جەر رەسۋرستارىن باسقارۋ سالاسىن باقىلاۋ; ليتسەنزيالاۋدىڭ, اتەستاتتاۋدىڭ, باسقا دا باقىلاۋلاردىڭ تۇرلەرى بار. الايدا, وڭىرلەردىڭ ءبىرىنشى كەزەكتەگى مىندەتتەرى ءتيىستى دەڭگەيدە شەشىلمەي وتىر.
سەنات توراعاسى داريعا نازارباەۆا, سونداي-اق جەدەل شەشۋدى تالاپ ەتەتىن ايماقتىق دامۋدىڭ بىرقاتار ماسەلەلەرىنە, اتاپ ايتقاندا وڭىرلەردىڭ ءالسىز ينفراقۇرىلىمىنا نازار اۋداردى. «وڭىرلەردى اۋىز سۋمەن قامتاماسىز ەتۋ ماسەلەلەرىنە تاۋەلسىزدىك جىلدارى 540 ميلليارد تەڭگەدەن استام قارجى جۇمسالدى. سوندا دا كوپتەگەن ەلدى مەكەندەرگە ءالى كۇنگە دەيىن اۋىز سۋ نەگە جەتپەگەن؟ بۇل باعدارلاما بەرمۋد ۇشتاعانى سياقتى, قاراجات جۇمباق جاعدايدا جوعالىپ كەتەدى», دەدى د.نازارباەۆا.
سەنات حالىقارالىق قاتىناستار, قورعانىس جانە قاۋىپسىزدىك كوميتەتىنىڭ حاتشىسى, «قازاقستان ءماسليحاتتارى دەپۋتاتتارىنىڭ بىرلەستىگى» رەسپۋبليكالىق قوعامدىق ءبىرلەستىگىنىڭ توراعاسى تولەۋبەك مۇقاشەۆ ءوزىنىڭ بايانداماسىندا ءماسليحات دەپۋتاتتىعىنا كانديداتتاردى ىرىكتەۋ تالاپتارىن وزگەرتۋ, ولاردى مەملەكەتتىك باسقارۋ اكادەمياسىندا وقىتۋدى, ءماسليحات حاتشىلارىنىڭ مارتەبەسىن ارتتىرۋدى, تەكسەرۋ كوميسسيالارىنىڭ جۇمىسىن جەتىلدىرۋ قاجەتتىگىن اتاپ ءوتتى.
سونداي-اق ۇلتتىق ەكونوميكا ءمينيسترى رۋسلان دالەنوۆ, رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ توراعاسى ناتاليا گودۋنوۆا, تۇركىستان وبلىستىق ءماسليحاتىنىڭ حاتشىسى قايرات بالابيەۆ, قوستاناي وبلىستىق ءماسليحاتىنىڭ حاتشىسى سايلاۋبەك ەششانوۆ بايانداما جاسادى.
د. نازارباەۆا جەرگىلىكتى وكىلدى ورگاندارمەن ءوزارا ءىس-قيمىل جونىندەگى كەڭەستىڭ قىزمەتىنە قارقىن بەرۋگە شاقىردى.
«كەڭەس جەرگىلىكتى ءوزىن ءوزى باسقارۋدىڭ قالىپتاسۋى مەن وڭىرلىك دامۋدىڭ وزەكتى ماسەلەلەرى تالقىلاناتىن, تۋىنداعان ماسەلەلەردى شەشۋ جونىندەگى ۇسىنىستار جاسالاتىن تۇراقتى جۇمىس ىستەيتىن الاڭعا اينالۋى ءتيىس», دەدى سەنات باسشىسى.
كەزدەسۋ قورىتىندىسى بويىنشا ۇسىنىستار ازىرلەنەتىن بولادى. ولار مەرزىمى مەن جاۋاپكەرشىلىگى كورسەتىلەتىن ناقتى سيپاتقا يە بولۋى ءتيىس, ال سەناتورلار ولاردىڭ ىسكە اسۋى بارىسىنا تۇراقتى مونيتورينگ جۇرگىزۋدى قامتاماسىز ەتۋى ءتيىس, دەپ تاپسىردى سەنات توراعاسى.
كەزدەسۋ سوڭىندا پارلامەنت سەناتى جانىنداعى جەرگىلىكتى وكىلدى ورگاندارمەن (ماسليحاتتارمەن) ءوزارا ءىس-قيمىل جونىندەگى كەڭەس پەن «قازاقستان ءماسليحاتتارى دەپۋتاتتارىنىڭ بىرلەستىگى» رەسپۋبليكالىق قوعامدىق ءبىرلەستىگىنىڭ ىنتىماقتاستىق تۋرالى مەموراندۋمعا قول قويۋ ءراسىمى بولدى.