- بۇل سايىستىڭ ماقساتى ادەمى, كورىكتى, ءبىلىمدى قىزداردى انىقتاۋ ەمەس, قازاق حالقىنىڭ تاريحىن, مادەنيەتىن, ءتىلىن, «رۋحاني جاڭعىرۋ» باعدارلاماسىندا كورسەتىلگەن مادەني قۇندىلىقتاردى تەرەڭ بىلۋگە نەگىزدەلگەن. بايقاۋدا باق سىناعان ارۋلار ءوزىن-ءوزى تانىستىرۋ ارقىلى, سونداي-اق ماقال-ماتەلدەردى, ولەڭدەردى مانەرلەپ وقۋ ارقىلى ويلاۋ, ەستە ساقتاۋ قابىلەتتەرىن, قيالىن دامىتىپ, قازاق ءتىلىن تەرەڭ مەڭگەرۋگە, سول ارقىلى مەملەكەتتىك ءتىلدىڭ قولدانىس اياسىنىڭ كەڭەيۋىنە سەپتىگىن تيگىزەتىن بولادى, دەدى شارانىڭ اشىلۋ سالتاناتىندا ءسوز العان ماڭعىستاۋ وبلىسى قازاقستان حالقى اسسامبلەيا حاتشىلىعىنىڭ مەڭگەرۋشىسى گۇلجان يسمۋرزينا.
بايقاۋعا ۇلتتىق كيىم كيگەن ءازىربايجان, قىرعىز, ۇيعىر جانە وزبەك ۇلتتارىنىڭ التى ارۋى قاتىستى. ولار ساحنادا قازاق تىلىندە ونەر كورسەتىپ, قازاق ءتىلى مەن سالتىن قانشالىقتى بىلەتىندىكتەرىن كورسەتۋگە تىرىستى, وزدەرىنە قويىلعان ساۋالداردىڭ ءمانىن اشىپ, قازاق حالقىنىڭ سالت-داستۇرلەرى تۋرالى انگىمەلەپ بەردى.
ءبىرىنشى ورىنعا «اتامەكەن» ءانىن ورىنداپ, بايقاۋ تالابىنان شىعا بىلگەن ءازىربايجان قىزى روكسانا قۇربانوۆا يە بولدى. ال, ءازىربايجان ەتنومادەني بىرلەستىگىن اتىنان شىققان ايدا شاريفوۆا اباي اقىننىڭ ادامنىڭ رۋحاني, مورالدىق, وتباسىلىق قۇندىلىقتارىنا, جاس ۇرپاقتى تاربيەلەۋگە باعىتتالعان قارا سوزدەرىن مانەرلەپ وقىپ بەرىپ, ەكىنشى ورىندى يەلەندى. ءوزىنىڭ تالانتى مەن قازاق ءتىلىن, سالت-ءداستۇرىن ءبىلۋ دەڭگەيى بويىنشا وزبەك قىزى بازارباەۆا نيۋليفارعا ءۇشىنشى ورىن بەرىلدى. بايقاۋدىڭ جەڭىمپازدارى مەن قاتىسۋشىلارى ماڭعىستاۋ وبلىسى قازاقستان حالقى اسسامبلەياسىنان ديپلومدار مەن باعالى سىيلىقتارعا يە بولدى.