«دالا فولكلورىنىڭ انتولوگياسى» اۋديوجيناعى 1000 دانامەن جارىققا شىعىپ, ۇلتتىق جانە رەسپۋبليكالىق كىتاپحانالار مەن جوعارعى وقۋ ورىندارىنا, ونەر مەكتەپتەرىنە تاراتىلادى.
«اۋديوجيناقتى شىعارۋ ءۇشىن ارنايى توپ قۇرىلىپ, «التىن قورىمىزدا» ساقتالعان رۋحاني جادىگەرلەر بويىنشا جيناق ازىرلەۋگە كىرىسكەن بولاتىن. انتولوگيا-ەڭبەكتەگەن بالادان, ەڭكەيگەن قارياعا دەيىنگى اۋديتوريانى قامتيدى. ويتكەنى جيناق 7 بولىمنەن تۇرادى. ەرتەگى, باتىرلار جىرى, اندەر, كۇيلەر, ايتىس, سالت-ءداستۇر, اتادان قالعان اسىل ءسوز اتتى بولىمنەن كەز-كەلگەن ادام وزىنە رۋحاني ازىق الادى», - دەدى «Qazaq radiolary» جشس-ءنىڭ ديرەكتورى قۇرمانبەك جۇماعالي.
قازاق راديوسىنىڭ «التىن قورىندا» 1959 جىلدان بەرى «ەرتەگى» ايدارىمەن 350 حابار دايىندالعان, سونىڭ ىشىندەگى 70 قازاق ەرتەگىسى «ەرتەگى» ايدارىمەن جيناققا ەندى.
ال باتىرلار جىرىنىڭ 50 نۇسقاسى 2015 جىلى تەرمەشى اقان ءابدۋالىنىڭ ۇيىمداستىرۋىمەن ەلىمىزدىڭ بەلگىلى جىرشىلارىنىڭ ورىنداۋىندا قايتا ۇنتاسپاعا جازىلدى. سونىڭ ءبارى «دالا فولكلورىنىڭ انتولوگياسى» جيناعىنا توپتاستىرىلدى. «باتىرلار جىرى» ايدارىمەن 19 جىر جانە «كۇي» ايدارىمەن 160 كۇي ەندى. ايتىسقا كەلسەك, 1960 جىلدان ساقتالعان ساپاسى جوعارى دەگەن 10 ايتىس ىرىكتەلىپ الىندى. سونداي-اق, 76 ءداستۇر ءتۇرى وسى انتالوگيادا جيناقتالدى.
سونىمەن قاتار, قازاق اۋىز ادەبيەتىنىڭ وزىق ۇلگىلەرى توپتاستىرىلعان جيناقتىڭ كوپشىلىككە قولجەتىمدىلىگىن ارتتىرۋ ماقساتىندا ونىڭ ارنايى سايتى مەن ءموبيلدى قوسىمشاسىن ازىرلەۋ دە قولعا الىنىپ وتىر.
«بۇل سايتتا انتولوگيامەن قاتار, «تۇلعالار», «وقيعالار», «كەرەك دەرەك», «بالالار الەمى» سىندى بولىمدەر دە ورىن الادى. ول ۇنەمى پايدالى كونتەنتپەن جاڭارتىلىپ تۇرادى», - دەپ اتاپ ءوتتى قۇرمانبەك جۇماعالي.
ايتا كەتسەك, مامىر ايىنىڭ 16-18 كۇندەرى ارالىعىندا تۇركىستان قالاسىنداعى ق.ا. ياساۋي اتىنداعى حالىقارالىق قازاق-تۇرىك ۋنيۆەرسيتەتىندە حالىقارالىق كونفەرەنتسيا وتەدى. ونىڭ اياسىندا شەتەلدىك ەتنوگراف عالىمدارعا «دالا فولكلورىنىڭ انتولوگياسى» تانىستىرىلادى.