«سارىارقا» گاز قۇبىرىنىڭ قۇرىلىسى «بەينەۋ-بوزوي-شىمكەنت» گاز قۇبىرىنان باستاۋ الادى. قازىرگى ۋاقىتتا وبەكتىدە قۇرىلىس-مونتاجداۋ جۇمىستارى جۇرگىزىلىپ جاتىر. باستى قۇرىلىس جۇمىستارى 2019 جىلدىڭ سوڭىنا دەيىن اياقتالادى. ال, 2020 جىلى وبەكتىنى پايدالانۋعا بەرۋ جوسپارلانىپ وتىر.
ءوز كەزەگىندە, احمەتجان ەسىموۆ قۇرىلىس بارىسىمەن تانىسىپ, وڭ باعاسىن بەردى جانە جۇمىستىڭ ساپاسى مەن تاپسىرىلۋ مەرزىمىنىڭ ساقتالۋىن تالاپ ەتتى.
«سارىارقا» ماگيسترالدى گاز قۇبىرى قازاقستاننىڭ استاناسى مەن ورتالىق جانە سولتۇستىك ايماقتارىن گازداندىرۋعا ارنالعان. قور اۋقىمدى جوبانى قارجىلاندىرۋعا قاتىسادى,«قازسترويسەرۆيس» كومپانياسى - قۇرىلىس مەردىگەرى, «استانا گاز قمگ» - وپەراتورى.
ايتا كەتكەن ءجون, گاز قۇبىرىنىڭ تاسىمالداۋ قابىلەتى جىلىنا 2,2 ملرد. م³ گازدى قۇرايدى. مىسالعا, تەك الماتى وبلىسى مەن الماتى قالاسىنىڭ گاز تۇتىنۋ مولشەرى جىلىنا 2 ملرد. م³. جالپى العاندا, قاراعاندى جانە اقمولا وبلىستارىندا 171 ەلدى مەكەن گازبەن قامتاماسىز ەتىلەدى.
وسىلايشا, گازداندىرۋ ەسەبىنەن كومىر وتىنىن تۇتىنۋ كولەمى جىلىنا 650 مىڭ تونناعا ازايادى. بۇل شارالار ەلىمىزدىڭ ەكولوگيالىق جاعدايىن جاقسارتادى. بۇدان باسقا, «سارىارقا» گاز قۇبىرىنىڭ قۇرىلىسى 800-دەن استام ادامدى جۇمىسپەن قامتاماسىز ەتەدى, ەڭ قىزۋ جۇمىس جۇرەتىن ايلارى 2000-نان اسا ادام جۇمىلدىرىلادى.
اتاپ وتەيىك, قۇبىردى ءتورت كەزەڭدە سالۋ جوسپارلانىپ وتىر. ءبىرىنشى كەزەڭدە جەزقازعان-قاراعاندى-نۇر-سۇلتان باعىتىنداعى ماگيسترالدى گاز قۇبىرىنىڭ قۇرىلىسى جۇرگىزىلەدى. ەكىنشى كەزەڭدە نۇر-سۇلتان قالاسىنان كوكشەتاۋعا دەيىن گاز قۇبىرىن تارتۋ, ال ءۇشىنشى كەزەڭدە پەتروپاۆل قالاسىنا تارتۋ كوزدەلىپ وتىر. سوڭعى كەزەڭدە جەزقازعان مەن تەمىرتاۋداعى كومپرەسسورلىق ستانتسيالاردىڭ قۇرىلىسى قاراستىرىلعان. قۇبىردىڭ جالپى ۇزىندىعى 1061,3 شاقىرىم. جوبانى ىسكە اسىرۋعا جەرگىلىكتى كومپانيالار مەن ەڭبەك كۇشى تارتىلعان.