اتاپ ايتقاندا, ءماجىلىستىڭ جالپى وتىرىسىندا پالاتا دەپۋتاتتارى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەتتىك قىزمەتتەر كورسەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ءبىرىنشى وقىلىمدا ماقۇلدادى.
قۇجاتتى تالقىلاۋ بارىسىندا ن. نىعماتۋلين جۇرگىزۋشى كۋالىگىن الۋ ءۇشىن مەديتسينالىق كوميسسيادان ءوتۋ ءتارتىبى جايىندا سۇرادى. ءوز كەزەگىندە قر دەنساۋلىق ساقتاۋ ۆيتسە-ءمينيسترى ولجاس ابىشەۆ كوميسسيادان ءوتۋ كەزىندە 8 دارىگەر-ماماننىڭ تەكسەرۋى جانە 7 ءاناليزدى تاپسىرۋ قامتىلعانىن جەتكىزدى. «بۇل راسىمدەردى ەسكەرسەك, سىزدەر جۇرگىزۋشىنى ەمەس, عارىشكەردى ىرىكتەپ جاتقانداي كورىنەدى. بۇگىندە مۇلدەم باسقا جاعدايلار جاسالعان عوي. كەيبىر كورسەتكىشتەر بويىنشا تەستىلەۋ وتكىزۋ جەتكىلىكتى بولار, ياعني كوزدىڭ كورۋى, ەستۋ قابىلەتى سەكىلدى نەگىزگى ماماندار. بۇل جۇمىستاردى وڭتايلاندىرىپ, ءتيىستى ۇسىنىستار ەنگىزىڭىزدەر», - دەدى ءماجىلىس توراعاسى.
سونىمەن قاتار, ن. نىعماتۋلين مەديتسينالىق كۋالاندىرۋدى ۇيىمداستىرۋ شارالارىنا دا توقتالدى. وسى ورايدا ول بۇگىندە ادامدار اناليز تاپسىرۋ ءۇشىن ۇزىن-سونار كەزەكتە تۇراتىنىن جانە بۇل جەرلەردە ءتيىستى جاعداي جاسالماعانىن اتاپ ءوتتى. ءماجىلىس سپيكەرىنىڭ پايىمىنشا, بۇل ماسەلەنى ەگجەي-تەگجەيلى پىسىقتاۋ كەرەك. بۇل رەتتە دارىگەرلىك تەكسەرۋ ەرەجەسىن قايتا قاراستىرۋ قاجەت بولىپ تۇر, سەبەبى وسى تالاپتار مامانداندىرىلعان حالىققا قىزمەت كورسەتۋ ورتالىقتارى بولماعان كەزدە بەكىتىلگەن. ول كەزدە اۆتوماتتاندىرىلعان قىزمەتتەردىڭ, اقپاراتتىق جۇيەلەر ينتەگراتسياسىنىڭ ءتيىستى دەڭگەيى بولماعان ەدى.
«مەديتسينالىق تەكسەرۋ مەن جۇرگىزۋشى كۋالىگىن الۋ ءۇشىن بازانى قۇرعان كەزدە وسىنىڭ بارلىعىن ەسكەرۋ كەرەك. ادامدارعا قولايلى جاعداي جاساۋ قاجەت. قازىرگى كەزدە ءبىر كەزەكتەن ەكىنشىسىنە بارۋعا ءماجبۇر. «ازاماتتارعا ارنالعان ۇكىمەت» مەملەكەتتىك كورپوراتسياسىمەن بىرلەسە مەديتسينالىق تەكسەرۋدەن وتكىزۋدىڭ جاڭا ەرەجەسىن ازىرلەڭىزدەر. ەڭ باستىسى, ۇسىنىلاتىن قىزمەتتەردىڭ ساپاسىن جاقسارتۋ كەرەك», دەدى ن. نىعماتۋلين.